តំណាងប្រជាកសិករក្នុងភូមិជ្រៃខាងជើង ឃុំគៀនសង្កែ ស្រុកសូទ្រនិគម អ្នកស្រី ថៃ សូដា បានឲ្យដឹងថា មុខរបរដាំបន្លែនៅលើធ្នើ បានធ្វើឲ្យពួកគាត់ចាករួចផុតពីបញ្ជីឈ្មោះ ពលរដ្ឋក្រីក្រ ដោយកាលពីមុនបើទោះបីជាគ្រួសារអ្នកស្រី និងប្រជាពលរដ្ឋដទៃទៀតបានប្រកបរបរដាំបន្លែក្តី ក៏ពួកគាត់ត្រូវបានគេវាយតម្លៃថា ជាពលរដ្ឋក្រីក្រ ដោយទទួលបានប័ណ្ណសមធម៌ប្រភេទ “ក្រ១” “ក្រ២” ដែល។
អ្នកស្រីបន្តថា កាលពីមុនការដាំបន្លែរបស់ពួកគាត់ គឺចេះដាំតាមៗគ្នា ប៉ុន្តែអស់ពេលជា៥ឆ្នាំមកនេះ ដោយមានការណែនាំ ការបង្រៀនពីសំណាក់អង្គការដៃគូ ក៏ដូចជាខាងកសិកម្មស្រុកសូទ្រនិគម និងមន្ទីរខេត្តកសិកម្មខេត្តសៀមរាប ប្រជាកសិករបានចងក្រងគ្នាជាសហគមន៍ដាំបន្លែ និងកែប្រែរបៀបដាំ មកដាំដំណាំលើធ្នើដែលចំណាយថ្លៃដើមតិច និងទទួលទិន្នផលខ្ពស់។ អ្នកស្រី បានឲ្យដឹងថា បច្ចុប្បន្នអ្នកស្រីបានប្រភេទដាំបន្លែស្លឹកនៅក្នុងស្រុក ស្ទើរសព្វមុខ ដូចជាព្រៃក្រញ៉ាញ់ ស្ពៃខៀវ ស្ពៃតឿ គិនឆាយ តាំងអោ ជាដើម។ ប៉ុន្តែបច្ចុប្បន្ននេះ អ្នកស្រីបានដាំបន្លែគិនឆាយ ឬតុងឆាយ ច្រើន ព្រោះដំណាំប្រភេទនេះ លក់បានថ្លៃចំណេញច្រើន និងប្រមូលផលបានយូរ។ អ្នកស្រីឲ្យដឹងថា នៅលើផ្ទៃដីជាង ៤០០ម៉ែត្រក្រឡា អ្នកស្រីអាចរកចំណូលបានពីបន្លែគិនឆាយនេះ ប្រមាណជា ៤០ម៉ឺនរៀលក្នុងមួយសប្តាហ៍ និងអាចប្រមូលផលបានក្នុងរយៈពេលពី០៦ខែ ដល់ទៅ ១៤ខែ។
គួរឲ្យដឹងថា សហគមន៍ដាំបន្លែលើរាន ក្នុងស្រុកសូទ្រនិគម មានសមាជិក ៦៧គ្រួសារ មកពីឃុំចំនួន៣ គឺឃុំកៀនសង្កែ ឃុំតាយ៉ែក និងឃុំដានរុន។ ជាមួយគ្នានោះ លោក ហុង លី មេឃុំកៀនសង្កែ ស្រុកសូទ្រនិគម បានឲ្យដឹងថា ក្នុងនាមអាជ្ញាធរមូលដ្ឋាន លោកតែងតែគាំទ្រលើទឹកចិត្តដល់បងប្អូនប្រជាពលរដ្ឋនៅក្នុងការដែលមានមុខរបរមួយនឹងនរ ហើយសម្រាប់លោកមានតែពាក្យជួយត្រេកអរ និងសហការជាមួយប្រជាកសិករទៅតាមលទ្ធភាព៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
