នំប៉ែនចុក ជាអាហារប្រពៃណីខ្មែរ ដែលប្រជាជនក្នុងស្រុកទូទៅតែងទទួលទានតាំងពីយូរយារណាស់មកហើយ។ តែបច្ចុប្បន្ន អាហារមួយប្រភេទនេះ ប្រជាជនខ្មែរ តែងនិយមហៅថា នំបញ្ចុក។ នៅតាមបណ្ដោយផ្លូវឆ្ពោះទៅប្រាសាទបាយ័ន ត្រង់ចំណុចកសិន្ធុទឹកអង្គរវត្តផ្នែកខាងជើង ស្ថិតក្នុងភូមិត្រពាំងសេះ សង្កាត់គោកចក ក្រុងសៀមរាប មានកន្លែងលក់នំបញ្ចុកទឹកប្រហុក ចំនួន៣កន្លែង ដែលតែងមានមនុស្សឈាងចូលទទួលទានមិនដាច់។
ក្នុងកិច្ចសម្ភាសន៍ កាលពីថ្ងៃទី៣០ ខែមីនា ឆ្នាំ២០២០ ជាមួយ លោក ស៊ឹប ស្រួយ មានវ័យជាង៥០ឆ្នាំ ជាអាជីវករ និងរស់នៅភូមិត្រពាំងសេះនេះ លើកឡើងថា បច្ចុប្បន្ននំបញ្ចុក គេតែងទទួលទាន ជាមួយទឹកសម្ល និងទឹកជ្រលក់ច្រើនប្រភេទ ដូចជាទឹកសម្លខ្មែរ ទឹកសម្លការី ទឹកត្រីផ្អែម ជាដើម តែសម្រាប់នំបញ្ចុកដែលលោកលក់ ប្រើទឹកប្រហុក ជំនួសវិញ។
អាជីវកររូបនេះ បញ្ជាក់ថា រូបមន្ត និងគ្រឿងផ្សំ លោកបានច្នៃប្រឌិតដោយខ្លួនឯង មិនមានបន្សល់ទុកពីចាស់ទុំអ្វីឡើយ។ ក្នុងមួយថ្ងៃៗ លោកអាចរកបានយ៉ាងហោចណាស់មួយលានរៀល ពីការលក់នំបញ្ចុកទឹកប្រហុកនេះ។ លោកបន្ថែមថា កាលឆ្នាំ២០១៨ លោកនិងប្រពន្ធ បានចាប់ផ្ដើមលក់ នំបញ្ចុកទឹកប្រហុកនេះជាលើកដំបូង ដោយមាន ការកើនឡើងចំនួនអតិថិជន ចូលចិត្តរសជាតិទឹកប្រហុក និងនំបញ្ចុកចម្អិនថ្មីៗ របស់លោក សព្វថ្ងៃ លោកបានផ្ដល់ការងារដល់ មនុស្ស ១០នាក់បន្ថែមទៀត ដើម្បីជួយអាជីវកម្មរបស់លោក ក្នុងនោះពួកគេម្នាក់ៗទទួលបានប្រាក់ខែ ៦០ម៉ឺនរៀល។
អត្ថបទ និងរូបភាព៖ យូ វង្ស
សម្រួលអត្ថបទ៖ សេង ផល្លី
