កាលថ្ងៃទី២១ ខែមិថុនា ឆ្នាំ២០២១នេះ លោក ហ៊ន់ ឫទ្ធិ អភិបាលស្រុកស្រីស្នំ រួមនឹងក្រុមការងារ បាននាំយកអំណោយជាគ្រឿងឧបភោគបរិភោគ របស់សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្ដសៀមរាប ជូនដល់គ្រួសារលំបាកខ្វះខាតក្នុងជីវភាពចំនួន១៥គ្រួសារក្នុងឃុំស្លែងស្ពាន ដែលក្នុងមួយគ្រួសារទទួលបាន អង្ករចំនួន៣០គីឡូក្រាម , ត្រីខ ០១យួរ , ទឹកស៊ីអ៊ីវ ០១យួរ និង មី០១កេស ដើម្បីជួយដោះទុក្ខលំបាកក្នុងអំឡុងវិបត្ដិជំងឺកូវីដ១៩ ដែលកំពូងធ្វើការរាតត្បាតជាសកលនៅឡើយនោះ ។
មានប្រសាសន៍ក្នុងឱកាសនេះ លោក ហ៊ន់ ឫទ្ធិ អភិបាលស្រុកស្រីស្នំ បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចពិជ័យសេនា ទៀ បាញ់ និងអំពាវនាវដល់ប្រជាពលរដ្ឋទាំងអស់ ត្រូវចូលរួមអនុវត្ដនូវវិធានការនានារបស់ក្រសួងសុខាភិបាល ដើម្បីទប់ស្កាត់ការឆ្លងរាលដាលជំងឺកូវីដ-១៩នៅក្នុងសហគមន៍របស់យើង ជាពិសេសវិធានការរបស់ររបស់រាជរដ្ឋាភិបាល គឺ៣ការពារ និង ៣កុំ ។
លោក ហ៊ន់ ឫទ្ធិ បានឲ្យដឹងថា ដោយមើលឃើញពីទុក្ខលំបាករបស់បងប្អូនប្រជាពលរដ្ឋយើង សម្ដេចពិជ័យសេនា ទៀ បាញ់ បានឧបត្ថម្ភគ្រឿងឧបភោគបរិភោគជូនដល់គ្រួសារលំបាកខ្វះខាតក្នុងជីវភាព ក្នុងស្រុកស្រីស្នំ ចំនួន៩០គ្រួសារ ដែលក្នុងមួយឃុំមានចំនួន១៥គ្រួសារ ហើយនេះជាអំណោយលើកដំបូងរបស់សម្ដេចពិជ័យសេនា ទៀ បាញ់ សម្រាប់ជូនដល់គ្រួសារលំបាកខ្វះខាតក្នុងជីវភាពចំនួន១៥គ្រួសារក្នុងឃុំស្លែងស្ពាន ហើយសម្រាប់ឃុំផ្សេងៗទៀត ក្រុមការងាររបស់ស្រុក នឹងបន្តការចែកជូននៅពេលក្រោយឆាប់ៗនេះ ។
ព័ត៌មានជាតិ ថ្មីៗ
លោក ហ៊ន់ ឫទ្ធិ មានប្រសាសន៍ទៀតថា បើទោះបីមិនច្រើនសម្រាប់បងប្អូនក៏ពិតមែន ប៉ុន្ដែអាចជួយសម្រួលជីវភាពក្នុងគ្រួសារបានមួយរយៈផងដែរ ដែលបច្ចុប្បន្ន កំពុងស្ថិតក្នុងអំឡុងពេលជួបវិបត្ដិសេដ្ឋកិច្ច ដោយសារជំងឺកូវីដ-១៩ ដែលសកម្មភាពនេះ គឺជាវប្បធម៌ចែករំលែក និងជាការយកចិត្ដទុកដាក់របស់រាជរដ្ឋាភិបាល ដោយមិនបានទុកឲ្យប្រជាពលរដ្ឋណាម្នាក់ស្លាប់ ដោយសារខ្វះស្បៀងអាហារនោះឡើយ ពោលគឺរាជរដ្ឋាភិបាល បានគិតគូរពីសុខទុក្ខប្រជាពលរដ្ឋជានិច្ច ទោះបីមិនបានចុះនៅមូលដ្ឋានក្នុងអំឡុងពេលកូវីដ១៩នេះក្ដី ដែលទុក្ខលំបាកប្រជាពលរដ្ឋ ក៍ដូចជាទុកលំបាករបស់រាជរដ្ឋាភិបាល ។
លោកអភិបាលស្រុកស្រីស្នំ មានប្រសាសន៍បន្ថែមទៀតថា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាពិសេសការបញ្ចប់សង្គ្រាមផ្ទៃក្នុងនាឆ្នាំ១៩៩៨ បាននាំមកនូវសុខសន្តិភាពពេញបរិបូរណ៍ក្នុងទូទាំងប្រទេស ក្រោមនយោបាយឈ្នះឈ្នះ បានធ្ចើឲ្យប្រទេសជាតិយើងមានការរីកចម្រើនយ៉ាងឆាប់រហ័សលើគ្រប់វិស័យ ស្មើមុខស្មើមាត់នៅលើឆាកអន្តរជាតិ ដូចបងប្អូនប្រជាពលរដ្ឋយើងបានឃើញនឹងភ្នែកស្រាប់ ដូច្នេះក្នុងឱកាសនេះ សូមអំពាវនាវដល់បងប្អូនប្រជាពលរដ្ឋទាំងអស់ ត្រូវជឿជាក់លើការដឹកនាំរបស់សម្ដេចតេជោ ហ៊ុន សែន និងចូលរួមជាមួយរាជរដ្ឋាភិបាលបន្តទៀត ដើម្បីឲ្យប្រទេសជាតិយើងកាន់តែមានការរីកចម្រើនថ្មីៗបន្ថែមទៀត ។
សូមបញ្ជាក់ថា អំណោយរបស់សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋាន ខេត្ដសៀមរាប នឹងធ្វើការចែកជូនប្រជាពលរដ្ឋខ្វះខាត នៅក្នុងឃុំទាំង១០០ឃុំ របស់ខេត្ដសៀមរាប ខណៈដែលការផ្ដល់អំណោយជាលើកដំបូង គឺនៅរសៀលថ្ងៃទី០៤ ខែមិថុនា ឆ្នាំ២០២១ សម្រាប់គ្រួសារលំបាកខ្វះខាតក្នុងក្រុងសៀមរាប ៕
អត្ថបទ៖ លោក លីវ សាន្ត
រូបភាព៖ រដ្ឋបាលស្រុកស្រីស្នំ
