ព្រះគ្រូចៅអធិការវត្តប្រាសាទគោកចក រួមជាមួយសប្បុរសជន និងក្រុមការងារយុវជនគណបក្សខេត្តសៀមរាប ចុះជួយមូលដ្ឋានស្រុកស្រីស្នំ បាននាំយកអំណោយជាគ្រឿងឧបភោគបរិភោគ និងបច្ច័យមួយចំនួន ទៅផ្តល់ជូនមណ្ឌលចត្តាឡីស័ក អនុវិទ្យាល័យមោង មណ្ឌលចត្តាឡីស័កបឋមសិក្សាត្រុំ និងប្រគេនដល់វត្តវេឡុវន្តដោកពោយគោកក្រោល កាលពីរសៀលថ្ងៃទី១៤ ខែសីហា ឆ្នាំ២០២១នេះ។ អំណោយជាសម្ភារគ្រឿងឧបភោគបរិភោគ និងថវិកា សរុបទាំង ៣ទីតាំងរួមមាន៖ អង្ករចំនួន ៥០០គីឡូក្រាម, ទឹកត្រីចំនួន ៨យួរ, ទឹកស៊ីអ៊ីវចំនួន ៨យួរ, ទឹកសុទ្ធចំនួន ១៥៣យួរ, ត្រីខចំនួន ៨យួរ, មីម៉ាម៉ាចំនួន ៦កេស, ទឹកក្រូចចំនួន ៦កេស, ស្ពៃចង្កឹះចំនួន ៣០គីឡូក្រាម, ស្ពៃក្រញ៉ាចំនួន ៣០គីឡូក្រាម, ម្រះចំនួន៣០គីឡូក្រាម, ផ្លែត្រឡាចមួយចំនួន, បច្ច័យចំនួន ៣០ម៉ឺនរៀល។ ដោយឡែក បច្ច័យប្រគេនដល់សមណសិស្ស ក្នុងវត្តវេឡុវ័នដោកពោយគោកក្រោល(វត្តគោកក្រោល) ចំនួន ៦០ម៉ឺនរៀល ក្នុងនោះមួយអង្គ ៣ម៉ឺនរៀល, សៀវភៅ ៥ក្បាល, ប៊ិច ២ដើម។
ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក មានសង្ឃដិកាថា អំណោយទាំងអស់នេះ គឺបានមកពីការប្រគេនរបស់ពុទ្ឋបរិស័ទក្នុងពិធីបុណ្យផ្សេងៗ នាពេលកន្លងមក ហើយក៏បានសន្សំ និងប្រមូលបម្រុងទុកសម្រាប់ចែកជូនគ្រួសារ ឬអាជ្ញាធរមូលដ្ឋានណាដែលជួបហានិភ័យដោយប្រការណាមួយដែលបានកើតឡើង សម្រាប់ដោះស្រាយការលំបាកមួយគ្រាៗ ទៅតាមលទ្ធភាពដែលយើងអាចធ្វើបាន។ កន្លងមក វត្តប្រាសាទគោកចកតែងតែនាំយកស្បៀងអាហារ និងថវិកាទោះតិចក្តីច្រើនក្តី ដើម្បីចែករំលែក និងផ្តល់ជូនដល់គ្រួសារដែលជួបហានិភ័យដោយសារជំងឺកូវិដ-១៩ ឬដោយសារគ្រោះធម្មជាតិជាដើម ដើម្បីជួយសម្រួលដល់ជីវភាព ក្នុងពេលខ្វះខាត។ ព្រះតេជគុណ មានសង្ឃដិកាបន្តថា យើងទាំងអស់គ្នាត្រូវចេះរួមសុខរួមទុក្ខ ជួយទុក្ខធុរ:សង្គ្រោះ និងសម្រាលទុក្ខលំបាកគ្នាទៅវិញទៅមក ក៏ដូចជាប្រទេសកម្ពុជាដែរ ដែលជួបនូវវិបត្តិដោយសារជំងឺដ៏កាចសាហាវ កំពុងតែឆ្លងរាលដាលជាសាកលនេះ។
ជាមួយគ្នានោះ លោក ហុង អេងគាង ប្រធានក្រុមការងារយុវជនគណបក្សស្រុកស្រីស្នំ បានថ្លែងអំណរគុណយ៉ាងជ្រាល ចំពោះសប្បុរសជន ដែលតែងតែយកចិត្តទុក្ខដាក់ និងចូលរួមចំណែកជាមួយរាជរដ្ឋាភិបាល ក៏ដូចជាពលរដ្ឋ ដែលកំពុងធ្វើចត្តាឡីស័ក្តនាពេលនេះ។ លោកបានអំពាវនាវថា យើងត្រូវរក្សាគម្លាត និងត្រូវបន្តបង្កើនការប្រុងប្រយ័ត្នខ្ពស់ និងយកចិត្តទុកដាក់បន្ថែមទៀត ដោយចូលរួមអនុវត្តតាមវិធានការរបស់ប្រមុខរាជរដ្ឋាភិបាល ៣ការពារ, ៣កុំ និង សេចក្តីណែនាំរបស់ក្រសួងសុខាភិបាលឲ្យបានគ្រប់ៗគ្នា។
ព័ត៌មានជាតិ ថ្មីៗ
គួរបញ្ជាក់ថា នៅស្រុកស្រីស្នំមានមណ្ឌលចត្តាឡីស័ក្តចំនួន ១០កន្លែង ក្នុងនោះមានបងប្អូនប្រជាពលរដ្ឋ និងពលករមកពីក្រៅប្រទេសកំពុងធ្វើចត្តាឡីស័ក្តប្រមាណជាង ១ពាន់នាក់។ ដោយឡែកប្រជាពលរដ្ឋ ដែលបានទទូលការចាក់សាំងការពារកូវីដ-១៩ ដូសទី០១ និងដូសទី០២ បានប្រមាណជាង ៧ពាន់នាក់រួចមកហើយ នៅឡើយតែដូសទី៣ កំពុងតែបន្តចាក់ថែមទៀត៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក លីវ សុខុន
