ប្រធានការិយាល័យនីតិកម្មកសិកម្ម នៃមន្ទីរកសិកម្មរុក្ខាប្រម៉ាញ់ និងនេសាទខេត្តសៀមរាប លោក ហ៊ុន រស្មី បានបញ្ជាក់នៅថ្ងៃទី២៩ ខែមិថុនា នេះថា អាជីវករដែរប្រកបរបរលក់ផលិតផលថ្នាំ និងជីគីមីកសិកម្មដែលគ្មានលិខិតអនុញ្ញាតត្រឹមត្រូវ ឬលក់ផលិតផលដែលគ្មានស្លាកសញ្ញាព័ត៌មានជាអក្សរខ្មែរ អាចប្រឈមនឹងការផាកពិន័យ និងឈានដល់ការបិទអាជីវកម្ម។ ចំពោះដេប៉ូលក់ថ្នាំ និងជីគីមីកសិកម្ម ត្រូវតែមានលិខិតអនុញ្ញាតបើកអាជីវកម្មដែលទទួលស្គាល់ ពីច្រកចេញចូលតែមួយ និងលក់ផលិតផលកសិកម្មណា ដែលមានស្លាកសញ្ញាព័ត៌មានជាអក្សរខ្មែរ ដែលអាចឲ្យអ្នកប្រើប្រាស់យល់ពីរបៀបនៃការប្រើប្រាស់ ឬ ស្គាល់ប្រភេទនៃផលិតផលកសិកម្មនោះ បើមិនដូច្នោះទេ ម្ចាស់អាជីវកម្មនឹងត្រូវទទួលទោសចំពោះមុខច្បាប់។
លោកប្រធានការិយាល័យបានបញ្ជាក់បន្ថែមថា កន្លងមកមន្រ្តីជំនាញតែងតែធ្វើការចុះអប់រំផ្សព្វផ្សាយ និងត្រួតពិនិត្យជាប្រចាំ ចំពោះដេប៉ូដែលបាននឹងកំពុងប្រកបអាជីវកម្មនេះ ដោយឲ្យពួកគាត់ត្រូវចូលរួមអនុវត្តនូវវិធានការនានាទាក់ទងនឹងផលិតផលកសិកម្មគ្រប់ប្រភេទ ដើម្បីជាប្រយោជន៍សម្រាប់អ្នកប្រើប្រាស់ ជាពិសេស គឺការនាំចូលនូវផលិតផលកសិកម្មដែលស្របតាមច្បាប់អនុញ្ញាតជាដើម។ ក្នុងនោះដែរ ចំពោះអាជីវករដែលអាចលក់ថ្នាំ និងជីកសិកម្មបាន គឺតម្រូវឲ្យមានការឆ្លងវគ្គអប់រំសមត្ថភាពវិជ្ជាជីវៈ មានលិខិតអនុញ្ញាតិ និងត្រូវលក់ផលិតផលដែរមានបញ្ជីការត្រឹមត្រូវ មានបិទព័ត៍មាននៅសំបកកញ្ជប់ជាភាសារខ្មែរច្បាស់លាស់
ក្នុងនោះដែរលោកក៏បានណែនាំដល់ប្រជាកសិករទាំងអស់ដែលបានឃើញអាជីវករដែលលក់ថ្នាំ និងជីកសិកម្មខុសច្បាប់ត្រូវរាយការណ៍ទៅកាន់ជំនាញ ឬក៏តាមលោកផ្ទាល់តាមរយៈលេខ ០៨៥ ៥៩៧ ៧៧៩ ហើយមិនត្រូវទិញផលិតផលទាំងនោះជាដាច់ខាត ព្រោះអាចជាផលិតផលក្លែងក្លាយ ឬខុសច្បាប់៕
អត្ថបទ៖ លោកស្រី ហែម បូរ៉ាន្នី
កែសម្រួល៖ អ៊ុន ណារាជ្យ
