នៅថ្ងៃទី៩ ខែមករា ឆ្នាំ២០២៣ ឯកឧត្តម ទៀ សីហា អភិបាលខេត្តសៀមរាប បានអញ្ជើញប្រកាសការផ្ទេរភារកិច្ច និង ចូលកាន់មុខតំណែងជាអភិបាលស្រុកបន្ទាយស្រី និងអភិបាលស្រុកអង្គរធំថ្មី ដើម្បីបង្កើននូវប្រសិទ្ធភាពការងារដឹកនាំ ចាត់ចែង គ្រប់គ្រង ជំរុញការអភិវឌ្ឍមូលដ្ឋាន និងផ្តល់សេវាសាធារណៈកាន់តែឆាប់រហ័ស ដែលជាការឆ្លើយតបទៅនឹងតម្រូវការរបស់បងប្អូនប្រជាពលរដ្ឋនៅក្នុងមូលដ្ឋាន។
គួរជម្រាបថា លោក រិន ឡូត អភិបាលរងស្រុកក្រឡាញ់ ត្រូវបានតែងតាំងជាអភិបាលស្រុកបន្ទាយស្រីថ្មី ជំនួសលោក ឃឹម ហ្វីណង់ ដែលត្រូវបានទទួលភារកិច្ចថ្មី ជាអភិបាលរងខេត្តសៀមរាប។ ដោយឡែក លោក ពៅ ប៊ុនធឿន អភិបាលស្រុកជីក្រែង ត្រូវបានតែងតាំងជាអភិបាលស្រុកអង្គរធំថ្មី ជំនួសលោក ឡុង រដ្ឋារក្ស ដែលបានបំពេញការងារគ្រប់អាណត្តិជាអភិបាលស្រុក និងត្រូវបានផ្ទេរភារកិច្ចថ្មីទៅបម្រើការនៅសាលាខេត្តសៀមរាប។
មានប្រសាសន៍ក្នុងពិធីនោះ ឯកឧត្តម ទៀ សីហា បង្ហាញក្នុងការបំពេញតួនាទី ភារកិច្ច ក្នុងគណៈអភិបាលស្រុក និងខេត្ត គឺមានរយៈពេល ២អាណត្តិដូចៗគ្នា ដែលក្នុងមួយអាណត្តិមាន ៤ឆ្នាំ។ ដូច្នេះ ដោយមើលឃើញពីស្ថានភាព និងតម្រូវការចាំបាច់ របស់ស្រុកទាំងពីរ រាជរដ្ឋាភិបាល ក៏ដូចជារដ្ឋបាលខេត្ត បានវាយតម្លៃបេក្ខភាពអភិបាលស្រុកថ្មី ដោយផ្អែកលើលក្ខណៈសម្បត្តិ និងឧបនិស្ស័យសមស្របដូចមានចែងនៅក្នុងច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងលិខិតបទដ្ឋានគតិយុត្តនានា ដែលនៅជាធរមាន។
ព័ត៌មានជាតិ ថ្មីៗ
ឯកឧត្តម អភិបាលខេត្ត បានកោតសរសើរដល់ ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងស្រុកបន្ទាយស្រី និង ស្រុកអង្គរធំ ដែលតែងតែបានសាមគ្គីគ្នា ក្នុងការកសាងអភិវឌ្ឍន៍ស្រុក ឲ្យមានការរីកចម្រើនលើគ្រប់វិស័យក្នុងរយៈពេលកន្លងមកនេះ ។ ទន្ទឹមនោះ ការចូលកាន់តំណែងថ្មីនេះ ឯកឧត្តម ក៏រំពឹងថា ស្រុកទាំង២ នឹងមានកាន់តែការអភិវឌ្ឍបន្ថែមទៀត ស្របពេលដែលរាជរដ្ឋាភិបាល បានបង្កើតទីប្រជុំជនថ្មី ដែលមានប្រជាជនមកពីតំបន់រមណីយដ្ឋានអង្គរ គឺតំបន់រុនតាឯក និងតំបន់ពាក់ស្នែង ដែលជាកត្តាវិជ្ជមានក្នុងការជួយជំរុញសេដ្ឋកិច្ច និងជីវភាពប្រជាពលរដ្ឋទូទៅ។
ជាមួយនោះ ឯកឧត្តម អភិបាលខេត្ត ក៏បានណែនាំដល់រដ្ឋបាលស្រុកទាំងពីរ ត្រូវបន្តខិតខំពង្រឹងស្មារតីសាមគ្គីភាព ឯកភាពផ្ទៃក្នុងឲ្យបានល្អនៅក្នុងក្រុមប្រឹក្សា គណៈអភិបាល មន្រ្តីរាជការ និងកងកម្លាំងមានសមត្ថកិច្ចគ្រប់លំដាប់ថ្នាក់ ដោយឈរលើមូលដ្ឋាននៃការលើកកម្ពស់ប្រសិទ្ធភាពការងារ ការគោរពច្បាប់ គោរពគោលការណ៍នានារបស់រដ្ឋ ពង្រឹងរបៀបរបបធ្វើការ ពិសេសអនុវត្តន៍តាមអភិក្រមទាំង៥ ១.ឆ្លុះកញ្ចក់ ២.ងូតទឹក ៣.ដុសក្អែល ៤.ព្យាបាល និង៥.វះកាត់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដើម្បីលើកកម្ពស់ការទទួលខុសត្រូវ និងភាពជាម្ចាស់របស់មន្រ្តីនៅក្នុងការបំពេញតួនាទី និងភារកិច្ច សំដៅអភិវឌ្ឍមូលដ្ឋាន និងឆ្លើយតបចំពោះតម្រូវការរបស់ប្រជាពលរដ្ឋក្នុងដែនសមត្ថកិច្ចរបស់ខ្លួន៕
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
