នៅរសៀលថ្ងៃទី១០ ខែមករា ឆ្នាំ២០២៣ ឯកឧត្តម ទៀ សីហា អភិបាលខេត្តសៀមរាប បានអញ្ជើញប្រកាសការផ្ទេរភារកិច្ច និងចូលកាន់មុខតំណែងជាអភិបាលស្រុកក្រឡាញ់ថ្មី ដើម្បីបង្កើននូវប្រសិទ្ធភាពការងារដឹកនាំ ចាត់ចែង គ្រប់គ្រង ជំរុញការអភិវឌ្ឍមូលដ្ឋាន និងផ្តល់សេវាសាធារណៈកាន់តែឆាប់រហ័ស ដែលជាការឆ្លើយតបទៅនឹងតម្រូវការរបស់បងប្អូនប្រជាពលរដ្ឋនៅក្នុងមូលដ្ឋាន។
ឯកឧត្តម ទៀ សីហា មានប្រសាសន៍ថា ការសម្រេចលើកសំណើសុំតែងតាំងលោក សុខ ណារ៉េត ជាអភិបាលស្រុកក្រឡាញ់ គឺដោយផ្អែកលើលក្ខណសម្បត្តិ និងឧបនិស្ស័យសមស្របដូចមានចែងនៅក្នុងច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងលិខិតបទដ្ឋានគតិយុត្តនានា ដែលនៅជាធរមាន និងផ្អែកតាមបទពិសោធន៍ការងារដែលលោក បានបំពេញនាពេលកន្លងមក។ ជាមួយគ្នានោះឯកឧត្តម ក៏បានណែនាំដល់លោកអភិបាលស្រុក ដែលទើបតែងតាំងថ្មី រួមនឹងអាជ្ញាធរថ្នាក់ស្រុកទាំងអស់ ត្រូវរួមសហការគ្នាអនុវត្តការងារសំខាន់ៗបន្ថែមទៀត ជាពិសេសផ្សព្វផ្សាយណែនាំជំរុញដល់ប្រជាពលរដ្ឋតាមមូលដ្ឋានទៅចាក់វ៉ាក់សាំងការពារជំងឺកូវីដ-១៩ ឱ្យបានគ្រប់ៗគ្នា។ បន្តខិតខំលើកកម្ពស់ការរក្សាសន្តិសុខ សណ្តាប់ធ្នាប់សាធារណៈក្នុងមូលដ្ឋាន ដោយជំរុញការផ្សព្វផ្សាយនូវលក្ខណៈសម្បត្តិទាំង៧ នៃគោលនយោបាយភូមិឃុំមានសុវត្ថិភាព បន្តជំរុញការអភិវឌ្ឍសេដ្ឋកិច្ចសង្គមលើគ្រប់វិស័យ លើកកម្ពស់ការងារផ្ដល់សេវាជូនប្រជាជនតាមរយៈការផ្តល់សេវានៅការិយាល័យច្រកចេញចូលតែមួយ ព្រមទាំងខិតខំសម្របសម្រួលដោះស្រាយបញ្ហាប្រឈមនានាដែលនៅសេសសល់ សំដៅរួមគ្នាធានាឲ្យបាននូវប្រក្រតីភាពនៃការងារគ្រប់វិស័យទូទាំងស្រុកទាំងមូល។
ក្នុងឱកាសនោះដែរ លោកអភិបាលស្រុកក្រឡាញ់ ដែលទើបទទួលការតែងតាំងថ្មី ក៏បានឡើងប្តេជ្ញាចិត្ត ខិតខំបំពេញការងារយកអស់កំលាំងកាយចិត្ត ប្រាជ្ញា ស្មារតី ដើម្បីបម្រើជាតិមាតុភូមិ និងប្រជាពលរដ្ឋ ព្រមទាំងបង្កើនកិច្ចការពារសន្តិសុខ សណ្តាប់ធ្នាប់សាធារណៈ ព្រមទាំងអនុវត្តនូវវិធានការចាំបាច់ទាំងឡាយ សំដៅបង្កើនប្រសិទ្ធភាពការងារទប់ស្កាត់ និងបង្រ្កាបបទល្មើសគ្រប់ប្រភេទ។ ជាពិសេសល្បែងស៊ីសង ការជួញដូរនិងការប្រើប្រាស់គ្រឿងញៀនខុសច្បាប់ អំពើជួញដូរមនុស្ស ការកេងប្រវ័ញពលកម្មកុមារ សកម្មភាពបទល្មើសផ្សេងៗទៀត និងអំពើទាំងឡាយណា ដែលបង្កឲ្យមានការភ័យខ្លាចក្នុងសង្គម និងធ្វើឲ្យសីលធម៌សង្គមធ្លាក់ចុះ ក្នុងន័យធានាឲ្យបាននូវ ភូមិ-ឃុំ មានសុវត្ថិភាព។
សូមជម្រាបថា លោក សុខ ណារ៉េត អភិបាលរងស្រុកក្រឡាញ់ ត្រូវបានប្រកាសតែងតាំងចូលកាន់មុខតំណែងជាអភិបាលស្រុកក្រឡាញ់ ជំនួសលោកស្រី ម៉ននី រង្សី ដែលបានទៅទទួលភារកិច្ចថ្មី ជាអភិបាលរងខេត្តសៀមរាប៕
អត្ថបទ និងរូបភាព៖ លោក យូ វង្ស
កែសម្រួល៖ អ៊ុន ណារាជ្យ
