ដោយមើលឃើញពីស្ថានភាពជាក់ស្តែងថា ក្នុងអំឡុងដែលសកលលោកជាពិសេសប្រទេសកម្ពុជា ជួបនូវបញ្ហាវិបត្តដោយសារមេរោគឆ្លងកូវី-១៩ ប្រជាពលរដ្ឋក្រុងសៀមរាបភាគច្រើន មិនសូវបានចេញក្រៅ និងខ្លះទៀតត្រូវធ្វើចត្តាឡីស័កតាមផ្ទះ ដើម្បីការពារជំងឺកូវីដ១៩ អ្នកខ្លះត្រូវបានផ្អាកពីការងារ រកចំណូលមិនបានជាហេតុខកខានមិនបានយកចង្ហាន់ទៅវត្ត ដែលធ្វើឱ្យវត្តអារាមទាំងឡាយខ្វះខាតចង្ហាន់ ភេសជ្ជៈ និងបច្ច័យ៤ផងដែរ ហេតុនេះទើបនៅរសៀលថ្ងៃទី០៤ ខែមេសា ឆ្នាំ២០២១ អ្នកស្រី នង សៃនីម ជាអាជីករមួយរូបនៅក្នុងខេត្តសៀមរាប បានសម្រេចប្រគេនកាហ្វេសម្រាប់ជាភេសជ្ជៈដល់ព្រះសង្ឃឆាន់។
បើតាម អ្នកស្រី នង សៃនីម បានឲ្យដឹងថា ដោយសារវិបត្តិជំងឺកូវី-១៩ ជាង១ឆ្នាំមកនេះ មុខរបរនិងអាជីវកម្មរបស់អ្នកស្រីត្រូវបាត់បង់អតិថិជន និងត្រូវបានផ្អាកទាំងស្រុង បណ្តាលឱ្យកាហ្វេដែលបញ្ជាទិញពីប្រទេសថៃដើម្បីបោះឱ្យម៉ូយទៅកាន់ទីផ្សារមិនអាចលក់ចេញបាន គួបផ្សំនឹងមើលឃើញពីភាពអត្តខ័តរបស់ព្រះសង្ឃតាមវត្តនានាក៍ចែករំលែកប្រគេនថ្វាយទៅតាមទឹកចិត្តសទ្ឋាជ្រះថ្លាទៅតាមលទ្ឋភាពដែលអាចធ្វើបាន។ ការចែករំលែកនេះគឺប្រគេនព្រះសង្ឃនាពេលនេះមានជាង២០០កេសធំ ក្នុងនោះបានប្រគេន៩៩កេស ប្រគេនតាមរយៈសមាគមមត៌កព្រះពុទ្ឋសាសនា និងសង្គម ដឹកនាំដោយព្រះតេជគុណ រតនឃោសកោ សោម សេរីឬទ្ឋី នាយកសមាគម និងសល់ខានពីនោះ នាំទៅប្រគេននិងចែកព្រះសង្ឃតាមវត្តនិងតាមផ្ទះដែលធ្វើចត្តាឡីស័កដោយខ្លួនឯង។
ព្រះតេជគុណ រតនឃោសកោ សោម សេរីឬទ្ឋី នាយកសមាគមមត៌កព្រះពុទ្ឋសាសនា និងសង្គមចាត់ទុកសកម្មភាពនេះថា ជាសទ្ធាជ្រះថ្លាដ៏បរិសុទ្ធ បើទោះជាមិនបានច្រើន ប៉ុន្តែក៏អាចជួយសម្រាលបន្ទុក និងដោះទ័លដល់ព្រះតេជគុណតាមវត្តមួយចំនួនបានមួយរយៈផងដែរ។ ភេសជ្ជៈកាហ្វេនេះត្រូវបាននាំយកទៅប្រគេននៅតាមវត្តឆ្ងាយៗក្នុងខេត្តសៀមរាបនិងគោលដៅមួយចំនួនសរុប១៣ទីតាំងក្នុងនោះ មណ្ឌលចត្តាលីស័ក២កន្លែង អធិការនគរបាលស្រុកប្រាសាទបាគង ការិយាល័យសង្គមកិច្ច និងកងរាជអាវុធហត្ថស្រុកប្រាសាទបាគង និងវត្តចំនួន៧ភាគច្រើនជាវត្តដែលមានសាមណសិស្សកំពុងសិក្សាពុទ្ឋកៈសិក្សា និងវត្តដែលមានព្រះសង្ឃច្រើន ដោយវត្តខ្លះប្រគេន៨កេសខ្លះ៥កេស វត្តខ្លះ៣កេស ។
ជាមួយគ្នានោះ ព្រះតេជគុណ បានសំណូមពរដល់ព្រះសង្ឃនិងប្រជាពុទ្ឋបរិស័ទគ្រប់ទីកន្លែង ត្រូវប្រុងប្រយ័ត្នជានិច្ចចំពោះបញ្ហានៃការរីករាលដាលជំងឺកូវីដ-១៩ចូលក្នុងសហគមន៍ ។បញ្ហានេះ ទាមទារឱ្យមានការប្រុងប្រយ័ត្ននិងបង្ការទប់ស្កាត់ទាំងអស់គ្នា។តាមរយៈសេចក្តីអំពាវនាវរបស់ ក្រសួងសុខាភិបាល និងវិធនាកា៣កុំ៣ការពាររបស់សម្តេចតេជោ ហ៊ុន សែន នាយករដ្ឋមន្ត្រី ឱ្យមានការប្រុងប្រយ័ត្នខ្ពស់ គឺកុំចូលទៅកន្លែងបិទជិត គ្មានខ្យល់ចេញចូលនិងម៉ាស៊ីនត្រជាក់ច្រើន កុំទៅកន្លែងមានមនុស្សច្រើន និងកុំប៉ះពាល់គ្នា កុំកៀកស្មាគ្នា កុំឱបគ្នាជាដើម ត្រូវអនុវត្តនូវវិធានការ ៣ ការពារ ឱ្យបានខ្ជាប់ខ្ជួន គឺពាក់ម៉ាស់ លាងដៃ និងគម្លាតសង្គម គម្លាតបុគ្គល ចាប់ពីមួយម៉ែត្រកន្លះឡើងទៅ៕
អត្ថបទ និង រូពភាព៖ យូ វង្ស
