នៅព្រឹកថ្ងៃទី១៣ ខែមេសា ឆ្នាំ២០២០នេះ ឯកឧត្តម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប បានណែនាំដល់មន្ត្រីនៃការិយាល័យទាំងបួន ត្រូវគោរពតាមការបទបញ្ជារបស់រាជរដ្ឋាភិបាល ដោយនៅបន្តបំពេញការងារក្នុងអំឡុងពិធីបុណ្យចូលឆ្នាំថ្មីប្រពៃណីជាតិខ្មែរ និងបន្តផលិតកម្មវិធី អប់រំអំពីការបង្ការទប់ស្កាត់ការឆ្លងរីករាលដាលនៃជំងឺកូវីដ១៩ នៅកម្ពុជា។
ឯកឧត្តម បញ្ជាក់ថា ការលើកថ្ងៃឈប់សម្រាក ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះ គឺជាការយកចិត្តទុកដាក់ខ្ពស់រាជរដ្ឋាភិបាល ដោយមិនចង់ឃើញសោកនាដកម្ម ដូចពិធីបុណ្យចូលឆ្នាំប្រពៃណី នៅឯប្រទេសចិន ដែលបានធ្វើឲ្យប្រទេសមហាអំណាចមួយនេះ មានចំនួនអ្នកឆ្លង និងស្លាប់លើសលប់មុនគេ ចំណែកឯសេដ្ឋកិច្ចវិញ ត្រូវបានជាប់គាំង ដោយសាររោងចក្រ សហគ្រាសភាគច្រើនត្រូវបានបិទទ្វារ។
ឯកឧត្តម បញ្ជាក់បន្ថែមថា បទបញ្ជារឹតបណ្ដឹងការធ្វើដំណើរទៅតាមបណ្ដាខេត្តនានា និងការផ្អាកការប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរ កាលពីពេលថ្មីៗនេះ គឺជាវិធានការ ដែលរាជរដ្ឋាភិបាល ត្រូវអនុវត្តន៍ដាច់ខាត ដើម្បីការពារអាយុជីវិតប្រជាពលរដ្ឋកម្ពុជាទូទាំងប្រទេស ខណៈបច្ចុប្បន្ននៅទូទាំពិភពលោក មានករណីឆ្លងជំងឺកូវីដ១៩ ជិត២លានករណីហើយ ក្នុងនោះកម្ពុជានៅតែបន្តរកឃើញករណីឆ្លងថ្មីបន្តបន្ទាប់ផងដែរ។
ព័ត៌មានជាតិ ថ្មីៗ
ដោយឡែក សម្រាប់មន្ទីរព័ត៌មានខេត្តសៀមរាប ឯកឧត្តម បានថ្លែងកោតសរសើរ ដល់មន្ត្រី របស់មន្ទីរគ្រប់ជាន់ថ្នាក់ ដែលបានខិតខំបំពេញការងាររបស់ខ្លួន យ៉ាងយកចិត្តទុកដាក់ ជាពិសេសមន្ត្រីព័ត៌មាន បានចុះទៅតាមមូលដ្ឋាន ដើម្បីផលិតកម្មវិធី ទោះបីអាចមានបញ្ហាប្រឈម នឹងការឆ្លងជំងឺកូវីដ១៩ ក៏ដោយ។
ឆ្លៀតក្នុងឱកាសនោះ មន្ត្រីទាំងបួនការិយាល័យ នៃមន្ទីរព័ត៌មានខេត្តសៀមរាប ក៏បានជូនពរឆ្នាំថ្មី ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំជូត ទោស័ក ពុទ្ធសករាជ ២៥៦៤នេះ ដល់ឯកឧត្តមប្រធាន និងលោកអនុប្រធាន នៃមន្ទីរព័ត៌មានខេត្តសៀមរាប សូមទេវតាឆ្នាំថ្មី ព្រះនាម គោរាគៈទេវី ជួយបីបាច់ ថែរក្សា ដើម្បីបន្តដឹកនាំ និងអភិវឌ្ឍវិស័យព័ត៌មាន ក្នុងខេត្ត ឲ្យកាន់តែគុណភាពបន្ថែមទៀត។
អត្ថបទ ៖ សេង ផល្លី
