កាលពីថ្ងៃទី០៨ ខែមេសា ឆ្នាំ២០២០ម្សិលមិញនេះ លោក សូរ ប្លាតុង អភិបាលស្រុកប្រាសាទបាគង និង ជាប្រធានអនុគណៈកម្មការប្រយុទ្ធប្រឆាំងនឹងជំងឺកូវីដ១៩ ស្រុកប្រាសាទបាគង បានដឹកនាំក្រុមការងារស្រុក ចុះជួបសំណេះសំណាលជាមួយបងប្អូនប្រជាពលរដ្ឋ ចំនួន៦៤នាក់ ដែលបានមកពីក្រៅប្រទេស បន្ទាប់ពីបានបញ្ចប់ការរស់នៅដាច់ដោយឡែក និងតាមដានសុខភាពអស់រយៈពេល១៤ ថ្ងៃ ព្រមទាំងបាននាំយកអំណោយជាគ្រឿងឧបភោគ បរិភោគ និង សម្ភារប្រើប្រាស់មួយចំនួនទៀតជូនដល់ពួកគាត់ ។
មានប្រសាសន៍ក្នុងឱកាសនេះ លោក សូរ ប្លាតុង បានសម្ដែងនូវការអរគុណបងប្អូនប្រជាពលរដ្ឋយើងដែលបានមកពីក្រៅប្រទេស ដែលបានចូលរួមអនុវត្តតាមការណែនាំរបស់ក្រសួងសុខាភិបាល ក្នុងការរស់នៅដាច់ដោយឡែក និង ការតាមដានសុខភាពអស់រយៈពេល ១៤ ថ្ងៃកន្លងមកនេះ ដើម្បីរួមគ្នា បង្ការ និង ទប់ស្កាត់ការឆ្លងរាលដាលជំងឺកូវីដ១៩ នៅក្នុងសហគមន៍របស់យើងទាំងអស់គ្នា ។
លោក សូរ ប្លាតុង បានអំពាវនាវដល់បងប្អូនប្រជាពលរដ្ឋដែលទើបត្រឡប់មកពីក្រៅប្រទេសថ្មីៗ សូមចូលរួមអនុវត្តនូវការរស់នៅដាច់ដោយឡែកក្នុងរយៈពេល១៤ថ្ងៃសិន ប្រសិនបើយើងគោរពស្រឡាញ់ឪពុកម្តាយ លោកតា លោកយាយរបស់យើង ហើយសូមនៅឲ្យឆ្ងាយពីពួកគាត់មួយរយៈសិន ដើម្បីឲ្យច្បាស់ថា យើងគ្មានមេរោគកូវីដ ១៩ នេះ ដែលជាផ្នែកមួយជួយបង្ការ ការពារពួកគាត់កុំឲ្យឆ្លងមេរោគប្រភេទនេះផងដែរ ។
ព័ត៌មានជាតិ ថ្មីៗ
សូមបញ្ជាក់ថា គិតមកដល់គិតត្រឹមថ្ងៃទី០៨ ខែមេសា ឆ្នាំ២០២០ នេះ បងប្អូនប្រជាពលរដ្ឋដែលបានមកពីក្រៅប្រទេស សរុបចំនួន ១១៨នាក់ ក្នុងនោះស្រីចំនួន ៤៦នាក់ ក្នុងនោះ ប្រជាពលរដ្ឋចំនួន ៦៤នាក់ បានបញ្ចប់ការដាក់ឲ្យរស់នៅដាច់ដោយឡែកចំនួន ១៤ថ្ងៃ ព្រមទាំងតេស្តរកមេរោគកូវីដ១៩ លទ្ធផលអវិជ្ជមាន និង ប្រជាពល រដ្ឋចំនួន៥៤នាក់ទៀត កំពុងបន្តដាក់ឲ្យរស់នៅនៅដាច់ដោយ ឡែកបង្គ្រប់១៤ថ្ងៃ ប៉ុន្តែពួកគាត់គ្មានរោគសញ្ញាសង្ស័យឡើយ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
