នៅព្រឹកថ្ងៃទី០២ ខែមករា ឆ្នាំ២០២៣នេះ មន្ទីរព័ត៌មានខេត្ដសៀមរាប បានបើកកិច្ចប្រជុំបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារអនុវត្ដសម្រាប់ឆ្នាំ២០២៣នេះ ដើម្បីបង្ហាញលទ្ធផលការងារដែលសម្រេចបាន ក៏ដូចជាការដកពិសោធន៍ កែលម្អ ការផ្លាស់ប្ដូរបច្ចេកទេស និងពិនិត្យ ដោះស្រាយបញ្ហាប្រឈមនានាដែលបានជួយប្រទះកន្លងមក ក្រោមការដឹកនាំរបស់ឯកឧត្ដម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្ដ ។
ឯកឧត្ដម លីវ សុខុន ប្រធានមន្ទីរព័ត៌មានខេត្ដ មានប្រសាសន៍ថា កិច្ចប្រជុំនាពេលពេលនេះ ដើម្បីបូកសរុបនូវលទ្ធផលការងារដែលសម្រេចបានក្នុងឆ្នាំ២០២២ កន្លងមក ក្នុងនោះត្រូវរកឲ្យឃើញនូវបញ្ហាប្រឈមដែលបានធ្វើឱ្យរាំងស្ទះដល់កិច្ចប្រតិបត្តិការ ផ្សព្វផ្សាយព័ត៌មាន សម្រាប់ធ្វើការកែលម្អក្នុងការអនុវត្តបន្តក្នុងឆ្នាំ២០២៣នេះ ឲ្យទទួលបានលទ្ធផលផ្លែផ្កាជាវិជ្ជមាន ទាំងប្រសិទ្ធភាព និង គុណភាព ជាពិសេសការងារចុះយកព័ត៌មាន ផលិតព័ត៌មាន និងផ្សព្វផ្សាយព័ត៌មាន ឆ្លើយតបនឹងការរីកចម្រើនផ្នែកបច្ចេកវិទ្យាលើវិស័យព័ត៌មានក្នុងបរិបទដែលពិភពលោក កំពុងមានការវិវត្តន៍យ៉ាងឆាប់រហ័សនេះ ។
ឯកឧត្ដម លីវ សុខុន បន្តថា ពីមួយឆ្នាំទៅមួយឆ្នាំ មន្ត្រីរបស់យើងបានធ្វើសកម្មភាពខ្លាំងលើគ្រប់ផ្នែកទាំងអស់ ជាពិសេសផ្នែកចុះយកព័ត៌មាន ផលិតព័ត៌មាន និងផ្សព្វផ្សាយព័ត៌មាន ក្នុងនោះ៖ មន្រ្តីការិយាល័យវិទ្យុ ចុះយកព័ត៌មាន បានចំនួន៧,៤៩៥លើក មានការកើនឡើង ៧,៤០ភាគរយ ធៀបទៅនឹងឆ្នាំ២០២១ ដែលមានចំនួន ៧,៣១៨លើក , ផលិតអត្ថបទព័ត៌មាន បានចំនួន៨,៦៩០ អត្ថបទព័ត៌មាន កើនឡើង ៨,៥៩ភាគរយ ធៀបទៅនឹងឆ្នាំ២០២១ ដែលមានចំនួន ៨,៣៣៨ អត្ថបទព័ត៌មាន និង ផ្សព្វផ្សាយព័ត៌មាន បានចំនួន១៨.៩៤១ អត្ថបទព័ត៌មាន កើនឡើង ១៤,២៥ភាគរយ ធៀបទៅនឹងឆ្នាំ២០២១ ដែលមានចំនួន ១៦.២៤១ អត្ថបទព័ត៌មាន ។
ឯកឧត្ដម លីវ សុខុន បន្តថា សម្រាប់ការិយាល័យវិទូរទស្សន៍ បានចុះយកព័ត៌មានចំនួន៧,៥២៦លើក កើនឡើង ៧,៤៣ភាគរយ ធៀបទៅនឹងឆ្នាំ២០២១ ដែលមានចំនួន ៧,៣១៨លើក , ផលិតអត្ថបទព័ត៌មាន បានចំនួន៨,៧៦៨ អត្ថបទព័ត៌មាន កើនឡើង ៨,៦៧ភាគរយ បើប្រៀបធៀបទៅនឹងឆ្នាំ២០២១ ដែលមានចំនួន ៨,៦៧១ អត្ថបទព័ត៌មាន និង ផ្សព្វផ្សាយព័ត៌មាន បានចំនួន៣៦.១៣៦ អត្ថបទព័ត៌មាន កើនឡើង ៣៧,៦៥ភាគរយ ធៀបទៅនឹងឆ្នាំ២០២០ ដែលមានចំនួន ២២.៥២៩ អត្ថបទព័ត៌មាន ។
ឯកឧត្ដម លីវ សុខុន បន្តទៀតថា កិច្ចប្រជុំគឺជារបបអាហារឋាមពលដែលមិនអាចខ្វះបាន សម្រាប់ពង្រឹង និងបំប៉នប្រព័ន្ធការងារក្នុងអង្គភាព ឈានឆ្ពោះទៅរកគៅលដៅ ប្រកបដោយនិរន្តរភាព និងមាននវានុវត្តន៍បានល្អប្រសើរ ដូច្នេះក្នុងឱកាសនេះ សូមមន្ដ្រីក្រោមឱវាទទាំងអស់ ត្រូវសាមគ្គីភាពគ្នាឲ្យកាន់តែប្រសើរឡើង និង ត្រូវខិតខំបំពេញការងារឱ្យខ្លាំងក្លាបន្ថែមទៀត ស្របតាមទិសដៅរបស់មន្ទីរដែលបានដាក់ចេញគឺ ជំរុញការចុះយកព័ត៌មាន ផលិតព័ត៌មាន ផ្សព្វផ្សាយព័ត៌មាន ឲ្យបានគ្រប់ព្រឹត្តិការណ៍ទាំងអស់និងតាមដានព័ត៌មានក្នុងខេត្ត និង ការបង្កើនសកម្មភាពផ្សព្វផ្សាយតាមវិទ្យុ FM ជាតិនគរភ្នំ និង ទូរទស្សន៍ជាតិខេត្តសៀមរាប ឲ្យបានទូលំទូលាយ ព្រមទាំងបន្តសហប្រតិបត្តិការ ផ្សព្វផ្សាយវិទ្យុមិត្តភាព កម្ពុជា-ចិន វិទ្យុមិត្តភាពកម្ពុជា-ថៃ ផ្សព្វផ្សាយជា( Twin Radio ) និងវិទ្យុ-ទូរទស្សន៍ឯកជនក្នុងខេត្ត ឲ្យបានជាអតិបរិមា ។
ឯកឧត្ដមប្រធានមន្ទីរព័ត៌មានខេត្ដសៀមរាប បានក្រើនរំលឹកដល់មន្ត្រីក្រោមឱវាទ ត្រូវយល់ដឹងអំពីក្រមសីលធម៌វិជ្ជាជីវៈអ្នកសារព័ត៌មាន ស្របតាមប្រសាសន៍ដ៏ខ្ពង់ខ្ពស់ របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺកុំបំពានអ្នកដទៃ កុំបំភ្លៃការពិត ដែលវាជាយ័ន្តដ៏ស័ក្ដិសិទ្ធិមួយ ក្នុងការការពារកំហុសរបស់អ្នកសារព័ត៌មាន ពិសេសត្រូវយល់ដឺងពីអ្វីជាគោលដៅរបស់ស្ថាប័នព័ត៌មាន សម្រាប់ការលើកកម្ពស់គុណភាពសេវាផ្តល់ព័ត៌មាន និងការអប់រំសង្គម ជូនប្រជាពលរដ្ឋឲ្យកាន់តែប្រសើរឡើង ៕
អត្ថបទ ៖ លោក អ៊ុន ណារាជ្យ
កែសម្រួលអត្ថបទ ៖ លោក លីវ សាន្ត
