ក្នុងពេលដែលកម្ពុជា មានមហិច្ឆតាប្រែក្លាយជាប្រទេសគ្មានផ្សែងបារី នៅឆ្នាំ២០២៥ ពិភពលោកនៅតែព្រួយបារម្ភអំពីគ្រោះថ្នាក់ ដែលបណ្តាលមកពីផលិតផលថ្នាំជក់ ដែលជាផលិតផលតែមួយគត់ ដែលធ្វើឲ្យអ្នកប្រើប្រាស់ពាក់កណ្តាលស្លាប់មុនអាយុ ដោយក្នុងមួយឆ្នាំៗជាមធ្យមមានអ្នកស្លាប់ ៨លាននាក់ ។
មានប្រសាសន៍នៅក្នុងពិធីបើកសិក្ខាសាស្តីពី “ការអនុវត្តច្បាប់ត្រួតពិនិត្យផលិតផលថ្នាំជក់ និងសុខភាពផ្លូវចិត្ត” នាថ្ងៃទី១៦ ខែមករា ឆ្នាំ២០២៣ នេះ អភិបាលរងខេត្តសៀមរាប លោកពិន ប្រាកដ បានឲ្យដឹងថា ថ្នាំជក់គឺជាផលិតផលតែមួយគត់ ដែលធ្វើអោយអ្នកប្រើប្រាស់ពាក់កណ្តាលស្លាប់មុនអាយុកំណត់។ ការប្រើប្រាស់ថ្នាំជក់គឺជាមូលហេតុចម្បងនៃការស្លាប់ ដែលអាចការពារបាននៅលើពិភពលោក ថ្នាំជក់ជាកត្តាហានិភ័យចម្បងសម្រាប់ជំងឺមិនឆ្លងយ៉ាងកាចសាហាវចំនួនបួន (NCDs) គឺ ជំងឺមហារីក ជំងឺទឹកនោមផ្អែម ជំងឺផ្លូវដង្ហើមរ៉ាំរ៉ៃ និងជំងឺសរសៃឈាមបេះដូងផងដែរ។ លោកបន្តថា យោងតាមរបាយការណ៍របស់អង្គការសុខភាពពិភពលោកបានបង្ហាញថា ក្នុង១ឆ្នាំៗថ្នាំជក់បណ្តាលឱ្យ ប្រជាពលរដ្ឋច្រើនជាង ៨លាននាក់ស្លាប់នៅលើពិភពលោក និងជិត១ម៉ឺន ៥ពាន់នាក់នៅកម្ពុជា។ ក្នុងចំណោមអ្នកស្លាប់ជាង ៨លាននាក់នៅលើពិភពលោកនោះមានអ្នកស្លាប់ជាង ១លាននាក់គឺអ្នកដែលស្រូបផ្សែងបារី ដែលគ្រោះថ្នាក់នេះអាចជៀសវាងបានប្រសិនបើយើងមានបរិស្ថានគ្មានផ្សែងបារី។
ចាប់តាំងពីប្រទេសកម្ពុជា បានអនុវត្តគម្រោងកិច្ចព្រមព្រៀងស្តីពីការគ្រប់គ្រងថ្នាំជក់ក្នុងឆ្នំា២០០៥ រដ្ឋាភិបាល នៃព្រះរាជាណាចក្រកម្ពុជា បានអនុម័តច្បាប់គ្រប់គ្រងថ្នាំជក់ក្នុងឆ្នំា២០១៥ ដែលផ្តោតសំខាន់ទៅលើការតម្លើងពន្ធផលិតផលថ្នំាជក់ ផាកពិន័យទៅលើការជក់បារីនៅតាមទីសាធារណ: កន្លែងធ្វើការ និងនៅតាមមធ្យោបាយធ្វើដំណើរសាធារណ:ផ្សេងៗ ការប្រើរូបភាពពីការប៉ះពាល់ដល់សុខភាព 55% នៅលើកញ្ចប់ផលិតផលថ្នាំជក់ ក៏ដូចជាការផាកពិន័យនៅលើការផ្សាយពាណិជ្ជកម្ម និងការឧបត្ថម្ភផ្សេងៗ។
ពាក់ព័ន្ធនឹងការអនុវត្តច្បាប់ត្រួតពិនិត្យផលិតផលថ្នាំជក់ គឺពុំទាន់មានការអនុវត្ត និងត្រួតពិនិត្យបានពេញលេញនៅឡើយទេ ពោលគឺក្រុមហ៊ុនថ្នាំជក់នៅតែធ្វើការផ្សព្វផ្សាយពីផលិតផលរបស់ខ្លួនតាមគ្រប់មធ្យោបាយ ការដាក់តាំងលក់ ការដាក់រូបភាព អក្សរជាសារព្រមានសុខភាពនៅលើកញ្ចប់បារី និងការបិទតែមប្រិ៍ពន្ធរបស់រដ្ឋាភិបាល គឺពុំទាន់គ្រប់លក្ខណនៅឡើយ ដែលជាឧបសគ្គរារាំងដល់ការកាត់បន្ថយចំនួនប្រជាពលរដ្ឋ ដែលស្លាប់ ពិការ និងកើតជំងឺបណ្ដាលមកពីការប្រើប្រាស់ផលិតផលថ្នាំជក់។
ព័ត៌មានជាតិ ថ្មីៗ
លោកពិន ប្រាកដ អភិបាលរងខេត្តសៀមរាប បានលើកឡើងបន្ថែមថា វគ្គសិក្ខាសាលានេះពិជាមានសារ:សំខាន់ណាស់ ព្រោះនឹងផ្តល់ព័ត៌មានជាមូលដ្ឋានពាក់ព័ន្ធនឹងការអនុវត្តបរិស្ថានគ្មានផ្សែងបារី ការបិទស្លាកសញ្ញាហាមជក់បារី ការដាក់រូបភាព និងសារព្រមានសុខភាព ការបិទតែមប្រ៍ពន្ធនៅលើកញ្ចប់បារីគ្រប់ប្រភេទ និងទឡ្ហីករណ៍សំខាន់ៗ ដើម្បីជំរុញការអនុវត្តច្បាប់ត្រួតពិនិត្យផលិតផលថ្នាំជក់ឱ្យកាន់តែមានប្រសិទ្ធភាពខ្ពស់ ស្របតាមអនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណចក្រកម្ពុជា ក្នុងជំនួបជាមួយប្រធានអង្គការសុខភាពពិភពលោកប្រចាំតំបន់អាស៊ីប៉ាស៊ីហ្វិកកាលពីពេលថ្មីៗនេះថា “កម្ពុជាមានមហិច្ឆតាប្រែក្លាយជាប្រទេសគ្មានផ្សែងបារីនៅឆ្នាំ២០២៥”៕
អត្ថបទ និងរូបភាព: លោកជា ស្រស់ កែសម្រួលដោយ លីវ សុខុន!!! សូម
