នៅថ្ងៃទី១១ ខែមករា ឆ្នាំ២០២៣ ឯកឧត្តម ទៀ សីហា អភិបាលខេត្តសៀមរាប បានអញ្ជើញប្រកាសការផ្ទេរភារកិច្ច និង ចូលកាន់មុខតំណែង របស់លោក ភន់ សុខុម ជាអភិបាលស្រុកអង្គរជុំថ្មី ខណៈលោក លុក ផុស អតីតអភិបាលស្រុកអង្គរជុំ បានបំពេញតួនាទីគ្រប់២អាណត្តិ និងបានផ្ទេរភារកិច្ចទៅសាលាខេត្តសៀមរាប។
ថ្លែងក្នុងឱកាសនោះ ឯកឧត្តម ទៀ សីហា លើកឡើងថា ដោយមើលឃើញពីស្ថានភាព និងតម្រូវការចាំបាច់ របស់ស្រុកអង្គរជុំ រាជរដ្ឋាភិបាល ក៏ដូចជារដ្ឋបាលខេត្ត បានវាយតម្លៃបេក្ខភាពអភិបាលស្រុកថ្មី ដោយផ្អែកលើលក្ខណៈសម្បត្តិ និងឧបនិស្ស័យសមស្របដូចមានចែងនៅក្នុងច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងលិខិតបទដ្ឋានគតិយុត្តនានា ដែលមានជាធរមាន។
ជាមួយនោះ ឯកឧត្តម អភិបាលខេត្ត បានស្នើដល់លោកអភិបាលស្រុក ដែលទើបតែងតាំងថ្មី រួមទាំងក្រុមប្រឹក្សាស្រុក គណៈអភិបាលស្រុក មន្រ្តីរាជការ កងកម្លាំងប្រដាប់អាវុធ និងកម្លាំងមានសមត្ថកិច្ចគ្រប់លំដាប់ថ្នាក់នៃស្រុក ត្រូវរួមសហការគ្នាអនុវត្តការងារសំខាន់ៗ ព្រមទាំងដោះស្រាយទុក្ខលំបាករបស់បងប្អូនប្រជាពលរដ្ឋ ដែលជាតម្រូវការចាំបាច់នៅក្នុងមូលដ្ឋាន ដោយមិនប្រកាន់បក្ខពួក ដែលធ្វើឲ្យប៉ះពាល់ដល់ប្រយោជន៍រួមឡើយ។
ព័ត៌មានជាតិ ថ្មីៗ
ក្នុងនោះដែរ ឯកឧត្តម អភិបាលខេត្ត ក៏បានជំរុញដល់រដ្ឋបាលស្រុកផ្សព្វផ្សាយដល់ប្រជាពលរដ្ឋនៅទូទាំងស្រុក សូមទៅទទួលលការចាក់វ៉ាក់សាំងការពារជំងឺកូវីដ-១៩ ដើម្បីចូលរួមការពារសុខុមាលភាពប្រជាពលរដ្ឋទាំងក្នុងមូលដ្ឋាន ក៏ដូចជាទូទាំងប្រទេស។ ទន្ទឹមនោះ ឯកឧត្តម ក៏បានជំរុញដល់រដ្ឋបាលស្រុក ត្រូវធ្វើការផ្សព្វផ្សាយ និងសហការជាមួយកម្លាំងអធិការដ្ឋាននគរបាលស្រុក និងអង្គការ សមាគមក្នុងមូលដ្ឋាន ធ្វើយ៉ាងជូនដំណឹងទៅប្រជាពលរដ្ឋដែលគ្រប់អាយុ ផុតសុពលភាព និងបាត់អត្តសញ្ញាណបណ្ណ ទៅចុះឈ្មោះ និងស្នើសុំអត្តសញ្ញាណបណ្ណ ដើម្បីជាប្រយោជន៍សម្រាប់ខ្លួនឯងផ្ទាល់ និងសង្គមជាតិ ខណៈការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នឹងប្រព្រឹត្តិទៅនៅថ្ងៃទី២៣ ខែកក្កដា ឆ្នាំ២០២៣ខាងមុខនេះ។
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក សេង ផល្លី
