ថ្លែងនៅខេត្តសៀមរាប ថ្ងៃទី១០ ខែមករា ឆ្នាំ២០២៣ ឯកឧត្តម ប៊ូ ច័ន្ទភីរូ អគ្គនាយកនិយ័តករធានារ៉ាប់រងកម្ពុជា លើកឡើងថា វិស័យធានារ៉ាប់រង នៅកម្ពុជានៅមានកម្រិតទាបនៅឡើយ បើប្រៀបធៀបទៅនឹងប្រទេសមួយចំនួន។ ទោះយ៉ាងនេះក្ដី ការពង្រឹងសេវាកម្ម និងទូទាត់សំណងជូនអតិថិជនឱ្យបានឆាប់រហ័ស និងទាន់ពេល គឺជាទំនុកចិត្តសម្រាប់វិស័យនេះ។
ថ្លែងក្នុងពិធីសម្ពោធឲ្យដំណើរការក្រុមហ៊ុន ដាយ អ៊ិឈិ ឡាយហ្វ៍ អ៊ិនសួរ៉ិនស៍ សាខាសាខេត្តសៀមរាប ឯកឧត្តម ប៊ូ ច័ន្ទភីរូ បញ្ចាក់ថា វិស័យធានារ៉ាប់រងនៅមានកម្រិតនៅកម្ពុជា ដោយហេតុថា ការផ្សព្វផ្សាយគ្រប់រូបភាព នៅមិនទាន់មានភាពទូលំទូលាយនៅឡើយ រីឯប្រជាពលរដ្ឋ ក៏នៅមិនទាន់បានសិក្សាពីអត្ថប្រយោជន៍លើសេវាធានារ៉ាប់រងនីមួយៗផងដែរ។
មានប្រសាសន៍ក្នុងឱកាសនោះដែរ លោក យុន លីនណេ អភិបាលរងខេត្តសៀមរាប លើកឡើងថា ការប្រើប្រាស់សេវាធានារ៉ាប់រង គឺជាការចូលរួមចំណែកយ៉ាងសកម្មក្នុងការទ្រទ្រង់ និងលើកកម្ពស់វិស័យសង្គមកិច្ច និង សេដ្ឋកិច្ចជាតិទាំងមូល។ ក្នុងន័យនេះ ប្រសិនបើប្រជាពលរដ្ឋគ្រប់រូប បានប្រើប្រាស់សេវាធានារ៉ាប់រង នោះពួកគាត់នឹងកាត់បន្ថយហានិភ័យ និងបានគាំពារអនាគតរបស់បុត្រធីតារបស់ពួកគេ ជាពិសេសថវិកាដែលពួកគាត់បានទិញសេវារ៉ាប់រង ក៏នឹងដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ចសំដៅធ្វើឱ្យសាច់ប្រាក់មានចរន្តក្នុងទីផ្សារ។
ព័ត៌មានជាតិ ថ្មីៗ
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
