អាជ្ញាធរសុខាភិបាលកូរ៉េខាងត្បូងបានរាយការណ៍ឲ្យដឹងថា ក្នុងរយៈពេល ២៤ម៉ោងកន្លងមកនេះ ប្រទេសកូរ៉េខាងត្បូងបានកត់ត្រាករណីឆ្លងថ្មីៗ នៃជំងឺ COVID-19 ចំនួន ១០ករណីបន្ថែមទៀត ដែលនាំឲ្យតួលេខអ្នកឆ្លងសរុប នៅក្នុងប្រទេសអាស៊ីបូព៌ាមួយនេះកើនដល់ ១០,៧៣៨ករណី។ នេះបើយោងតាមការចេញផ្សាយដោយ ទីភ្នាក់ងារព័ត៌មានស៊ីនហួរ នារសៀលថ្ងៃចន្ទ ទី២៧ ខែមេសា ឆ្នាំ២០២០។
កូរ៉េខាងត្បូងបានរក្សាចំនួនករណីឆ្លងប្រចាំថ្ងៃខ្ទង់ ១០ករណីលើសខ្វះតិចតួច សម្រាប់រយៈពេល ០៩ថ្ងៃជាប់ៗគ្នាមកហើយ ដោយក្នុងចំណោមករណីឆ្លងនេះទៀតសោត មានមួយផ្នែកជាករណីនាំចូលពីក្រៅប្រទេស។ នៅក្នុងរយៈពេលដូចគ្នានេះ កូរ៉េខាងត្បូងក៏បានរកឃើញករណីស្លាប់ចំនួន ០១ករណី បន្ថែមទៀតដែរ ដែលនាំឲ្យចំនួនសរុបបានកើនដល់ ២៤៣នាក់ស្មើនឹង ២.២៦% នៃចំនួនករណីឆ្លងសរុបនៅទូទាំងប្រទេស។
ដោយឡែកសម្រាប់របាយការណ៍ ស្តីអំពីតួលេខសរុបនៃអ្នកជាសះស្បើយឡើងវិញ អាជ្ញាធរសុខាភិបាលកូរ៉េខាងត្បូងក៏បានបញ្ជាក់ដែរថា បានកើនដល់ ៨,៧៦៤នាក់ហើយ ដែលស្មើនឹង ៨១.៦% នៃអ្នកជំងឺសរុប បន្ទាប់ពីជាសះស្បើយ ៤៧នាក់បន្ថែមទៀត ទើបតែបានចាកចេញពីមន្ទីរពេទ្យ។
គួរជម្រាបថា គិតចាប់តាំងពីថ្ងៃទី០៣ ខែមករាមក កូរ៉េខាងត្បូងបានធ្វើតេស្តរក COVID-19 លើមនុស្សច្រើនជាង ៦០១,០០០នាក់ ក្នុងចំណោមនោះ ៥៨២,០២៧នាក់ មានលទ្ធផលអវិជ្ជមាន ខណៈ ៨,៨៩៥នាក់ កំពុងស្ថិតក្នុងការតាមដាន៕
