អ្នកពាក់ព័ន្ធក្នុងវិស័យទេសចរណ៍ក្នុងស្រុក ត្រូវបន្តពង្រឹងការអនុវត្តវិធានទប់ស្កាត់ជំងឺកូវីដ១៩ឲ្យបានល្អប្រសើរ ខណៈកំណើនភ្ញៀវទេសចរក្នុងស្រុក នឹងមានការកើនឡើងអំឡុងថ្ងៃឈប់សម្រាក ជំនួសឲ្យថ្ងៃសម្រាកបុណ្យចូលឆ្នាំថ្មីប្រពៃណីជាតិខ្មែរ នេះបើតាមប្រសាសន៍របស់ ឯកឧត្តម ថោង ខុន រដ្ឋមន្ត្រីក្រសួងទេចរណ៍ នៅលើហ្វេសប៊ុកផ្លូវការ របស់ក្រសួង កាលពីល្ងាចថ្ងៃទី១២ ខែកក្កដា ឆ្នាំ២០២០។
គួររំលឹកថា រាជរដ្ឋាភិបាលកម្ពុជា បានសម្រេចផ្អាកបុណ្យចូលឆ្នាំថ្មីប្រពៃណីជាតិខ្មែរ ក្នុងឆ្នាំ២០២០ ដោយសារតែការផ្ទុះឡើងនៃជំងឺកូវីដ១៩ ដោយបានសន្យាថា នឹងផ្ដល់មកវិញនូវថ្ងៃឈប់សម្រាកសងនៅពេលស្ថានភាពជំងឺកូវីដ១៩ មានភាពធូរស្រាល។ តាមរយៈការសន្យានេះ រាជរដ្ឋាភិបាល បានសម្រេចផ្ដល់ថ្ងៃឈប់សម្រាកចំនួន៥ថ្ងៃ ចាប់ពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០ សម្រាប់មន្ត្រីរាជការ នយោជិត និងកម្មករ។
ការឈប់សម្រាក ដែលភ្ជាប់នឹងថ្ងៃសៅរ៏ និងអាទិត្យនេះ ឯកឧត្តម រដ្ឋមន្ត្រីក្រសួងទេសចរណ៍ បង្ហាញថា ជារៀងរាល់ឆ្នាំមានទេសចរក្នុងស្រុកជាង១លាននាក់ ដោយឡែកទេសចរទៅលេងបរទេសមានជាង២លាននាក់។ ដូច្នេះ ក្នុងវិបត្តិជំងឺកូវីដ១៩ ប្រជាពលរដ្ឋក្នុងស្រុក នឹងពុំអាចចេញទៅលេងបរទេសបានឡើយ ដែលជាឱកាសសម្រាប់វិស័យទេសចរណ៍ក្នុងស្រុក។
ទន្ទឹមនោះ ឯកឧត្តម ក៏បានណែនាំដល់ មន្ទីរទេសចរណ៍រាជធានី-ខេត្ត ត្រូវធ្វើការណែនាំដល់អ្នកពាក់ព័ន្ធក្នុងវិស័នេះ ទី១ ត្រូវបង្កើនការត្រួតពិនិត្យសុខភាពភ្ញៀវទេសចរ តាមរយៈវិធានសុវត្ថិភាព របស់ក្រសួងសុខាភិបាល បានដាក់ចុះ។ ទី២ ស្នើដល់ផ្នែកឯកជន រៀបចំបើកដំណើរសេវាកម្មឡើងវិញ ដើម្បីត្រៀមទទួលភ្ញៀវក្នុងអំឡុងពេលនេះ។
ជាមួយគ្នានោះ ក្នុងពេលដែលកម្ពុជា ក៏ដូចពិភពលោកកំពុងជួបវិបត្តិកូវីដនេះ រាជរដ្ឋាភិបាលកម្ពុជាក៏បាននឹងបន្តលើកទឹកចិត្ត ដល់វិស័យឯកជន ដែលធ្វើការក្នុងវិស័យទេសចរណ៍ តាមរយៈការលើកលែងការបង់ថ្លៃអាជ្ញាបណ្ណទេសចរណ៍គ្រប់ប្រភេទនៅឆ្នាំ២០២១ និងការជួយគាំទ្រផ្សេងៗទៀត ដើម្បីជួយសម្រាលបន្ទុកចំណាយ។
ឯកឧត្តម រដ្ឋមន្ត្រីក្រសួងទេសចរណ៍ លើកឡើងថា វិបត្តិជំងឺកូវីដ-១៩ នឹងធ្វើឲ្យឱ្យវិស័យទេសចរណ៍កម្ពុជា ដើរថយក្រោយចាប់ពីបី ទៅប្រាំឆ្នាំ ដូច្នេះក្រសួងទេចរណ៍នឹងដាក់ចេញផែនការថ្មីៗ ជាបន្តបន្ទាប់ ដើម្បីលើកកម្ពស់វិស័យទេសចរណ៍កម្ពុជា ឲ្យមានភាពប្រសើរឡើងវិញ៕
អត្ថបទ និង រូបថត ៖ មន្ទីរព័ត៌មានខេត្តសៀមរាប
