ព្រឹកថ្ងៃទី០៨ ខែឧសភា ឆ្នាំ២០២០នេះ មន្រ្តីក្រុមការងាររាជរដ្ឋាភិបាល និងសមាគមក្រុមប្រឹក្សាសុខភាពប្រជាជន ចុះផ្សព្វផ្សាយវិធានការ និងពង្រឹងស្មារតីដល់ប្រជាពលរដ្ឋក្នុងសហគមន៍ បន្តការពារខ្លួន និងប្រយុទ្ធប្រឆាំងការចម្លងជំងឺកូវីដ១៩ នៅឃុំពាក់ស្នែង ស្រុកអង្គរធំ ខេត្តសៀមរាប។
បើទោះជានៅក្នុងប្រទេសកម្ពុជា រលកទី១នៃការចម្លងមេរោគកូវីត-១៩ ត្រូវបានបញ្ចប់ក៏ដោយ តែការពង្រឹងការការពារ ទប់ស្កាត់ នៃរលកទី២ជំងឺកូវីត-១៩ នៅក្នុងសហគមន៍ នៅតែជាការងារអាទិភាព របស់រាជរដ្ឋាភិបាលកម្ពុជា។ ជាផ្នែកមួយនៃសកម្មភាពឆ្លើយតបទៅនឹងបញ្ហានេះ គេឃើញមានប្រជាពលរដ្ឋក្នុងសហគមន៍មូលដ្ឋានជនបទឃុំពាក់ស្នែង ប្រមាណជិត៦០០នាក់ បានចូលរួម និងទទួលនូវការអប់រំផ្សព្វផ្សាយវិធានការនានា ដើម្បីទប់ស្កាត់ការចម្លងមេរោគដ៏កាចសាហាវនេះ។
ឯកឧត្តម ផៃ សុខខេង អនុប្រធានក្រុមការងាររាជរដ្ឋាភិបាលចុះជួយស្រុកអង្គរធំ និងជាប្រធានក្រុមការងារប្រចាំឃុំពាក់ស្នែង មានប្រសាសន៍ថា៖ បើទោះបីកម្ពុជា មានមោទនភាពក្នុងការគ្រប់គ្រងវិបត្តិកូវីត១៩ នៃដំណាក់កាលនាំចម្លងចូលដោយជនបរទេសយ៉ាងណាក៏ដោយ ក៏ប៉ុន្តែក្នុងពេលជាមួយគ្នានេះ ពិភពលោកមិនទាន់ឆ្លងផុតគ្រោះថ្នាក់នៃវិបត្តិរាតត្បាតដោយជំងឺកូវីត-១៩នៅឡើយនោះទេ ស្ថាប័នជំនាញជាតិនិងអន្តរជាតិ បានក្រើនរំលឹកឲ្យប្រជាពលរដ្ឋកម្ពុជា បន្តការយកចិត្តទុកដាក់អនុវត្តលើគ្រប់វិធានការទាំងឡាយ និងរួមគ្នាពង្រឹងបន្ថែមទៀតស្មារតីប្រយទ្ធប្រឆាំងការចម្លងមេរោគកូវីត-១៩។ ការធ្វេសប្រហែស ការប្រមាថភ្លេចខ្លួន វាគឺជាការបើកឱកាសឲ្យកូវីត១៩ នាំយកកការចម្លងវិលត្រឡប់មករកកម្ពុជាវិញ ពិសេសគឺក្នុងសហគមន៍ដែលកំពុងមានហានីភ័យ ដោយសារតែការវិលត្រឡប់មកពីប្រទេសជិតខាងនៃប្រជាពលរដ្ឋកម្ពុជា នៅតែមានជាបន្តបន្ទាប់នោះ។
បើតាមសេចក្តីរាយការណ៍របស់អាជ្ញាធរឃុំពាក់ស្នែងបានឲ្យដឹងថា ឃុំពាក់ស្នែងមានភូមិចំនួន៦ភូមិ ប្រជាពលរដ្ឋសរុបជាង ៦ពាន់នាក់ ក្នុងនោះប្រជាពលរដ្ឋចេញទៅធ្វើការក្រៅប្រទេសមានចំនួន៣០នាក់ និងបានវិលត្រឡប់មកវិញចំនួន៦នាក់ កំពុងស្ថិតក្នុងការធ្វើចត្តាឡីស័ក ដាក់ឲ្យនៅដាច់ដោយឡែក បានចំនួន១សប្តាហ៍កន្លងមកហើយ។ សម្រាប់ពិធីផ្សព្វផ្សាយនោះ ក៏មានចែកជូនអំណោយជាស្បៀងអាហារ សាប៊ូ និងសម្លៀកបំពាក់ផងដែរ ដែលជាសក្ខីកម្មនៃការរួមសុខរួមទុក្ខជាមួយគ្នា រវាងក្រុមការងារនិងប្រជាពលរដ្ឋ ក្នុងកាលៈទេសៈនៃវិបត្តិកូវីត១៩៕
អត្ធបទ និង រូបភាព៖ ងិន គឹមឡេង
កែសម្រួលអត្ថបទ ៖ សេង ផល្លី
