នៅព្រឹកថ្ងៃទី០២ ខែមករា ឆ្នាំ២០២៣នេះ លោក អ៊ឹង គឹមលាង អភិបាលរងខេត្តសៀមរាប បានអញ្ជើញជាអធិបតីក្នុងពិធីបើកបវេសនកាលឆ្នាំសិក្សាថ្មី ២០២២.២០២៣ នៅវិទ្យាល័យ ១០មករា ១៩៧៩ ខេត្តសៀមរាប រួមជាមួយវត្តមានថ្នាក់ដឹកនាំមន្ទីរ អង្គភាពពាក់ព័ន្ធ មន្ត្រីរាជការ គណៈគ្រប់គ្រងសាលា លោកគ្រូអ្នកគ្រូ សិស្សានុសិស្ស តំណាងមាតាបិតាអាណាព្យាបាលសិស្សជាច្រើនរូប។
ជាមួយគ្នានោះដែរនាព្រឹកនេះ នៅគ្រប់បណ្តាគ្រឹះស្ថានសិក្សាទាំងអស់ក្នុងខេត្តសៀមរាប ក៏មានរៀបចំធ្វើក្បួនដង្ហែរទៅតាមដងវិថីនានា ដោយមានការរំលេចនូវ បដារពាក្យស្លោកធំៗ នៅតាមក្បួនដង្ហែរ ព្រមទាំងមានការលាយឡំនូវសម្រែកជ័យឃោសរបស់សិស្សានុសិស្ស បង្កប់នូវខ្លឹមសារអត្ថន័យ ក្នុងការលើកស្ទួយ និងអភិវឌ្ឍន៍វិស័យអប់រំ ដើមី្បធានានូវគុណភាពនៃការបណ្តុះបណ្តាលធនធានមនុស្សដែលជាទំពាំងស្នងឬសី្ស នៃប្រទេសជាតិទៅថ្ងៃអនាគត។
លោក អ៊ឹង គឹមលាង មានប្រសាសន៍ថា យើងត្រូវយកចិត្តទុកដាក់ទាំងអស់គ្នា ដើម្បីធ្វើជាត្រីវិស័យតម្រង់ទិសក្នុងការអប់រំបណ្តុះបណ្តាលធនធានមនុស្ស ក្នុងបរិការណ៍នៃសង្គមពុទ្ធិ និងសំដៅត្រៀមលក្ខណៈឲ្យបានល្អ និងបន្តផ្តោតការយកចិត្តទុកដាក់ដល់ការប្រមូលកុមារឲ្យបានចូលរួមគ្រប់ៗគ្នា ទោះបីជាពួកគេស្ថិតនៅទីណា រស់ក្នុងស្ថានភាពបែបណាក៏ដោយពោល គឺត្រូវទៅឲ្យដល់កន្លែងណាដែលយើងទៅមិនទាន់ដល់ សំខាន់តំបន់ដាច់ស្រយាល ដោយអនុវត្តតាមទិសស្លោក «សាលារៀនស្វែងរកកុមារ» ដើមី្បបង្កលក្ខណៈងាយស្រួលដល់កុមារ ទទួលបានការអប់រំប្រកបដោយសមធម៌។ ជាមួយគ្នានោះ ត្រូវជម្រុញឲ្យមានការចូលរួមពីគ្រប់ភាគីពាក់ព័ន្ធ ជាពិសេសមាតាបិតា អ្នកអាណាព្យាបាលសិស្ស ក្នុងការបង្កើតបរិស្ថានរៀនសូត្រដល់សិស្សានុសិស្ស ឲ្យប្រកបដោយផាសុកភាពទាំងផ្លូវកាយ និងផ្លូវចិត្តពោល គឺប្រែក្លាយសាលារៀនជាសាលាកុមារមេត្រី និងដើម្បីឲ្យកុលបុត្រ កុលធីតាខ្មែរបានទទួលការអប់រំ សមស្របតាមបាវចនាសម្រាប់ការងារអប់រំរបស់យើង ដែលបានលើកឡើងថា «ការអប់រំសម្រាប់ទាំងអស់គ្នា ទាំងអស់គ្នាដើម្បីការអប់រំ » និងចូលរួមយ៉ាងសកម្ម ក្នុងការជួយអប់រំកូនចៅឲ្យបានល្អ ទាំងផ្នែកសុខភាព ចំណេះដឹង និងសីលធម៌ ដើម្បីបន្តលើកកម្ពស់កិត្តិយសសង្គមជាតិ ស័ក្តិសមជាប្រជាពលរដ្ឋ ដែលមានឈាមជ័រតភ្ជាប់ពីសម័យអង្គរដ៏រុងរឿងនៃយើង។
លោកអភិបាលរងខេត្ត ក៏បានធ្វើការផ្តាំផ្ញើដល់លោកគ្រូអ្នកគ្រូ សូមឲ្យយកចិត្តទុកដាក់ខ្ពស់ក្នុងការបង្ហាត់បង្រៀនសិស្ស មិនត្រូវគិតពីផលប្រយោជន៍ផ្ទាល់ខ្លួន ដែលធ្វើឲ្យប៉ះពាល់កេរ្តិ៍ឈ្មោះរបស់មន្ត្រីអប់រំ ព្រមទាំងលើកកម្ពស់សីលធម៌សង្គម និងជម្រុញដល់សិស្សានុសិស្សខិតខំរៀនសូត្រ ឲ្យទទួលបានលទ្ធផលល្អ នៅពេលបំណាច់ឆ្នាំសិក្សា ឬនិទ្ទេស A នៅពេលប្រឡងបញ្ចប់មធ្យមសិក្សាទុតិយភូមិ ដែលកន្លងមកវិទ្យាល័យ១០មករា ១៩៧៩នេះ ក៏ទទួលបានកេរ្តិ៍ឈ្មោះ ចំណាត់ថ្នាក់លេខ២ នៅទូទាំងប្រទេស និងសូមឲ្យក្មួយៗសិស្សានុសិស្សទាំងអស់ រក្សានូវប្រពៃណី កេរ្តិ៍ឈ្មោះវិទ្យាល័យ ១០ មករា ១៩៧៩ បន្តដល់សិស្សជំនាន់ក្រោយ និងគោរពឲ្យបាននូវច្បាប់ចរាចរណ៍ នៅក្នុង ពេលបើកបរ ត្រូវពាក់មួកសុវត្ថិភាព និង ដាក់ខែ្សក្រវ៉ាត់សុវត្ថិភាព ព្រមទាំងចាកចេញឲ្យឆ្ងាយពីគ្រឿងញៀនទៀតផង៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ អ៊ុន ណារាជ្យ
