ការអភិវឌ្ឍរីកចំរើនលើគ្រប់វិស័យនៅក្នុងប្រទេសកម្ពុជា មកដល់ពេលបច្ចុប្បន្ននេះ គឺមិនមែនកើតឡើងដោយសារភាពចៃដន្យនោះទេ គឺដោយមានការខិតខំប្រឹងប្រែងរបស់រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជាមគ្គុទេសដឹកនាំដ៏ពិនប្រសព្វ ជាមួយនឹងការលះបង់នូវរាល់ឈាមស្រស់ សាច់ស្រស់របស់វីរៈជនខ្មែរគ្រប់រូបដែលបានរំដោះជាតិមាតុភូមិកម្ពុជា ឱ្យរួចផុតពីរបបប្រល័យពូជសាសន៍ប៉ុលពត។
ថ្លែងក្នុងឱកាសអបអរសាទរខួបលើកទី៤៤ នៃថ្ងៃរំដោះ ៧មករា នៅឃុំពាក់ស្នែង ស្រុកអង្គរធំ ខេត្ដសៀមរាប ឯកឧត្ដម ស ថាវី អនុរដ្ឋលេខាធិការក្រសួងការពារជាតិ មានប្រសាសន៍ថា ក្រោយថ្ងៃរំដោះ ៧មករា ១៩៧៩ ប្រទេសកម្ពុជាមិនទាន់មានសុខសន្ដិភាពពេញលេញនៅឡើយទេ។ ហើយតំបន់ឃុំពាក់ស្នែង ស្រុកអង្គរធំ គឺជាតំបន់ភ្លើងសង្គ្រាម គ្មានផ្លូវថ្នល់ ទឹកភ្លើង ពោលមិនទាន់មានការអភិវឌ្ឍឱ្យបានពេញលេញនៅឡើយទេ ដោយប្រជាពលរដ្ឋមិនអាចធ្វើដំណើរឆ្លងកាត់ទីនោះបានស្រួលនោះទេ។ ប៉ុន្ដែចាប់ពីឆ្នាំ១៩៩៨មក ក្រោមនយោបាយឈ្នះៗ របស់រាជរដ្ឋាភិបាលកម្ពុជា ទើបកម្ពុជាមានសុខសុខសន្ដិភាពពេញលេញ ប្រជាពលរដ្ឋមានសិទ្ធិសេរីភាពដើរហើយគ្រប់ទីកន្លែង ដែលមកដល់ពេលនេះ ប្រទេសកម្ពុជាមានការអភិវឌ្ឍរីកចំរើនគ្រប់វិស័យ ដែលនេះជាស្នាដៃថ្ងៃ ៧មករា មិនមែនការរីកចំរើននោះកើតឡើងដោយសារចៃដន្យនោះទេ។
ឯកឧត្ដម អនុរដ្ឋលេខាធិការ មានប្រសាសន៍ទៀតថា ជាក់ស្ដែងឃុំពាក់ស្នែង ក៏ត្រូវបានសម្ដេចតេជោ នាយករដ្ឋមន្ដ្រី បានប្រកាសធ្វើជាកន្លែងអភិវឌ្ឍន៍ឱ្យក្លាយជាទីក្រុងទីប្រជុំជនដ៏ធំ សម្រាប់ប្រជាពលរដ្ឋរស់នៅផងដែរ។ ជាមយយគ្នានោះគោលនយោបាយឈ្នះ ឈ្នះ របស់សម្ដេចតេជោ ហ៊ុន សែន គឺជាយុទ្ធសាស្ត្រគោលការណ៍ទាំងឡាយណា ដែលបាននាំមកនូវការធានា ដល់សន្តិសុខសង្គម ការបង្រួបបង្រួមជាតិ ឯកភាពជាតិ សនិ្តភាព ការធានាដល់បូរណភាពដែនដី អធិបតេយ្យ និងការអភិវឌ្ឍសេដ្ឋកិច្ច នយោបាយសង្គមប្រកបដោយចីរភាព។ ក្នុងន័យនេះ ឯកឧត្ដម សូមអំពាវនាវឱ្យប្រជាពលរដ្ឋនាំគ្នាខិតខំថែរក្សាសន្តិភាព ឲ្យបានគង់វង្ស ដោយប្រកាសប្រឆាំងយ៉ាងដាច់ខាត ចំពោះទង្វើណាក៏ដោយ ដែលរារាំងដល់ការអភិវឌ្ឍន៍ និងសន្ដិភាព ដែលមាននាពេលបច្ចុប្បន្ននេះ ដើម្បីគុណប្រយោជន៍ដល់ប្រជាពលរដ្ឋរស់នៅប្រកបដោយភាពសុខសាន្ត និងការអភិវឌ្ឍជារៀងរហូតទៅ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
