ចាប់ពីថ្ងៃទី១៦ ដល់ថ្ងៃទី៣១ ខែមករា ឆ្នាំ២០២៣ ប្រជាពលរដ្ឋដែលមានដីស្ថិតក្នុងភូមិកំព្រហ្ម ឃុំឃុនរាម ស្រុកបន្ទាយស្រី ខេត្តសៀមរាប អាចមកពិនិត្យ ផ្ទៀងផ្ទាត់ទិន្នន័យឯកសារការវិនិច្ឆ័យក្បាលដីរបស់ខ្លួន ស្ថិតនៅក្នុងបរិវេណវត្តពើងព្រួត ដែលមានរយៈពេលសរុប១៥ថ្ងៃគិតរួមទាំងថ្ងៃបុណ្យនឹងថ្ងៃឈប់សំរាក។
មានប្រសាសន៍ក្នុងពិធីបិទផ្សព្វផ្សាយជាសាធារណៈនូវឯកសារការវិនិច្ឆ័យក្បាលដីនៅពេលនោះ លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប លើកឡើងថា ខេត្តសៀមរាប ជាខេត្តមួយក្នុងចំណោមខេត្តអទិភាពទាំង ២៥ រាជធានី-ខេត្ត ដែលត្រូវបានអនុវត្តន៍ការចុះបញ្ជីដីធ្លីមានលក្ខណៈជាប្រព័ន្ធ របស់កម្មវិធីអនុវិស័យរដ្ឋបាលដីធ្លី ដែលគាំទ្រថវិកាដោយរាជរដ្ឋាភិបាលកម្ពុជា ដែលស្ថិតក្រោមការដឹកនាំរបស់ក្រសួងរៀបចំដែនដី នគរូបនីយកម្ម និងសំណង់ និងអនុវត្តន៍ការងារដោយមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប ព្រមជាមួយកិច្ចសហការពីអាជ្ញាធរដែនដី ជាពិសេសតាមការចង្អុលបង្ហាញ របស់ឯកឧត្តម ទៀ សីហា អភិបាលខេត្តសៀមរាប។
លោក អនុប្រធានមន្ទីរ បញ្ជាក់ថា ការបិទផ្សាយជាសាធារណៈនូវឯកសារនៃការវិនិច្ឆ័យក្បាលដី សរុប ៤០៤ក្បាលដីនេះ ក៏ជាឱកាសសម្រាប់អង្គភាព និងអ្នកពាក់ព័ន្ធនឹងក្បាលដីស្ថិតក្នុងភូមិកំព្រហ្ម ពិនិត្យ ក្រៅពីម្ចាស់ក្បាលដីផ្ទាល់ ដើម្បីធានាបាននូវភាពសុក្រឹត្យត្រឹមត្រូវ ក្នុងការចេញវិញ្ញាបនប័ត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិ) និងចៀសពីបញ្ហាផ្សេងៗនាពេលក្រោយ។
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក សេង ផល្លី
