ដោយមើលឃើញពីការខ្វះខាតរបស់ប្រជាពលរដ្ឋ និងមានទុក្ខលំបាកក្នុងក្រុមគ្រួសារផងនោះ កាលល្ងាចថ្ងៃទី១៣ ខែសីហា ឆ្នាំ២០២១នេះ ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក ក្រុមសៀមរាប បាននាំយកនូវសម្ភារ និងគ្រឿងឧបភោគបរិភោគ មួយចំនួនមាន៖ អង្ករ ៥០គីឡូក្រាម ,គ្រឿងបាឡុង ១ឈុត ,ទឹកត្រីទឹកស៊ីអ៊ីវ ២យួរ រួមជាមួយនឹងបច្ច័យមួយចំនួន ទៅប្រគល់ជូនដល់ក្រុមគ្រួសារប្រជាពលរដ្ឋដែលមានជីវភាពខ្វះខាត់ និងសមាជិកគ្រួសារបានទទួលមរណៈភាព ស្ថិតនៅភូមិទក្សិណខាងត្បូង សង្កាត់គោកចក ក្រុងសៀមរាប។
ព្រះគ្រូវិចិត្រវង្សា ហែម គឹមសាន បានមានសង្ឃដិកាថា អំណោយជាគ្រឿងបរិភោគ និងថវិកាទាំងអស់នេះ គឺបានមកពីការប្រគេនរបស់ពុទ្ឋបរិស័ទក្នុងពិធីបុណ្យផ្សេងៗ នាពេលកន្លងមក ហើយក៍បានសន្សំ និងប្រមូលបម្រុងទុកសម្រាប់ចែកជូនគ្រួសារ ឬអាជ្ញាធរមូលដ្ឋានណាដែលជួបហានិភ័យដោយប្រការផ្សេងៗ សម្រាប់ដោះស្រាយការលំបាកមួយគ្រាៗ តាមលទ្ឋភាពដែលព្រះសង្ឃមាន។ កន្លងមកវត្តប្រាសាទគោកចកតែងតែនាំយកស្បៀងអាហារ និងថវិកាទោះតិចក្តីច្រើនក្តី ដើម្បីចែករំលែក និងផ្តល់ជូនដល់គ្រួសារដែលជួបហានិភ័យ ជួបការលំបាកដោយសារជំងឺ ដោយសារគ្រោះធម្មជាតិផ្សេងៗ ដើម្បីជាការចូលរួមសម្រាលការលំបាកមួយគ្រាៗ ស្របតាមពុទ្ឋឱវាទរបស់ព្រះសម្មាសម្ពុទ្ឋបរមគ្រូនៃយើង ដែលបានត្រាស់ទូន្មានទុក ឱ្យយើងទាំងអស់គ្នាត្រូវចេះរួមសុខរួមទុក្ខ ជួយទុក្ខធុរៈ សង្គ្រោះ និងសម្រាលទុក្ខលំបាកគ្នាទៅវិញទៅមកស្របពេលដែលបច្ចុប្បន្ន ពិភពលោកក៍ដូចជាប្រទេសកម្ពុជាកំពុងជួបនូវទុក្ខលំបាកយ៉ាងក្រៃលែងដោយសារវិបត្តិនៃជំងឺដ៍កាចសាហាវកូវីដ-១៩ កំពុងឆ្លងរាលដាលជាសាកល។
ជាមួយគ្នានោះដែរ ព្រះគ្រូវិចិត្រវង្សា ហែម គឹមសាន ក៍បានណែនាំដល់ក្រុមគ្រួសារសព និងពុទ្ធបរិស័ទទាំងអស់ដែលបានចូលរួមក្នុងពិធីបុណ្យសព អនុវត្តជាប្រចាំនូវវិធាន ៣កុំ និង ៣ការពារ របស់ប្រមុខរាជរដ្ឋាភិបាលកម្ពុជា និងសេចក្តីណែនាំផ្សេងៗរបស់ក្រសួងសុខាភិបាលផងដែរ៕
ព័ត៌មានជាតិ ថ្មីៗ
អត្ថបទ និង រូបភាព៖ លោក ទ្រា ពន្លឺ
កែសម្រួល៖ លោក ទ្រា ពន្លឺ
