ក្រុមនិស្សិតស្ម័គ្រចិត្ដនៃសាកលវិទ្យាល័យកេម្យុង ប្រទេសកូរ៉េខាងត្បូង ជាង៣០នាក់ បានជួយសាងសង់អាគារសាលប្រជុំមួយខ្នង និងផ្ដល់សម្ភារៈសិក្សា កីឡាជាច្រើនទៀត ដល់សាលាបឋមសិក្សាសំបួរ ស្ថិតនៅសង្កាត់សំបួរ ក្រុងសៀមរាប ដើម្បីជាការរឹតចំណងមិត្ដភាពនិស្សិត និងសិស្សប្រទេសទាំងពីរ កម្ពុជា-កូរ៉េ ឱ្យកាន់តែរឹងមាំថែមទៀត និងដាក់ឲ្យប្រើប្រាស់ជាផ្លូវការនៅព្រឹកថ្ងៃទី០៩ ខែមករា ឆ្នាំ២០២៣នេះ ។
លោក លី ថែហ៊ី (Lee Teahi) សាស្ដ្រចារ្យនៃសាកលវិទ្យាល័យកេម្យុង និងជាអ្នកដឹកនាំនិស្សិស្ម័គ្រចិត្ដប្រទេសកូរ៉េខាងត្បូង មានប្រសាសន៍ថា អគារសាលប្រជុំដែលក្រុមនិស្សិតរួមគ្នាសាងសងនាពេលនេះ មានទំហំទទឹង១០ម៉ែត្រ និងបណ្ដោយ២០ម៉ែត្រ ដោយពួកគាត់ប្រើរយៈពេលជាងមួយសប្ដាហ៍ ដើម្បីសាងសង់ឡើងសម្រាប់ជួយសម្រួលដល់កិច្ចការងាររបស់លោកគ្រូអ្នកគ្រូ នៅសាលាបឋមសិក្សាសំបួរ។ ចំពោះថវិកាសម្រាប់សាងសង់អគារនេះ គឺទទួលបានពីសាកលវិទ្យាល័យកេម្យុង ប្រទេសកូរ៉េខាងត្បូង។ ក្រៅពីការសាងសងអគារសាលប្រជុំនេះ ក្រុមនិស្សិតក៏បានជួយសាងសង់តារាងបាល់បោះ លាបថ្នាំជញ្ជាំងសាលារៀន ព្រមទាំងផាត់ពណ៌រូបភាពផ្សេងៗ ដែលការចំណាយថវិកាខ្លះៗពីក្រុមនិស្សិតស្ម័គ្រចិត្ដនោះ។ ការផ្ដល់នូវអំណោយអគារសាលប្រជុំ ក៏ដូចសម្ភារៈសិក្សាមួយចំនួនទៀតនេះ គឺដើម្បីបង្ហាញពីការស្រលាញ់រាប់អានគ្នារបស់សិស្សបឋមសិក្សាសំបួរ និងនិស្សិតប្រទេសកូរ៉េ។
ព័ត៌មានជាតិ ថ្មីៗ
លោក លី ថែហ៊ី បានបញ្ជាក់ថា ក្រុមនិស្សិតស្ម័គ្រចិត្ដរបស់សាកលវិទ្យាលកេម្យុង បានចាប់ផ្ដើមជួយដល់វិស័យអប់រំនៅខេត្ដសៀមរាប តាំងពីឆ្នាំ២០០៧មកម្ល៉េះដោយក្នុងនោះពួកគាត់ចុះជួយសាងសង់លារៀននៅស្រុកប្រាសាទបាគង ស្រុកសូទ្រនិគម ស្រុកជីក្រែង និងស្រុកពួក និងនៅតាមស្រុកជាច្រើនទៀតក្នុងខេត្ដសៀមរាប។ ក្នុងមួយឆ្នាំក្រុមនិស្សិតស្ម័គ្រចិត្ដកូរ៉េ បាននាំយកថវិកាពីសាកលវិទ្យាល័យកេម្យុង មកសាងសង់សាលារៀនក្នុងខេត្ដសៀមរាប ចំនួន ២ដង ប៉ុន្ដែរយៈពេល២ឆ្នាំកន្លងមកនេះ ត្រូវបានអាក់ខានដោយសារជំងឹកូវីដ-១៩។ លោកបន្ដថា នៅពេលខាងមុខក្រុមនិស្សិតកូរ៉េ នឹងមានគម្រោងជួយផ្ដល់ជំនួយសាលារៀនដល់ខេត្ដសៀមរាបបន្ដទៀត។
បើតាមលោក គង់ សុខុម នាយកសាលាបឋមសិក្សាសំបួរ បានថ្លែងថា ការផ្ដល់អគារពីសាកលវិទ្យាល័យប្រទេសកូរ៉េ លើវិស័យអប់រំនេះ បង្ហាញថា រដ្ឋាភិបាលប្រទេសកម្ពុជា និងប្រទេសកូរ៉េ កាន់តែជាមិត្ដភាពជិតស្និតយូរអង្វែងថែមទៀត។ លោកក៏បានសម្ដែងនូវការដឹងគុណចំពោះសមិទ្ធផលនេះ ព្រោះថាសាលាបឋមសិក្សានេះនៅខ្វះខាតច្រើនសម្រាប់បំរើឱ្យធនធនធានមនុស្ស ហើយលោកក៏បានអំពាវនាវដល់និស្សិតកូរ៉េបន្ដជួយដល់វិស័យអប់រំនៅសាលាបឋមសិក្សានេះបន្ថែមទៀត ដើម្បីអភិវឌ្ឍន៍ធនធានមនុស្សនៅកម្ពុជា៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
