អាជ្ញាធរស្រុកវ៉ារិន ខេត្ដសៀមរាប នៅល្ងាចថ្ងៃទី១៩ ខែកក្កដា ឆ្នាំ២០២១ បានសម្រេចបិទការចេញចូលជាបណ្ដោះអាសន្ននូវផ្សារចំនួន២ នៅក្នុងឃុំស្រែណូយ ស្រុកវ៉ារិន ខេត្ដសៀមរាប បន្ទាប់ពីរកឃើញប្រជាពលរដ្ឋដែលរស់នៅខាងមុខផ្សារចំនួន ១១នាក់ មានផ្ទុកមេរោគកូវីដ-១៩។
បើតាមលោក ធិននី វិធូរ អភិបាលស្រុកវ៉ារិន ខេត្ដសៀមរាប បានឲ្យដឹងថា នៅល្ងាចថ្ងៃទី១៩ ខែកក្កដានេះថា ប្រជាពលរដ្ឋដែលមានវិជ្ជមានចំនួន ១១នាក់ខាងលើពួកគាត់បានជាប់ពាក់ព័ន្ធជាមួយអ្នកវិជ្ជមានកូវីដ-១៩ម្នាក់ ដែរជាអ្នកលក់ផ្លែឈើមកពីទីរួមខេត្ដសៀមរាប ប្រហែលជិត១០ថ្ងៃមុន។ ដោយមានការសង្ស័យទើបនៅពីព្រឹកថ្ងៃទី១៩ អាជ្ញាធរបានធ្វើតេស្ដលើប្រជាពលរដ្ឋចំនួន ២១នាក់ ជាលទ្ធផលរកឃើញវិជ្ជមានកូវីដ-១៩ ចំនួន១១នាក់។ ចំពោះប្រជាពលរដ្ឋទាំង ១១នាក់ដែលមានវិជ្ជមានកូវីដ-១៩នេះ ពួកគាត់រស់នៅខាងមុខផ្សារស្រែណូយ ទើបអាជ្ញាធរបានសម្រេចបិទផ្សារស្រែណូយ និងផ្សារឯកជនមួយទៀតនៅក្បែនោះ ជាបណ្តោះអាសន្នចាប់ពីល្ងាចថ្ងៃទី១៩ ខែកក្កដា ឆ្នាំ២០២១នេះតទៅ។
លោកអភិបាលស្រុកវ៉ារិន បានបញ្ជាក់ថា ការរកឃើញអ្នកវិជ្ជមានជំងឺកូវីដ-១៩ ចំនួន១១ករណីនេះ គឺនឹងអាចជាប់ពាក់ព័ន្ធជាមួយអាជីវករ ក៍ដូចប្រជាពលរដ្ឋជាច្រើនទៀត ខណៈដែលនៅតំបន់នោះជាទីប្រជុំជនផ្សារ ហើយអ្នកវិជ្ជមានកូវីដ-១៩ ក៍ធ្លាប់បានចេញចូលផ្សារនោះដែរ។ ជាមួយគ្នានោះលោកក៍សូមអំពាវនាវដល់ប្រជាពលរដ្ឋ និងអាជីវករនៅផ្សារទាំង២ ដែលមានពាក់ព័ន្ធជាមួយអ្នកវិជ្ជមានទាំង១១នាក់ខាងលើ បើមានការសង្ស័យពីអាការៈមិនស្រួល សូមមកយកសំណាកធ្វើតេស្តរកមេរោគកូវីដ-១៩ ជាមួយអាជ្ញាធរ និងត្រូវធ្វើចត្ដាឡីស័កបាន១៤ថ្ងៃ តាមការណែនាំរបស់ក្រសួងសុខភិបាល ក៍ដូចជាអាជ្ញាធរផងដែរ។
លោកអភិបាលស្រុកវ៉ារិន បញ្ជាក់បន្ថែមថា ក្នុងព្រឹត្ដិការណ៍សហគមន៍២០ កុម្ភៈ គិតមកដល់ថ្ងៃទី១៩ ខែកក្កដា ឆ្នាំ២០២១ អាជ្ញាធរស្រុកវ៉ារិន បានរកឃើញអ្នកឆ្លងជំងឺកូវីដ-១៩ ចំនួន១៨នាក់ ដោយអ្នកទាំងនោះខ្លះកំពុងសម្រាក់ព្យាបាល និងមួយចំនួនទៀតបានជាសះស្បើយ។ ជាមួយគ្នានោះ ក្រោយពីបានរកឃើញវិជ្ជមានកូវីដ-១៩ ទៅលើប្រជាពលរដ្ឋជាបន្ដបន្ទាប់ អាជ្ញាធរស្រុកបានស្នើរទៅថ្នាក់លើ ត្រៀមយកសាលារៀនវិទ្យាល័យស្រែណូ ក្នុងឃុំស្រែណូយ ធ្វើជាមណ្ឌលព្យាបាលជំងឺកូវីដ-១៩ផងដែរ៕
អត្ថបទ៖ ជា ស្រស់ ,ឈិត សាវី
រូបភាព៖ ខេង ឧត្តម
កែសម្រួល៖ លោក អ៊ុន ណារាជ្យ
