អាជ្ញាធរជាតិអប្សរា នឹងបើកឲ្យអ្នកទេសចរចូលទស្សនា ប្រាសាទកណ្តាលស្រះស្រង់ បន្ទាប់ពីប្រាសាទនេះ ត្រូវបានបញ្ចប់ការជួសជុល និងបានសម្ពោធន៍បើកជាផ្លូវការឡើងវិញបន្ទាប់ពីចាប់ផ្តើមអនុវត្តគម្រោងជួសជុលកាលពីអំឡុងខែមីនា ឆ្នាំ២០២០កន្លងមក ប្រាសាទកណ្តាលស្រះស្រង់ត្រូវបានជួសជុលរួចរាល់ជាស្ថាពរ និងបានសម្ភោធដាក់ឱ្យដំណើការជាផ្លូវការ ដោយក្នុងអំឡុងពេលនេះ អាជ្ញាធរជាតិអប្សរានឹងបើកឱ្យភ្ញៀវទេសចរទាំងអស់ចូលទស្សនា មួយរយៈពេល ដើម្បីបានឃើញពីស្នាដៃដែលបុព្វបុរសបានបន្សល់ទុក។ នេះបើតាមការបញ្ជាក់ពីលោក ម៉ៅ សុខនី មន្ត្រីបច្ចេកទេស នាយកដ្ឋានអភិរក្សប្រាសាទក្នុងឧទ្យានអង្គរ នៃអាជ្ញាធរជាតិអប្សរា នៅព្រឹកថ្ងៃទី២២ ខែកុម្ភៈ ឆ្នាំ២០២១នេះ ។
លោក ម៉ៅ សុខនី បានឲ្យដឹងដែរថា តាមកម្មវិធីរបស់អាជ្ញាធរជាតិអប្សរាបានដាក់ឱ្យប្រជាពលរដ្ឋចូលទស្សនា ក្រោយដាក់សម្ភោធឱ្យប្រើប្រាស់មួយរយៈ ដោយសារយើងធ្វើស្ពានហើយដើម្បីឆ្លងទៅប្រាសាទកណ្តាលហ្នឹង ហើយការកំណត់បិទនោះមិនដឹងពេលណាទេ នេះជាឱកាសហើយ។ ព្រោះនៅកណ្តាលទឹកយើងពិបាកឆ្លងទៅឆ្លងមក ហើយបានទុកឱ្យប្រជាពលរដ្ឋនិងភ្ញៀវទេសចរតាមបណ្តាលខេត្តរាជធានីអាចមកចូលទស្សនា ព្រោះប្រាសាទនេះវាដួលរលំរយៈកាលយូរណាស់ហើយ យើងបានធ្វើឱ្យចេញរូបរាងវិញ ដែលឱ្យយើងឃើញប្រាសាទនៅកណ្តាលស្រះស្រង់នេះ។
សូមជម្រាបផងដែរថា ប្រាសាទកណ្តាលស្រះស្រង់ត្រូវបានសម្ភោធដាក់ឱ្យប្រើប្រាស់ជាផ្លូវ កាលពីព្រឹកថ្ងៃទី២២ ខែកុម្ភៈ ឆ្នំា២០២១ ក្រោមអធិបតីភាពដ៏ខ្ពង់ខ្ពស់របស់លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងជាតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អមដោយលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា ព្រមទាំងសហការី រួមនឹងសម្តេចព្រះសង្ឃរាជ ព្រះសង្ឃ ឯកឧត្តម លោកជំទាវជាច្រើនរូបទៀត។
គួរឲ្យដឹងដែរថា ប្រាសាទកណ្តាលស្រះស្រង់ស្ថិតក្នុងរមណីដ្ឋានអង្គរ ប្រាសាទនេះត្រូវបានកសាងឡើងនៅក្នុងសត្សវត្សទី ១០ និងមានការកែសម្រួលបន្ថែមនៅចុងសត្សវត្សទី១២ និងដើមសត្សវត្សទី១៣ រូបរាងប្រាសាទកណ្តាលស្រះស្រង់មានរាងដូចជាចេតិយមួយ សង់នៅលើខឿនថ្មបាយក្រៀមនិងលាយថ្មភក់ចំនួន៨រួត ហើយសំណង់នេះមានលក្ខណៈប្លែកគេនៅក្នុងតំបន់អង្គរ។
ដោយសារកត្តាធម្មជាតិធ្វើឲ្យប្រាសាទនេះ បានរងការបាក់បែកជាខ្លាំង ដើម្បីថែរក្សាមរតកវប្បធម៌ជាតិ ទុកឲ្យកូនចៅជំនាន់ក្រោយ និងការលើកតម្លៃប្រវត្តិសាស្រ្ត សំណង់ប្រាសាទ និងទេសភាពវប្បធម៌នៃស្រះស្រង់ឡើងវិញនោះ អាជ្ញាធរជាតិអប្សរាបានធ្វើការជួសជុលប្រាសាទនេះឡើងវិញ ក្រោមការឧបត្ថម្ភថវិកាពីលោកជំទាវឧកញ៉ា សៀង ចាន់ហេង អគ្គនាយិការក្រុមហ៊ុនហេងអភិវឌ្ឍន៍៕
អត្ថបទ និង រូបភាព៖ ជា ស្រស់
កែសម្រួល៖ អ៊ុន ណារាជ្យ
