នាព្រឹកថ្ងៃទី១០ ខែមករា ឆ្នាំ២០២៣ នៅសាលាខេត្តសៀមរាប មានរៀបចំបើកកិច្ចប្រជុំសាមញ្ញលើកទី៤៤ របស់ក្រុមប្រឹក្សាខេត្តសៀមរាបអាណត្តិទី៣ ដឹកនាំដោយឯកឧត្តម អ៊ាន ឃុន ប្រធានក្រុមប្រឹក្សាខេត្ត និង ឯកឧត្តម ទៀ សីហា អភិបាលខេត្ត និងមានការចូលរួមពីសំណាក់ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត តំណាងអាជ្ញាធេអប្សារា លោកនាយក នាយករងរដ្ឋបាល លោកនាយក នាយករងទីចាត់ការ លោក លោកស្រី អភិបាល អភិបាលរងក្រុង-ស្រុក ព្រមទាំងថ្នាក់ដឹកនាំមន្ទីរ អង្គភាពជុំវិញខេត្ត។
របៀបវារៈនៅក្នុងកិច្ចប្រជុំនេះរួមមាន៖ ១- ពិនិត្យ ពិភាក្សា និងអនុម័តលើសំណើសុំអនុញ្ញាតច្បាប់ឈប់សម្រាកនៅក្នុងកិច្ចប្រជុំសាមញ្ញលើកទី៤៤ ២- ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៤៣ របស់ក្រុមប្រឹក្សាខេត្តសៀមរាប ៣- ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំឆ្នាំ២០២២ ស្តីពី ការអនុវត្តការងាររបស់រដ្ឋបាលខេត្តសៀមរាប ៤- ពិនិត្យ ពិភាក្សា និងអនុម័តលើផែនការសកម្មភាព និងថវិកាគម្រោងកិច្ចការពារកុមារ២០២៣-២០២៥ របស់រដ្ឋបាលខេត្តសៀមរាប ៥- ពិនិត្យ ពិភាក្សា និងអនុម័តលើសេចក្ដីព្រាងសេចក្តីសម្រេចស្តីពីការបែងចែក តួនាទី ភារកិច្ច និងរបៀបរបបធ្វើការជូនគណៈអភិបាលខេត្ត។ ក្នុងនោះ អង្គប្រជុំក៏បានផ្ដោតទៅលើបញ្ហាមួយចំនួនដូចជា ការចតយាន្តយន្តគ្មានសណ្តាប់ធ្នាប់លើផ្លូវសាធារណៈ .អនាម័យ បរិស្ថាន ការអនុវត្តច្បាប់ចរាចរណ៍ .បញ្ហាផ្លូវក្នុងតំបន់អប្សារាមានការខូចខាតពុំទាន់មានការជួសជុសផងដែរ។
ជាមួយនឹងបញ្ហាដែលបានលើកឡើងក្នុងឱកាសនោះ ឯកឧត្តម ទៀ សីហា បានធ្វើការបកស្រាយ និងបំភ្លឺជូនអង្គប្រជុំ និងបានអនុញ្ញាតជូនលោកប្រធានមន្ទីរ អង្គភាពដែលពាក់ព័ន្ធ ធ្វើការបំភ្លឺជូនអង្គប្រជុំផងដែរ។ ក្រោយពីការបំភ្លឺរបស់មន្ទីរ អង្គភាព ឯកឧត្តមអភិបាលខេត្ត ក៏បានជំរុញមន្ទីរ អង្គភាពពាក់ព័ន្ធទាំងអស់ ត្រូវបន្តយកចិត្តទុកដាក់ខ្ពស់ក្នុងការដោះស្រាយរាល់ការលើកឡើងក្នុងអង្គប្រជុំនាពេលនេះ។
ព័ត៌មានជាតិ ថ្មីៗ
មានមតិបូកសរុបលទ្ធផលនៃកិច្ចប្រជុំនោះ ឯកឧត្តម អ៊ាន ឃុន លើកឡើងថា៖ តាមរយៈការចូលរួមធ្វើការពិនិត្យ ពិភាក្សា ឆ្លុះបញ្ចាំងមតិយោបល់ល្អៗ ប្រកបដោយ ក្រមសីលធម៌ និងវិជ្ជាជីវៈ ពីសំណាក់ឯកឧត្តម លោកជំទាវ លោក លោកស្រីក្នុងកិច្ចប្រជុំទាំងអស់ បានញ៉ាំងឲ្យដំណើរការនៃកិច្ចប្រជុំសាមញ្ញ របស់ ក្រុមប្រឹក្សាខេត្ត ប្រព្រឹត្តទៅតាមលំដាប់លំដោយ និងទទួលបានលទ្ធផលតាមការគ្រោងទុក្ខ។
ជាមួយគ្នានេះ ឯកឧត្តម ប្រធានក្រុមប្រឹក្សាខេត្ត ក៏បានថ្លែងនូវអំណរគុណយ៉ាងជ្រាលជ្រៅចំពោះឯកឧត្តម អភិបាលខេត្ត ក៏ដូចជាមន្ទីរ អង្គភាពទាំងអស់ ដែលបានយកចិត្តទុកដាក់ក្នុងការដោះស្រាយរាល់បញ្ហា ដែលបានលើកឡើងនេះ ព្រោះបញ្ហាទាំងនេះ គឺជាបញ្ហារបស់ប្រជាពលរដ្ឋ ដែលតែងតែលើកឡើងជាអន្លើៗ។ ជាមួយគ្នានេះ ឯកឧត្តម អ៊ាន ឃុន ក៏បានធ្វើការកោតសរសើរដល់ ថ្នាក់ដឹកនាំខេត្តសៀមរាបដែលបានខិតខំអភិវឌ្ឍន៍ខេត្តឲ្យមានសន្តិសុខសណ្តាប់ធ្នាប់ល្អនិងរីកចំរើននព្រមទាំងអនុវត្តការងារប្រកបដោយប្រសិទ្ធភាព មានសាមគ្គីភាពផ្ទៃក្នុង និង មានស្មារតីទទួលខុសត្រូវក្នុងការបំពេញការងារស្របតាមគោលនយោបាយ ច្បាប់ និង លិខិតបទដ្ឋានគតិយុត្តពាក់ព័ន្ធនឹងកំណែទម្រង់វិមជ្ឈការ និងវិសហមជ្ឈការនៅរដ្ឋបាល ថ្នាក់ក្រោមជាតិផងដែរ៕
អត្ថបទ និងរូបភាព៖ លោក ទ្រា ពន្លឺ និងលោក ស៊ាន សុផាត
កែសម្រួល៖ លោក សេង ផល្លី
