នៅរសៀលថ្ងៃទី១៧ ខែមករា ឆ្នាំ២០២៣ ប្រជាកសិករស្ថិតក្នុងឃុំល្វា ស្រុកពួក ខេត្តសៀមរាបលើកឡើងថា តម្លៃស្រូវដែលគាត់បានប្រមូលផល និងលក់កាលពីពេលថ្មីៗនេះ បានឡើងដល់៩៤០រៀល ក្នុងមួយគីឡូក្រាម ដែលនេះជាតម្លៃល្អ បន្ទាប់ពីពួកគាត់ បានធ្វើការដាំស្តារឡើងវិញក្រោយគ្រោះទឹកជំនន់កាលពីឆ្នាំ២០២២កន្លងទៅនេះ។
តាមការបញ្ជាក់របស់ លោកស្រី ព្រំ កក់ ជាកសិករក្នុងស្រុកពួក លើកឡើងថា ទាំងទិន្នផល ទាំងតម្លៃគឺមានការកើនឡើងគួរឱ្យកត់សម្គាល់ ជាពិសេសគាត់បានអរគុណដល់រាជរដ្ឋាភិបាល ដែលបានជួយសង្គ្រោះពួកគាត់បានទាន់ពេលវេលា។
ក្នុងឱកាសចុះពិនិត្យការប្រមូលផលស្រូវនៅស្រុកពួកនាពេលនោះ លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានឱ្យដឹងថា សម្រាប់ស្រុកពួកមានគ្រួសារកសិករ ដែលរងគ្រោះដោយទឹកជំនន់កាលពីឆ្នាំ២០២២ខ្លាំង សរុបចំនួន២៩៥គ្រួសារ និងមានផ្ទៃដីសរុប២៥៣ហិកតា។ ក្នុងនោះគ្រួសារកសិកររងគ្រោះ ទទួលបានជំនួយពីរាជរដ្ឋាភិបាលជាស្រូវពូជមិនប្រកាន់រដូវ ចំនួន ១០០គីឡូក្រាម ក្នុងមួយគ្រួសារ។ ជាលទ្ធផល ពួកគាត់បានដាំស្ដារឡើងវិញ ១០០ភាគរយ និងបច្ចុប្បន្នកំពុងប្រមូលបានជាង ៨០%។
គួរជម្រាបថា បច្ចុប្បន្នក្រសួងកសិកម្ម រុក្ខាប្រមាញ់ និងនេសាទ បានកំពុងធ្វើការដាំដុះស្រូវពូជសែនក្រអូប លើផ្ទៃដីជាង២០០ហិកតា ស្ថិតក្នុងស្រុកពួក ដើម្បីបំរុងទុកពូជសម្រាប់ស្រូវរដូវវស្សានាឆ្នាំក្រោយ ដោយមានការថែទាំដោយយកចិត្តទុកដាក់ពីមន្ត្រីជំនាញ របស់មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប។
គួររំលឹកដែរថា កាលពីរដូវវស្សាឆ្នាំ២០២២កន្លងទៅនេះ ស្រុកមួយចំនួនក្នុងខេត្តសៀមរាប បានរងគ្រោះដោយសារទឹកជំនន់ទឹកភ្លៀង បណ្តាលឱ្យលិចលង់ស្រែចម្ការ ផលដំណាំនិងហេដ្ឋារចនាសម្ព័ន្ឋនានាជាច្រើន។ ក្នុងនោះ ស្រុកចំនួន ៤ក្នុងចំណោម ១២ក្រុងស្រុក បានរងផលប៉ះពាល់ខ្លាំងជាងគេ រួមមានស្រុកស្រីស្នំ ក្រឡាញ់ ពួក និងស្រុកជីក្រែង។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
