នៅព្រឹកថ្ងៃទី១៤ ខែមេសា ឆ្នាំ២០២០នេះ ឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានអញ្ជើញជួបសំណេះសំណាលសួរសុខទុក្ខ និងនាំយកអំណោយមនុស្សធម៌ជូនប្រជាពលរដ្ឋរងគ្រោះដោយខ្យល់កន្ត្រាក់នៅស្រុកជីក្រែងចំនួន ៦៣គ្រួសារ ស្ថិតនៅសាលាឃុំល្វែងឫស្សី ស្រុកជីក្រែង ខេត្តសៀមរាប។
ឯកឧត្តម គុជ លីណា បាននាំយកនូវការសួរសុខទុក្ខ និងចូលរួមសោកស្ដាយ ចំពោះគ្រួសាររងគ្រោះ ដែលរងការបំផ្លិចបំផ្លាញទ្រព្យដោយគ្រោះធម្មជាតិនេះ ពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា កាកបាទក្រហមកម្ពុជា ខេត្តសៀមរាបផងដែរ។ ជាមួយនោះ ឯកឧត្តមក៏បាននាំយកអំណោយមនុស្សធម៌ ដើម្បីជួយសម្រាលទុក្ខបាករបស់បងប្អូនបានមួយកម្រិត រួមមាន គ្រួសាររងគ្រោះដោយខ្យល់កន្ត្រាក់ រលំផ្ទះ ក្នុងមួយគ្រួសារទទួលបាន មុង១ ភួយ១ សារុង១ ក្រមា១ កន្ទេល១ អាវយឺត២ ស័ង្កសី១៦សន្លឹក មី១កេស ត្រីខ១យួរ អង្ករ៣០គីឡូក្រាម និងថវិកា២សែនរៀល។ ដោយឡែក គ្រួសាររងគ្រោះដោយខ្យល់កន្ត្រាក់ របើកដំបូល ក្នុងមួយគ្រួសារទទួលបាន មុង១ ភួយ១ សារុង១ ក្រមា១ កន្ទេល១ អាវយឺត២ ស័ង្កសី ១០សន្លឹក មី១កេស ត្រីខ១យួរ អង្ករ៣០គីឡូក្រាម និងថវិកា ១សែនរៀល។ ទន្ទឹមនោះដែរ ឯកឧត្តម ក៏បាន ប្រគេន ទេយ្យវត្ថុមួយតចំនួនដល់វត្តតាអុង និងវត្តឃ្លាំងបេង ដោយក្នុងមួយវត្ត ទទួលបាន អង្ករ៦០គីឡូក្រាម មី២កេស ត្រីខ២យួរ ទឹកត្រី១យួរ ទឹកស៊ីអ៊ីវ១យួរ ម៉ាស់២ប្រអប់ និងបច្ច័យមួយចំនួនផងដែរ។
ឆ្លៀតក្នុងឱកាសនោះ ឯកឧត្តម គុជ លីណា បានអនុញ្ញាតដល់ ក្រុមប្រតិបត្តិសាខា ធ្វើការផ្សព្វផ្សាយ និងចែកខិត្តបណ្ណ ដែលទទួលបានពីទីស្នាក់ការកណ្ដាលកាកបាទក្រហមកម្ពុជា ស្ដីពី “របៀបលាងសម្អាតដៃជាមួយទឹក និងសាប៊ូ ដើម្បីបង្ការ ជំងឺកូវីដ១៩” និង “វិធីកាត់បន្ថយហានិភ័យពីការឆ្លង ជំងឺកូវីដ១៩” ដើម្បីទប់ស្កាត់ ការឆ្លងរីករាលនៃជំងឺកូវីដ១៩ ដែលជាបញ្ហាប្រឈមជាសកល និងក្នុងប្រទេសកម្ពុជា។
ព័ត៌មានជាតិ ថ្មីៗ
អត្ថបទ និង រូបថត ៖ គឿន វេត និង ម៉ី សុខារិទ្ធ
កែសម្រួលអត្ថបទ ៖ សេង ផល្លី
