នៅរសៀលថ្ងៃទី៤ ខែមករា ឆ្នាំ២០២៣ នៅសាលាស្រុកសូទ្រនិគម មានរៀបចំពិធីផ្ទេរភារកិច្ច និងតែងតាំងអភិបាលស្រុកថ្មី ក្រោមអធិបតីភាព ឯកឧត្តម ទៀ សីហា អភិបាលខេត្តសៀមរាប និងមានការអញ្ជើញចូលរួមពីបណ្ដាមន្ទីរ អង្គភាព កងកម្លាំងទាំង៣ និងមន្ត្រីគ្រប់លំដាប់ថ្នាក់នៃរដ្ឋបាលស្រុកផងដែរ។
ថ្លែងក្នុងឱកាសនោះ ឯកឧត្តម ទៀ សីហា បញ្ជាក់ថា៖ ការតែងតាំងអភិបាលស្រុកថ្មីនាពេលនេះ គឺដើម្បីបង្កើននូវប្រសិទ្ធភាពការងារដឹកនាំ ចាត់ចែង និងគ្រប់គ្រង ដែលជំរុញដល់ការអភិវឌ្ឍមូលដ្ឋាន ព្រមទាំងផ្តល់សេវាសាធារណៈកាន់តែឆាប់រហ័ស ដែលឆ្លើយតបទៅនឹងតម្រូវការរបស់ប្រជាពលរដ្ឋនៅទូទាំងស្រុកសូទ្រនិគម។
ជាមួយនោះ ឯកឧត្តម អភិបាលខេត្ត ក៏បានផ្តល់អនុសាសន៍៨ចំណុច ដើម្បីជំរុញការងារដឹកនាំ ចាត់ចែង និងគ្រប់គ្រង របស់រដ្ឋបាលស្រុកឱ្យកាន់តែមានប្រសិទ្ធភាព រួមមាន៖
ទី១- ត្រូវជំរុញប្រជាពលរដ្ឋទៅចាក់វ៉ាក់សាំងការពារជំងឺកូវីដ-១៩ ឱ្យបានគ្រប់ៗគ្នា និងអនុវត្តវិធានការរបស់ក្រសួងសុខាភិបាលឱ្យបានខ្ជាប់ខ្ជួន។
ទី២- ត្រូវបន្តរួមគ្នាថែរក្សា ការពារសន្តិភាព ស្ថិរភាពនយោបាយ និងសង្គម ឲ្យបានល្អប្រសើរ ដើម្បីត្រៀមលក្ខណៈក្នុងការរៀបចំបោះឆ្នោតជ្រើសតាំងតំណាងរាស្រ្តនីតិកាលទី៧ នៃរដ្ឋសភា ដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ នាពេលខាងមុខនេះ។
ទី៣- ត្រូវបន្តខិតខំលើកកម្ពស់ការរក្សាសន្តិសុខ សណ្តាប់ធ្នាប់សាធារណៈនៅទូទាំងស្រុក ដោយជំរុញការផ្សព្វផ្សាយគោលនយោបាយភូមិ ឃុំ មានសុវត្ថិភាពទាំង០៧។
ទី៤- ត្រូវបន្តជំរុញការអភិវឌ្ឍសេដ្ឋកិច្ចសង្គមលើគ្រប់វិស័យ និងខិតខំលើកកម្ពស់ជីវភាពរស់នៅរបស់ប្រជាជន តាមរយៈការផ្តល់សេវានៅការិយាល័យច្រកចេញចូលតែមួយ និងយន្តការច្រកចេញចូលតែមួយរបស់រដ្ឋបាលឃុំ ព្រមទាំងខិតខំសម្របសម្រួលដោះស្រាយបញ្ហាប្រឈមនានាដែលនៅសេសសល់។
ទី៥- ត្រូវបន្តជំរុញការដោះស្រាយវិវាទក្រៅប្រព័ន្ធតុលាការនៅមូលដ្ឋាន ដើម្បីកាត់បន្ថយការចំណាយពេលវេលា និងធនធានរបស់ប្រជាពលរដ្ឋ ព្រមទាំងបន្តណែនាំដល់ប្រជាពលរដ្ឋ ចៀសវាងការកាប់ទន្ទ្រានដីព្រៃលិចទឹកនៅតំបន់៣ នៃបឹងទន្លេសាបបន្តទៀត ក្រៅពីដី ដែលរដ្ឋបាលស្រុកគ្រោងស្នើសុំកាត់ខ្វៀលជូនពួកគាត់ ។
ទី៦- ត្រូវបន្តជំរុញអនុវត្តន៍កម្មវិធីកំណែទម្រង់នានា របស់រាជរដ្ឋាភិបាលឲ្យមានវឌ្ឍនភាពតាមផែនការកំណត់ ជាពិសេសត្រូវត្រៀមសហការអនុវត្តន៍ជាមួយក្រុមការងារថ្នាក់ជាតិ ខេត្ត ស្រុក និងឃុំ លើការត្រួតពិនិត្យ គាំទ្រកម្មវិធីនយោបាយ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលកម្ពុជា ក្នុងការកែទម្រង់ស៊ីជម្រៅក្នុងអាណត្តិទី៦នេះ។
ទី៧- ត្រូវពង្រឹងការគ្រប់គ្រងមន្រ្តីក្រោមឱវាទ ដោយត្រូវអនុវត្តស្របតាមតួនាទី ភារកិច្ច របស់ការិយាល័យនានាចំណុះរដ្ឋបាលស្រុក សំដៅបង្កើនប្រសិទ្ធភាពការងារ និងខិតខំពង្រឹងកិច្ចការនៃការិយាល័យផែនការ និងគាំទ្រឃុំ ដើម្បី ត្រៀមលក្ខណៈសម្បត្តិជាមុន ក្នុងការអនុវត្តមុខងារ និងធនធាន ដែលនឹងត្រូវផ្ទេរ ទៅក្នុងវិស័យជាអាទិភាពមួយចំនួន នាពេលខាងមុខនេះ។ ទន្ទឹមនោះ ថ្នាក់ដឹកនាំសាលាស្រុក ត្រូវបន្តយកចិត្តទុកដាក់សហការជាមួយទីចាត់ការនានាចំណុះសាលាខេត្ត ដើម្បីធ្វើការបណ្តុះបណ្តាលមន្រ្តីក្រោមឱវាទ ឲ្យមានសមត្ថភាពគ្រប់គ្រាន់ក្នុងការអនុវត្តតួនាទី ភារកិច្ចរបស់ខ្លួនបានកាន់តែល្អប្រសើរ ។
ទី៨- ត្រូវពង្រឹងស្មារតីសាមគ្គីភាព ឯកភាពផ្ទៃក្នុងឲ្យបានល្អនៅក្នុងក្រុមប្រឹក្សា គណៈអភិបាល មន្រ្តីរាជការ និងកងកម្លាំងមានសមត្ថកិច្ចគ្រប់លំដាប់ថ្នាក់ ដោយឈរលើមូលដ្ឋាននៃការលើកកម្ពស់ប្រសិទ្ធភាពការងារ ការគោរពច្បាប់ គោរពគោលការណ៍នានារបស់រដ្ឋ ពង្រឹងរបៀបរបបធ្វើការ ពិសេសអនុវត្តន៍តាមអភិក្រមទាំង៥ (១.ឆ្លុះកញ្ចក់ ២.ងូតទឹក ៣.ដុសក្អែល ៤.ព្យាបាល និង៥.វះកាត់) របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដើម្បីលើកកម្ពស់ការទទួលខុសត្រូវ និងភាពជាម្ចាស់របស់មន្រ្តីនៅក្នុងការបំពេញតួនាទី និងភារកិច្ច សំដៅអភិវឌ្ឍមូលដ្ឋាន និងឆ្លើយតបចំពោះតម្រូវការរបស់ប្រជាពលរដ្ឋក្នុងដែនសមត្ថកិច្ចរបស់ខ្លួន។
គួរជម្រាបថា លោក ម៉ក់ប្រុស ត្រូវផ្ទេរតួនាទីពីអភិបាលស្រុកសូទ្រនិគម ឱ្យទៅបម្រើការនៅរដ្ឋបាលខេត្តសៀមរាប និងតែងតាំងលោក គិម វណ្ណៈ ជាអភិបាលស្រុកសូទ្រនិគមថ្មី។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
