អង្គការសាលារៀនទន្សាយ ដោយមានការគាំទ្រពីអាជ្ញាធរស្រុកពួក ខេត្តសៀមរាប នៅព្រឹកថ្ងៃទី៣០ខែធ្នូឆ្នាំ២០២២នេះ បានធ្វើការដង្ហែរក្បួន នៅតាមដងផ្លូវ និងចែកខិតប័ណ្ណ ផ្សព្វផ្សាយឱ្យជនមានពិការភាពទាំងអស់ នៅក្នុងស្រុកពួកទៅចុះឈ្មោះចូលរៀន នៅតាមមូលដ្ឋាន ភូមិ ឃុំ ដែលនៅជិតបំផុត ដើម្បីទទួលបានការសិក្សារៀនសូត្រដូចអ្នកដែលមានការសប្បាទាគ្រប់គ្រាន់ ទទួលបានអត្តសញ្ញាណជនមានពិការភាពផងដែរ។
លោក ជួន សុភី ជាអ្នកសម្របសម្រួលតំបន់ស្រុកពួក នឹងតំណាងអង្គការសាលារៀនទន្សាយ បានឱ្យដឹងថា ការធ្វើយុទ្ធនាការនេះក្នុងគោលបំណង គឺទី១/ការលើកម្ពស់សិទ្ធិកុមារ ជាពិសេសកុមារដែលមានពិការភាព ទី២/ចង់ឱ្យអាជ្ញាធរជួយគាំទ្រផ្តល់សេវាសង្គម ដើម្បីឱ្យជនមានពិការភាពទទួលបានអត្តសញ្ញាណជនមានពិការភាព នឹងទី៣/ជាការផ្សព្វផ្សាយឱ្យជនមានពិការភាពមកចុះឈ្មោះចូលរៀន។លោកបានបន្តថា នៅក្នុងស្រុកពួកនេះ មានសាលាចំនួន០៥ ដែលទទួលឱ្យជនមានពិការភាពចូលរៀន ក្នុងនោះមានសាលាបឋមសិក្សាខ្នាត សាលាបឋមសិក្សា ទៀ បាញ់ គំរូ សាលាបឋមសិក្សាសរស្តម សាលាបឋមសិក្សាយាង នឹងសាលាបឋមសិក្សាអធិបតី។
អ្នកស្រី ឡម តាំ ជាប្រជាពលរដ្ឋនៅភូមិតាហុក ឃុំត្រីញ័រ ស្រុកពួក ខេត្តសៀមរាប បានឱ្យដឹងដែរថា អ្នកស្រីពិតជាមានការសប្បាយចិត្តជាខ្លាំងនៅពេលដែលអាជ្ញាធរ និងអង្គការបានបើកឱ្យជនមានភាពិការភាពបានចូលរៀនដូចមនុស្សទូទៅ។អ្នកស្រីបន្តថា កន្លងមកកូនរបស់គាត់ដែលជាជនមានពិការភាពហាក់ដូចជា ងងិតឈឹងជាជនពិការភាពហើយ មិនបានរៀនសូត្រទទួលបានចំណេះដឹងដូចមនុស្សទូទៅទៀត។ប៉ុន្តែឥឡូវនេះ កូនគាត់បានរៀនសូត្រហើយ រំពឹងថា នៅពេលខាងមុខគាត់នឹងមានចំណេះដឹង អាចធ្វើការងារបានផងដែរ។
លោក កើត គឿន ជាយុវជនម្នាក់ដែលមានពិការភាព បានឱ្យដឹងដែរថា បច្ចុប្បន្ននេះរាជរដ្ឋាភិបាល និងវិស័យឯកជនបានផ្តល់ឱកាសឱ្យជនពិការបានចូលបម្រើការងារផងដែរ។ប៉ុន្តែដើម្បីឱ្យជនមានពិការភាពទាំងអស់អាចឈានចូលទៅធ្វើការបាន ជនពិការទាំងអស់ត្រូវមានចំណេះដឹងជាមុន ដូចនេះការផ្តល់ឱកាសជនមានពិការភាពបានចូលរៀន គឺជាកត្តាដ៏សំខាន់។
លោកស្រី ឆែម សុធា អភិបាលរងស្រុកពួក ខេត្តសៀមរាប បានមានប្រសាសន៍ថា ការធ្វើយុទ្ធនាការផ្សព្វផ្សាយ គឺជាសកម្មភាពមួយដ៏ល្អ ហើយអាជ្ញាធរក៏សូមធ្វើការគាំទ្រ។ហើយអ្នកស្រីបានអំពាវនាវឱ្យមាតាបិតាដែលមានកូនជាជនមានពិការភាព សូមយកកូនមកចុះឈ្មោះចូលរៀន ដើម្បីធ្វើយ៉ាងណាឱ្យពួកគាត់ទទួលបានចំណេះដឹង និងជំនាញសម្រាប់បន្តការរស់ប្រចាំថ្ងៃរបស់ពួកគាត់កាន់តែមានភាពល្អប្រសើរ៕
អត្ថបទ និងវីដេអូ ៖ លោក ឃុត សៅ
