កាលពីរសៀលថ្ងៃទី០៣ ខែមករា ឆ្នាំ២០២៣ នៅសាលាពលទាហានទី៤ ស្ថិតក្នុងឃុំខ្នារសណ្ដាយ ស្រុកបន្ទាយស្រី ខេត្តសៀមរាប មានរៀបចំពិធីបិទវគ្គហ្វឹកហ្វឺនបំប៉នបុគ្គលិកជំនាញ ភស្តុភា ហិរញ្ញវត្ថុ និងយន្តយុទ្ធ ដល់បណ្តាអង្គភាព ចំណុះយោធភូមិភាគទី៤ ក្រោមអធិបតីភាព ឧត្តមសេនីយ៍ទោ សុក រីនណា មេបញ្ជាការរង នាយសេនាធិការ យោធភូមិភាគទី៤។
មានមតិក្នុងឱកាសនោះ ឧត្តមសេនីយ៍ត្រី ឈឹង សារុន នាយកសាលាពលទាហានទី៤ បញ្ជាក់ថា វគ្គហ្វឹកហ្វឺន ដែលមានរយៈពេល ២៥ថ្ងៃនេះ គឺជាការពង្រឹងសមត្ថភាព ជូនដល់បុគ្គលិកជំនាញ នៃបណ្តាកងឯកភាពចំណុះយោធភូមិភាគទី៤ ឱ្យកាន់តែយល់ច្បាស់ ទៅជំនាញជាច្រើនរួមមាន ស្បៀង យោធបរិក្ខា ប្រេង ដឹកជញ្ជូន និងផែនការធានា ការគ្រប់គ្រងបើកចែក និងគណនេយ្យ ការគ្រប់គ្រងសម្ភារៈបច្ចេកទេស និងធានាបច្ចេកទេស ព្រមទាំងលក្ខណៈបច្ចេកទេសអាវុធថ្មើរជើង ដើម្បីបម្រើដល់ការងារធានាប្រយុទ្ធឱ្យទទួលបានជោគជ័យ។
តាមរយៈការឡើងប្ដេជ្ញារបស់តំណាងកម្មសិក្សាការី ក្រោយពីបញ្ចប់វគ្គហ្វឹកហ្វឺននេះ កម្មសិក្សាការីទាំងអស់នឹងគោរពប្រតិបត្តិឱ្យបានស្របតាមរដ្ឋធម្មនុញ្ញនៃព្រះរាជាណាចក្រកម្ពុជា លក្ខន្តិកៈវិន័យទូទៅ និងវិន័យផ្ទៃក្នុងនៃកងយោធពលខេមរភូមិន្ទឱ្យបានជាដាច់ខាត និងជៀសវាងឱ្យឆ្ងាយពីការប្រើប្រាស់គ្រឿងញៀនគ្រប់ប្រភេទ ស្មោះត្រង់ដាច់ខាត ចំពោះរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំដ៏ឈ្លាសវៃ។
ព័ត៌មានជាតិ ថ្មីៗ
ថ្លែងក្នុងពិធីបិទនេះដែរ ឧត្តមសេនីយ៍ទោ សុក រីនណា បានផ្តាំផ្ញើរដល់ មេបញ្ជាការ មេបញ្ជាការរង យោធាចារ្យ នាយទាហាន នាយទាហានរង ពលទាហាន និងកម្មសិក្សាការីទាំងអស់ ត្រូវប្រើប្រាស់ចំណេះជំនាញដែលខ្លួនមាន បម្រើដល់ប្រយោជន៍អង្គភាព និងប្រទេសជាតិ ព្រមទាំងគោរពវិន័យកងទ័ព ស្មោះត្រង់ចំពោះរដ្ឋធម្មនុញ្ញ ជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់ ដែលប្រសូត្រចេញពីការបោះឆ្នោតដ៏ត្រឹមត្រូវ និងប្រកាសគាំទ្រឯកឧត្តមបណ្ឌិត ហ៊ុន ម៉ាណែត ធ្វើជាបេក្ខភាពនាយរដ្ឋមន្ត្រីនាពេលអនាគត។
សូមជម្រាបថា សមាសភាពដែលបានចូលរួមក្នុងវគ្គហ្វឹកហ្វឺននេះ រួមមាន គណៈគ្រប់គ្រងវគ្គចំនួន ០៧នាក់ យោធាចារ្យចំនួន ១០នាក់ ផ្នែកបម្រើការចំនួន ០៧នាក់ និងកម្មសិក្សាការីទាំងបីជំនាញសរុបចំនួន ២១១នាក់ ក្នុងនោះសម្រាប់ជំនាញភស្តុភា ពិន្ទុល្អមានចំនួន ៥១នាក់ ស្មើនឹង ៧៥ភាគរយ ពិន្ទុល្អបង្គួរមានចំនួន ១៣នាក់ ស្មើនឹង ១៩.១១ភាគរយ ពិន្ទុមធ្យមមានចំនួន ០៤នាក់ ស្មើនឹង ៥.៨៨ភាគរយ។ រីឯ ជំនាញហិរញ្ញវត្ថុ ពិន្ទុល្អមានចំនួន ២៨នាក់ ស្មើនឹង ៣៧.៣៤ភាគរយ ពិន្ទុល្អបង្គួរមានចំនួន ៣៤នាក់ ស្មើនឹង ៤៥.៣៣ភាគរយ ពិន្ទុមធ្យមមានចំនួន ១៣នាក់ ស្មើនឹង ១៧.៣៣ភាគរយ និង ជំនាញយន្តយុទ្ធ ពិន្ទុល្អមានចំនួន ១៩នាក់ ស្មើនឹង ២៧.៩៤ភាគរយ ពិន្ទុល្អបង្គួរមានចំនួន ២១នាក់ ស្មើនឹង ៣០.៨៨ភាគរយ និងពិន្ទុមធ្យមមានចំនួន ២៨នាក់ ស្មើនឹង ៤១.១៧ភាគរយ៕
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
