នៅថ្ងៃទី២៧ ខែមីនា ឆ្នាំ២០២០នេះ លោកទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានដឹកនាំក្រុមមន្ត្រីជំនាញ សហការជាមួយ អាជ្ញាធរមូលដ្ឋានស្រុកសូទ្រនិគម ចុះត្រួតពិនិត្យ ទប់ស្កាត់បទល្មើសជលផលនៅបឹងទន្លេសាប ចាប់ពីចំណុច មាត់ពាមឃ្លាំង ទៅដល់ចំណុច កន្ទូរ ក្នុងភូមិសាស្ត្រឃុំកំពង់ឃ្លាំង ស្រុកសូទ្រនិគមន៍ ខេត្តសៀមរាប ក្នុងនោះបានបំផ្លាញឧបករណ៍នេសាទខុសច្បាប់នៅនឹងកន្លែង រួមមាន ឧបករណ៍ ប ចំនួន ៨គ្រឿង របាំងសាច់មង ប្រវែង១ពាន់ម៉ែត្រ ចម្រឹងឈើ៧០០ដើម ព្រលែងកូនត្រីប្រមាណជាង១០គីឡូក្រាម។
តាមការឲ្យដឹងពី អាជ្ញាធរមូលដ្ឋាន និងមន្ត្រីជលផល បទល្មើសនេសាទ នៅក្នុងភូមិសាស្ត្រនេះ មានការថយចុះជាបន្តបន្ទាប់ ជាងបណ្ដាឆ្នាំមុនៗ។ ដោយឡែក ការប្រកបរបរនេសាទរបស់ប្រជានេសាទក្នុងតំបន់នេះ ភាគច្រើននេសាទជាលក្ខណៈគ្រួសារ ដោយប្រើប្រាស់ឧបករណ៍នេសាទមានដូចជា៖ មងរាយ កន្សំកំពឹស លាន់អន្ទង់ លបព្រៀង សន្ទូច លបប្រើសាច់អួន ។ល។
លោកប្រធានមន្ទីរកសិកម្មខេត្ត លើកឡើងថា ដោយមានការចុះពិនិត្យជាប្រចាំនៅតាមគោលដៅភូមិសាស្ត្ររបស់មន្ត្រីជំនាញ បទល្មើសនេសាទ មានការថយចុះមកចំនួនតិចតួចបំផុត។
ព័ត៌មានជាតិ ថ្មីៗ
លោកប្រធានមន្ទីរកសិកម្មខេត្ត បានបង្ហាញការព្រួយបារម្ភផងដែរជុំវិញ បម្រែបម្រួលអាកាសធាតុ នាំឲ្យកើនឡើងកម្ដៅ ធ្វើឲ្យបឹងទន្លេសាប គោករាក់ ធនធានមច្ឆជាតិ ក៏កាន់តែថយចុះ។ ដោយសារការប្រកបរបរ នេសាទជាលក្ខណៈប្រណៃណី ជួបបញ្ហាប្រឈម ប្រជានេសាទមួយចំនួនធំ បានប្ដូរមុខរបរទៅ លក់ដូរ រត់ម៉ូតូឌុប ខ្លះស្វែងរកការងារនៅឯទីប្រជុំជន ខ្លះទៅធ្វើចម្ការ ជាដើម។
លោកប្រធានមន្ទីរកសិកម្មខេត្ត ក៏បានជំរុញដល់មន្ត្រីក្រោមឱវាទ ត្រូវបន្តយកចិត្តទុកដាក់ សហការគ្នា ចេញត្រួតពិនិត្យឱ្យបានញឹកញាប់ ដើម្បីទប់ស្កាត់បទល្មើសជលផល ក្នុងភូមិសាស្ត្ររបស់ខ្លួនឱ្យបានជាប្រចាំផងដែរ ទោះបីបទល្មើសមានថយចុះក៏ដោយ។
អត្ថបទ និងរូបភាព៖ យូ វង្ស
សម្រួលអត្ថបទ៖ សេង ផល្លី
