ថ្លែងនៅសាលាក្រុងសៀមរាប រសៀលថ្ងៃទី១៦ខែមករា ឆ្នាំ២០២៣នេះ ឯកឧត្ដម លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីនកម្ពុជា បង្ហាញថា ទំហំផ្ទៃដីសរុប ៩៤៦,៥១២ ម៉ែត្រក្រឡា ដែលស្ថិតនៅក្នុងក្រុងសៀមរាប និងស្រុកក្រឡាញ់ត្រូវបានបញ្ចប់ការងារបោសសម្អាតមីនទាំងស្រុង និងប្រកបដោយជោគជ័យ។
ជាមួយនេះដែរ ឯកឧត្ដម លី ធុជ ក៏បានបញ្ជាក់ដែរថា សម្រាប់ខេត្តសៀមរាបទាំងមូល នៅសល់ផ្ទៃដីសង្ស័យមានមីនចំនួន ៤៨,៩៣៦,៤៩៩ ម៉ែត្រក្រឡាទៀត ក្នុងនោះ ចម្ការមីនចំនួន ៥៧០កន្លែង ដែលស្ថិតក្នុងស្រុកចំនួន ១០។ ក្រោមការយកចិត្តទុកដាក់របស់រាជរដ្ឋាភិបាលកម្ពុជា គម្រោងបញ្ចប់ការបោសសម្អាតមីនរួមគ្នាក្នុងឆ្នាំ២០២៣នេះ នឹងមានកិច្ចសហការជាមួយប្រទេសជាមិត្ត ដៃគូអភិវឌ្ឍន៍ និងប្រតិបត្តិករជាតិ-អន្តរជាតិ រួមមាន រាជរដ្ឋាភិបាលកម្ពុជា (គម្រោងសម្តេចតេជោសម្រាប់សកម្មភាពមីន និងមូលនិធិកម្ពុជាគ្មានមីនឆ្នាំ២០២៥) អាល្លឺម៉ង់ ស្វីស អាមេរិក អង់គ្លេស អៀរឡង់ ចិន HDR&D អង្គភាពស៊ីម៉ាក់ អង្គការ HALO Trust អង្គការដោះមីនកម្ពុជា និងអង្គការ APOPO ។
ព័ត៌មានជាតិ ថ្មីៗ
ឯកឧត្ដម ទេសរដ្ឋមន្រ្តី បានថ្លែងអំណរគុណដល់ឯកឧត្ដម ទៀ សីហា អភិបាលខេត្តសៀមរាប និងអាជ្ញាធរគ្រប់លំដាប់ថ្នាក់ ដែលបានផ្តល់នូវកិច្ចសហការយ៉ាងល្អប្រសើរ និងផ្តល់លទ្ធភាពងាយស្រួលដល់កងកម្លាំងបោសសម្អាតមីនទាំងអស់ ក៏ដូចជាកងកម្លាំងបោសសម្អាតមីនរបស់អង្គការ HALO Trust ធ្វើការបញ្ចប់ការងារបោសសម្អាតមីនក្នុងក្រុងសៀមរាប និងស្រុកក្រឡាញ់ទទួលបានជោគជ័យ។ តាមរយៈគម្រោងនេះផងដែរ អង្គការ HALO Trust នៅឆ្នាំ២០២៣នេះ នឹងបញ្ចប់ការងារបោសសម្អាតមីននៅស្រុកចំនួនពីរបន្ថែមទៀតក្នុងខេត្តសៀមរាប រួមមានស្រុកពួក និងស្រុកស្រីស្នំ។
ទន្ទឹមនោះ ឯកឧត្ដម ទេសរដ្ឋមន្រ្តី បានលើកឡើងថា គិតចាប់ពីពេលនេះ កម្ពុជា នៅសល់រយៈពេល ៣ឆ្នាំទៀត ដើម្បីឈានទៅសម្រេចបាននូវចក្ខុវិស័យរបស់ សម្តេចតេជោ នាយករដ្ឋមន្រ្តី “កម្ពុជាគ្មានមីនឆ្នាំ២០២៥” ដែលបច្ចុប្បន្ន យើងនៅសល់ទំហំផ្ទៃដីមានមីនចំនួន ៦៤៨ គីឡូម៉ែត្រក្រឡា។ ដោយឡែក ឯកឧត្ដម ក៏បានលើកឡើងថា ទោះបីយើងដោះស្រាយបញ្ហាមីនចប់ត្រឹមឆ្នាំ២០២៥ក្ដី ប៉ុន្តែបញ្ហាសំណល់ជាតិផ្ទុះពីសង្រ្គាម ដូចជា គ្រាប់បែកទម្លាក់ពីលើយន្តហោះ គ្រាប់បែកចង្កោម និងគ្រាប់មិនទាន់ផ្ទុះគ្រប់ប្រភេទ ក៏នៅតែជាបញ្ហាដ៏ធំ ដែលយើងមិនអាចដោះស្រាយ បានអស់ត្រឹមឆ្នាំ២០២៥ ឡើយ។
ថ្លែងក្នុងឱកាសនោះ ឯកឧត្ដម ទៀ សីហា អភិបាលខេត្តសៀមរាប លើកឡើងថា ចាប់ពីឆ្នាំ១៩៩២ រហូតដល់បច្ចុប្បន្ន ក្រោមការខិតខំប្រឹងប្រែងរបស់រាជរដ្ឋាភិបាល ប្រទេសជាមិត្ត ដៃគូអភិវឌ្ឍន៍ និងប្រតិបត្តិករជាតិ-អន្តរជាតិ បានធ្វើការបោសសម្អាតចម្ការមីនក្នុងខេត្តសៀមរាប លើផ្ទៃដីសរុប ៨.៨១៣ហិកតា និងរកឃើញ មីនថ្មើជើង ចំនួនជាង ២១ពាន់គ្រាប់ មីនតោនចំនួន ៧២៧គ្រាប់ និងសំណល់ជាតិផ្ទុះពីសង្រ្គាមគ្រប់ប្រភេទមានចំនួនជាង១១៤ពាន់គ្រាប់។ ជាមួយនេះ តាមរយៈយន្តការសកម្មភាពកម្ចាត់មីន និងគ្រាប់យុទ្ធភ័ណ្ឌមិនទាន់ផ្ទុះ រដ្ឋបាលខេត្តសៀមរាប បាននិងកំពុងបន្តធ្វើការបោសសម្អាត ការផ្សព្វផ្សាយអប់រំ គ្រោះថ្នាក់ដោយសារមីន ដោយសហការជាមួយក្រុមការងារផែនការសកម្មភាពមីន អាជ្ញាធរមូលដ្ឋាន អង្គភាពពាក់ព័ន្ធចូលរួមសហការអនុវត្តជាបន្តបន្ទាប់រហូតមកដល់បច្ចុប្បន្ននេះ៕
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
