បើតាមសារព័ត៌មាន CNA នៅថ្ងៃព្រហស្បតិ៍នេះបានឲ្យដឹងថា កប៉ាល់សង្រ្គោះរបស់សិង្ហបុរី និងម៉ាឡេស៊ី កំពុងត្រូវបញ្ជូនឲ្យទៅជួយ ក្នុងកិច្ចប្រឹងប្រែងតាមរក នាវាមុជទឹកឥណ្ឌូណេស៊ីមួយគ្រឿង ដែលបានបាត់ដំណឹងកាលពីថ្ងៃពុធម្សិលមិញជាមួយនាវិក៥៣នាក់នៅក្នុងនោះ ។
នៅថ្ងៃព្រហស្បតិ៍នេះ អ្នកនាំពាក្យយោធាឥណ្ឌូណេស៊ីបានឲ្យដឹងថា សិង្ហបុរីកំពុងបញ្ជូនកប៉ាល់សង្រ្គោះរបស់ខ្លួន ឈ្មោះ MV Swift Rescue ឲ្យមកជួយ។ ចំណែកម៉ាឡេស៊ី ក៏កំពុងរៀបចំបញ្ជូនកប៉ាល់សង្រ្គោះមួយគ្រឿង ឈ្មោះ Mega Bakti ឲ្យមកជួយដូចគ្នាផងដែរ។ កប៉ាល់សង្រ្គោះរបស់ប្រទេសទាំងពីរ ត្រូវរំពឹងថា នឹងទៅដល់កន្លែងតាមរកនាវាមុជទឹកឥណ្ឌូណេស៊ី នៅខ្ទង់ថ្ងៃសៅរ៍ និងថ្ងៃអាទិត្យ ចុងសប្តាហ៍នេះ។
គួរបញ្ជាក់ថា នាវាមុជទឹកឥណ្ឌូណេស៊ី KRI Nanggala 402 បានបាត់ដំណឹងកាលពីថ្ងៃពុធម្សិលមិញនេះ ជាមួយនាវិក៥៣នាក់ ពេលកំពុងធ្វើការហ្វឹកហ្វឺន នៅម្តុំដែនទឹកភាគខាងជើងកោះបាលី។ យោធាឥណ្ឌូណេស៊ីប្រាប់ថា ការហៀរប្រេងមួយ ត្រូវបានប្រទះឃើញក្បែរទីតាំង ដែលនាវាមុជចូលជ្រៅទៅក្នុងទឹក។ ប្រទេសដទៃទៀត រួមមានសហរដ្ឋអាមេរិក អាល្លឺម៉ង់ បារាំង តួកគី ឥណ្ឌា រុស្ស៉ី និង អូស្រ្តាលី ក៏បានស្នើជួយឥណ្ឌូណេស៊ី តាមរកនាវាមុជទឹកនេះផងដែរ៕
