ថ្ងៃទី២០ ខែមេសា ឆ្នាំ ២០២០ រដ្ឋបាលក្រុងលីស៊ួយ ខេត្តជឺជាំង នៃសាធារណរដ្ឋប្រជាមានិតចិន បាននាំយកអំណោយ ជាបរិក្ខាពេទ្យ មានម៉ាស់N95 ចំនួន៥០០ សម្លៀកបំពាក់ពេទ្យ ១០០ឈុត និង ម៉ាស់ធម្មតា ចំនួន១ម៉ឺន ប្រគល់ជូនរដ្ឋបាលខេត្តសៀមរាប។
ក្នុងឱកាសប្រគល់និងទទួលអំណោយនេះ មានការអញ្ជើញពីឯកឧត្តម ទៀ សីហា អភិបាលខេត្តសៀមរាប ឯកឧត្តមប្រធានការិយាល័យកុងស៊ុលចិនប្រចាំខេត្តសៀមរាប និងលោក ម៉ី ចុងមីន អនុប្រធានសមាគមពាណិជ្ជកម្ម ខេត្តជឺជាំង ប្រចាំនៅកម្ពុជា។
លោក ម៉ី ចុងមីន លើកឡើងថា តាមរយៈកិច្ចសហប្រតិបត្តិការល្អ រវាងកម្ពុជា-ចិន ជាពិសេសខេត្តសៀមរាប និង ក្រុងលីស៊ួយ នៃខេត្តជីជាំង នាពេលកន្លងមក ខណៈប្រទេសចិន បានកំពុងជួបវិបត្តិជំងឺឆ្លងកូវីដ១៩ រដ្ឋបាលខេត្តសៀមរាប បានជួយឧបត្ថម្ភនូវសម្ភារៈបរិក្ខាពេទ្យ ក្នុងនាមជាបងប្អូន ដើម្បីរួមគ្នាប្រយុទ្ធប្រឆាំងនឹងជំងឺដ៏កាចសាហាវនេះ។ តាមរយៈកិច្ចសហប្រតិបត្តិការល្អ រវាងកម្ពុជា-ចិន និងក្នុងកាយវិការ ដ៏សប្បុរសធម៌របស់រដ្ឋបាលខេត្តសៀមរាប ពុំអាចបំភ្លេចបាននូវគ្រាលំបាកនោះឡើយ។ ទន្ទឹមនឹង កម្ពុជា បាននិងកំពុងបន្តប្រយុទ្ធប្រឆាំងកូវិដ១៩ រដ្ឋបាលក្រុងលីស៊ួយ ក៏ដូចជាខេត្តសម្ព័ន្ធមេត្រី ត្រូវចូលរួមជួយគ្នាក្នុងគ្រាលំបាក តាមរយៈការនាំយកនូវសម្ភារៈបរិក្ខាពេទ្យមួយចំនួន នាពេលនេះ។
ព័ត៌មានជាតិ ថ្មីៗ
ជាមួយនោះ លោកក៏បានសាទរចំពោះកម្ពុជា ដែលបានទប់ស្កាត់ការចម្លង និងព្យាបាលអ្នកជំងឺបានជាសះស្បើយជាបន្តបន្ទាប់ កត្តាទាំងនេះគឺជាវិធានការដ៏ល្អ របស់រាជរដ្ឋាភិបាលកម្ពុជា និង ក្រសួងសុខាភិបាល ក្នុងការទប់ស្កាត់ ការពារការរីករាលដាលនៃជំងឺកូវិដ១៩ ។
ឯកឧត្តម ទៀ សីហា បានបង្ហាញពី កិច្ចសហការប្រតិបត្តិការ យ៉ាងល្អប្រសើរលើគ្រប់វិស័យ រវាងខេត្តសៀមរាប ជាមួយខេត្ត-ក្រុងទាំង៤ នៃប្រទេសចិន នាពេលកន្លងមក។ ការគាំទ្ររបស់ភាគីចិន និងការផ្តល់ជំនួយសម្ភារៈ បរិក្ខានិងអ្នកជំនាញវេជ្ជសាស្រ្តមកកាន់កម្ពុជា គឺជាការយកចិត្តទុកដាក់លើសពីក្របខ័ណ្ឌនៃចំណងមិត្តភាព តែជាការរួមបេះដួងតែមួយជាបងប្អូន ចិន-កម្ពុជា។
ឯកឧត្តមអភិបាលខេត្ត បានថ្លែងអំណរគុណដល់រដ្ឋបាលក្រុងលីស៊ួយ ការនាំយកអំណោយទាំងនេះ ជូនដល់គណៈកម្មាធិការប្រយុទ្ធប្រឆាំងជំងឺកូវីដ១៩ របស់រដ្ឋបាលខេត្តសៀមរាប ដើម្បីចែកជូនដល់មន្ទីរពេទ្យ មណ្ឌលសុខភាព និងក្រុមការងារ សម្រាប់បំពេញប្រតិបត្តិការរបស់ខ្លួន ក្នុងការប្រយុទ្ធប្រឆាំងនឹងជំងឺឆ្លងកូវីដ១៩នៅក្នុងខេត្តសៀមរាបទាំងមូល ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
