នៅថ្ងៃទី១៧ ខែមករា ឆ្នាំ២០២៣នេះ អគារអង្គភាពនគរបាលការពារបេតិកភណ្ឌប្រចាំតំបន់អង្គរ ស្ថិតក្នុងតំបន់រមណីយដ្ឋានអង្គរ ខេត្តសៀមរាប ត្រូវបានសម្ពោធដាក់ឲ្យប្រើប្រាស់ជាផ្លូវការក្រោមអធិបតីភាពសម្ដេចក្រឡាហោម ស ខេង នាយករដ្ឋមន្ត្រីស្ដីទី លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ ឯកឧត្តម ទៀ សីហា អភិបាលខេត្តសៀមរាប និងអញ្ជើញចូលរួមពីឯកឧត្តម លោកជំទាវ លោក លោកស្រី មកពីបណ្ដាស្ថាប័ន មន្ទីរ អង្គភាពជាច្រើនទៀត។
តាមរបាយការណ៍របស់លោកជំទាវ ភឿង សកុណា អគារថ្មីរបស់អង្គភាពនគរបាលការពារបេតិកភណ្ឌនេះ ត្រូវបានសាងសង់ឡើងលើផ្ទៃដីដោះស្រាយគោលនយោបាយរួម របស់អាជ្ញាធរជាតិអប្សរា ដែលមានផ្ទៃក្រឡាសរុប១៩,៩៤៧ម៉ែត្រការ៉េ និងមានតម្លៃសរុបប្រមាណ៧ប៊ីលាន ១៩៨លានរៀល ជាថវិកាបានមកពីមូលនិធិអភិរក្សឆ្នាំ២០១៨នៃអាជ្ញាធរជាតិអប្សរា។ អគារថ្មីនេះ ជាសមិទ្ធផលថ្មីមួយទៀត កើតចេញពីកិច្ចខិតខំប្រឹងប្រែងរួមគ្នា រវាងអាជ្ញាធរជាតិអប្សរា អង្គភាពនគរបាលការពារបេតិកភណ្ឌ ក្រោមការគាំទ្ររបស់អគ្គស្នងការដ្ឋាននគរបាលជាតិ អាជ្ញាធរខេត្ត ក្រសួងសេដ្ឋកិច្ច និងហិរញ្ញវត្ថុ និងភាគីពាក់ព័ន្ធមួយចំនួនទៀត។ លោកជំទាវ បន្ថែមថា ក្រៅពីអគាររដ្ឋបាល ស្នាក់នៅ និងសាលប្រជុំ នៅទីនេះក៏មានអគារសុខាភិបាល និងវិទ្យុ ជម្រកកម្លាំងត្រៀម រោងចំណតរថយន្តអគ្គិភ័យ ទីលានកីឡា អង់តែនវិទ្យុទាក់ទងជាដើម។
សម្ដេចក្រឡាហោម ស ខេង មានប្រសាសន៍ថា អគារថ្មីរបស់អង្គភាពនគរបាលការពារបេតិកភណ្ឌនេះ ពិតជារៀបចំបានស្អាត តាមរចនាបទប្លង់ស្ថាបត្យកម្មខ្មែរសាមញ្ញ ប៉ុន្តែបានបង្កប់នូវភាពថ្លៃថ្នូរ សក្ដិសមជាសមិទ្ធផលថ្មី និងជួយបង្កើនសោភណ្ឌភាពរមណីយដ្ឋានអង្គរ និងភាពថ្លៃថ្នូរ ព្រមទាំងផាសុខភាពជូនកងកម្លាំងនគរបាលការពារបេតិកភណ្ឌ។
សម្ដេចនាយករដ្ឋមន្រ្តីស្ដីទី នៃរាជរដ្ឋាភិបាលកម្ពុជា ក៏បានផ្ដល់អនុសាសន៍ដល់អាជ្ញាធរខេត្តសៀមរាប និងអង្គភាពនគរបាលការពារបេតិកភណ្ឌ ត្រូវបន្តសហការជិតស្និតជាមួយអាជ្ញាធរជាតិអប្សរា ក្នុងកិច្ចការថែរក្សា ការពារបេតិកភណ្ឌជាតិ ពិសេសកិច្ចការស្រាវជ្រាវ និងអនុវត្តវិធានការបង្ការទប់ស្កាត់និងបង្ក្រាបអំពើខុសច្បាប់ ពាក់ព័ន្ធនឹងព្រៃឈើ និងវត្ថុបុរាណ ដែលស្ថិតនៅក្នុងតំបន់មានសមត្ថកិច្ចរបស់ខ្លួន។
សម្ដេចក្រឡាហោម ស ខេង ក៏បានបញ្ជាក់ដែរថា ការស្ម័គ្រចិត្ត និងផ្លាស់ប្ដូរទីលំនៅ របស់ប្រជាពលរដ្ឋនៅក្នុងតំបន់មិនរៀបរយ នៃតំបន់រមណីយដ្ឋានអង្គរ ទៅកាន់ភូមិធម្មជាតិរុនតាឯក និងតំបន់ពាក់ស្នែង គឺបានបង្ហាញអំពីគម្រូវីរៈភាព និងការដឹងគុណចំពោះមរតកដូនតាដ៏មានតម្លៃមហាសាលនេះ។ ជាមួយនឹងភាពជោគជ័យ នៃការអនុវត្តគោលនយោបាយខាងលើនេះ គឺជាអនុសាសន៍ប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងកិច្ចការពារនិងអភិរក្សបេតិកភណ្ឌជាតិ ជាមួយនឹងការអភិវឌ្ឍដែលផ្ដល់ផលប្រយោជន៍ជូនប្រជាជននៅក្នុងមូលដ្ឋាន។
អត្ថបទ៖ ហ្វេសប៊ុក សម្ដេចក្រឡាហោម ស ខេង
