អង្គការមនុស្សធម៌មួយ ធ្វើការផ្នែកអប់រំ សុខភាព និងការសង់លំនៅឋាន នៅឃុំព្រះដាក់ ស្រុកបន្ទាយស្រី បានផ្ដល់ទឹកសេរ៉ូម ដល់មណ្ឌលសុខភាពនៅតាមឃុំចំនួន ៦ឃុំ នៅស្រុកបន្ទាយស្រី និងមណ្ឌលសុខភាពមួយឃុំទៀត នៅឃុំពាក់ស្នែក ស្រុកអង្គរធំ ខេត្ដសៀមរាប ដើម្បីជួយសម្រួលការខ្វះខាត នៅក្នុងមណ្ឌលសុខភាព។ ការផ្ដល់ជំនួយនេះធ្វើឡើង នៅសាលាស្រុកបន្ទាយស្រី និងមណ្ឌលសុខភាពឃុំពាក់ស្នែង ។
លោក យស់ សា ប្រធានសមាគម រួបរូមគ្នា ប្រឆាំងភាពក្រីក្រ ហៅកាត់ថា PAPA បានឱ្យដឹងនៅថ្ងៃនេះថា ជំនួយទាំងអស់នេះ គឺបានមកពីសប្បុរសជន នៃប្រទេសអូស្ត្រាលី និងសប្បជនឱសថស្ថានខ្មែរអង្គរ តាមរយ:សមាគមប៉ាប៉ា។ លោកបន្ដថា ទឹកសេរ៉ូបនេះ មានប្រាំប្រភេទ និងមានចំនួន ៣០កេសស្មើនឹងជាង ៧០០កំប្លោក ហើយក្នុងមួយមណ្ឌលសុខភាព នៅក្នុងស្រុកបន្ទាយស្រី ទទួលបាន ១០១កំប្លោក ខណ:ដែលមណ្ឌលសុខភាពនៅឃុំពាក់ស្នែងទទួលបាន ១០៨កំប្លោក។ លោកបានបន្ដថា ការផ្ដល់ទឹកសេរ៉ូមដល់មណ្ឌលសុខភាព នៅតាមឃុំនេះ ដើម្បីសម្រួលដល់សុខភាពប្រជាលរដ្ឋ នៅតាមជនបទ។ លោកបានបន្ថែមថា សេរ៉ូមនេះបន្ដិចបន្តួចមែន ប៉ុន្ដែវាបានជួយសម្រាលដល់ការខ្វះខាតរបស់មណ្ឌលសុខភាពខ្លះៗដែរ។ លោកបានបន្ថែមទៀតថា លោកនឹងបន្ដស្វែងរកជំនួយជាមួយសប្បុរសជនក្នុង និងក្រៅប្រទេសបន្ថែមទៀត ដើម្បីជួយដល់ប្រជាពលរដ្ឋខ្វះខាត។ លោកថា កន្លងមក សមាគមនេះ ក្រៅពីផ្ដល់សេរ៉ូមដល់មន្ទីរពេទ្យ ក៏បានផ្ដល់នូវស្បៀងអាហារ សាងសង់លំនៅឋានដល់ប្រជាលរដ្ឋ ដែលខ្វះខាត និងសាងសង់មណ្ឌលភាពមួយកន្លែងនៅឃុំព្រះដាក់ផងដែរ។
បើតាមអាជ្ញាធរស្រុកបន្ទាយស្រី និងតំណាងមណ្ឌលសុខភាពឃុំពាក់ស្នែង ស្រុកអង្គរធំ បានសម្ដែងការសប្បាយចិត្ដ និងថ្លែងអំណរគុណនូវជំនួយសេរ៉ូមជាង ៦រយកំប្លោកនេះ ខណ:ដែលនៅតាមមណ្ឌលសុខភាពក្នុងឃុំនីមួយៗ មានតម្រូវថ្នាំពេទ្យខ្ពស់ សម្រាប់ជួយសេវាសុខាភាពប្រជាពលរដ្ឋ។ ការផ្ដល់ជំនួយនេះ គឺជាកិច្ចសហការល្អ រវាងអង្គការសង្គមស៊ីវិល និងអាជ្ញាធរដែនដី ដែលជាដៃគូមិនអាចខ្វះបាន។ អាជ្ញាធរទាំងពីរនេះ ក៏បានអំពាវដល់សប្បុរជន ក៏ដូចជាអង្គរកៅរដ្ឋាភិបាល ធ្វើការសហការគ្នា ក្នុងការស្វែងរកជំនួយសប្បុរសធម៌ ជូនដល់សហគមនានា ដែលកំពុងខ្វះខាត បើទោះបីតិចតួច ឬច្រើនក្ដី គឺជាគុណតម្លៃដ៏ធំធេង សម្រាប់បំរើសុខភាពឱ្យប្រជាជននៅមូលដ្ឋាន៕
អត្ថបទ និងរូបភាព: លោកបូ សាវី តែសម្រួលដោយ លីវ សុខុន!!!