កាលពីរសៀលថ្ងៃទី៣១ ខែមីនា ឆ្នាំ២០២០ លោក នាក់ ណេរ៉ុន អភិបាលរងខេត្តសៀមរាប បានចុះជួបប្រជាពលរដ្ឋមួយក្រុម ជាអ្នកផលិតបំពង់បឺតច្នៃពីដើមឫស្សី ស្ថិតនៅភូមិខ្នារផ្ទោល ឃុំស្រែណូយ ស្រុកវ៉ារិន្ ខេត្តសៀមរាប ដើម្បីជំរុញការផលិតនេះ មាននិរន្តភាព និងគិតគូរដល់ធម្មជាតិនាពេលខាងមុខ។
លោកអភិបាលរងខេត្ត លើកឡើងថា ការផលិតបំពង់បឺតឫស្សីនេះ មិនត្រឹមតែបានជួយដល់បរិស្ថាន កាត់បន្ថយកាកសំណល់ប្លាស្ទិចប៉ុណ្ណោះទេ ផលិតកម្មនេះក៏បានបង្កើតការងារ និងផ្ដល់ប្រាក់ចំណូលបន្ថែម ដល់ប្រជាពលរដ្ឋក្នុងមូលដ្ឋាន ដូចជា ប្រជាកសិករ ជាពិសេសស្ត្រីមេផ្ទះ ជនពិការ និងចូលរួមកាត់បន្ថយការចំណាកស្រុកទៅធ្វើការនៅក្រៅប្រទេសផងដែរ។
តាមការបញ្ជាក់ របស់លោកអភិបាលរងខេត្ត ក្រុមអ្នកផលិតបំពង់បឺតឫស្សីនេះ នៅមិនទាន់មានសហគមន៍ស្របច្បាប់នៅឡើយទេ លោកបានអំពាវនាវដល់ មន្ទីរអង្គភាពពាក់ព័ន្ឋ ជួយសហការសម្របសម្រួល ដើម្បីឲ្យសហគមន៍មួយនេះ បានចុះបញ្ជីមានច្បាប់ត្រឹមត្រូវ ជាពិសេសបើអាចគួរបញ្ចូលទៅក្នុងសហគមន៍ចង្ក្រានរយ ដែលមានស្រាប់នៅក្នុងស្រុកវ៉ារិន ព្រោះការចុះបញ្ជីសហគមន៍អាចត្រូវការរយៈពេលយូរ និងចងក្រងឯកសារជាច្រើន។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះ លោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានគំាទ្រ និងចូលរួម ក្នុងការសម្របសម្រួលដល់ដំណើរការបង្កើតសហគមន៍នេះ ចំណែកការងារពាក់ព័ន្ឋ ទៅនឹងបច្ចេកទេសកែច្នៃ មន្ទីរកសិកម្ម នឹងពន្យល់ណែនាំតាមក្រោយជាបន្តបន្ទាប់។ ជាមួយនោះ លោកនឹងជួយស្វែងរកកញ្ចប់ថវិកាតាមរយៈគម្រោងកម្មវិធីផ្សេងៗ ពីអង្គកការដៃគូរបស់មន្ទីរ ដើម្បីជួយជ្រោមជ្រែងឱ្យសហគមន៍នេះមានដំណើរការ។
គួរជម្រាបថា សហគមន៍បានបង្កើតជាបណ្តោះអាសន្ននៅចុងឆ្នាំ២០១៩។ ក្នុងចំណោមពូជដើមឫស្សីជាង៣០០ប្រភេទ មានតែឫស្សីព្រៃ ៤ប្រភេទប៉ុណ្ណោះ ដែលអាចយកមកផលិតជាបំពង់បឺតបាន។ ដើមឫស្សីទាំងនេះ ត្រូវចំពេលប្រហែល៣ឆ្នាំ ដើម្បីដាំ និងអាចផលិតជាបំពង់បាន។ បច្ចុប្បន្ន សហគមន៍ ពុំទាន់បានដាំឫស្សីព្រៃនេះនៅឡើយទេ គឺត្រូវទៅរកនៅក្នុងព្រៃ និងពុំទាន់អាចកំណត់ចំនួនផលិតបានជាក់លាក់នៅឡើយដែរ។ សម្រាប់ទីផ្សាររបស់បំពង់បឺតឫស្សីនេះ មានតម្លៃចន្លោះពី៤០០ទៅ៥០០រៀលក្នុងមួយបំពង់។
អត្ថបទ និង រូបភាព៖ យូ វង្ស
កែសម្រួល៖ សេង ផល្លី
