ថ្លែងក្នុងពិធីប្រគល់សេចក្តីសម្រេចតែងតាំងគណៈគ្រប់គ្រងវត្តឥន្ទបត្តបុរី ហៅអង្គរខាងជើង កាលពីរសៀលថ្ងៃទី២ ខែមករា ឆ្នាំ២០២៣ ព្រះវិជ័យរង្សី បណ្ឌិត ឡាច លាង ព្រះអនុគណក្រុងសៀមរាប និងជាព្រះចៅអធិការវត្តទេពពោធិវង្ស មានសង្ឃដីកាថា គណៈគ្រប់គ្រងមានភារកិច្ច គ្រប់គ្រងគរុភ័ណ្ឌវត្ត មានដូចជា ដីធ្លី ទីសេនាសេនៈ កុដិសាលាព្រះវិហារ បេតិភណ្ឌ ឱ្យបានគង់វង្សស្ថិតស្ថេរក្នុងព្រះពុទ្ឋសាសនា សហការប្រមូលផ្តុំសាមគ្គីសង្ឃឱ្យបានល្អប្រសើរចៀសវាងអធិករណ៍តូចធំនិងភាពអនាធិបតេយ្យដែលអាចកើតមាននៅក្នុងវត្តទាំងមូល។
ព្រះអង្គបញ្ជាក់ថា ថ្មីៗកន្លងមកនេះ ព្រះចៅអធិការវត្តបានលាចាកសិក្ខាបទហើយសាលាអនុគណក្រុងនៅមិនទាន់មានការតែងតាំងព្រះចៅអធិការថ្មីនៅឡើយទេ វត្តវ៉ាអារាមមិនអាចអត់អ្នកដឹកនាំបានទេ ដោយយោលទៅលើភាពចាំបាច់និងយោងតាមស្មារតីនៃកិច្ចប្រជុំរបស់គណៈសង្ឃក្រុងសៀមរាបកាល ពីថ្ងៃទី២៩ ខែធ្នូ ឆ្នាំ២០២២ បានសម្រេចតែងតែងព្រះភិក្ខុចំនួន៤រូបជាគណៈគ្រប់គ្រងវត្តសម្រាប់ ដឹកនាំមើលការខុសត្រូវលើ ភិក្ខុសាមណេរ ក្នុងវត្តទៅតាមពុទ្ឋបញ្ញតិ។
ព្រះអង្គបន្ថែមថា គណៈគ្រប់គ្រងវត្ត ត្រូវមានទំនាក់ទំនងល្អនិង សហការជាមួយអាជ្ញាធរមូលដ្ឋាន អាជ្ញាធរជាតិអប្សរា ដើម្បីជួយថែរក្សាសន្តិសុខ សណ្តាប់ធ្នាប់ក្នុងទីអារាមឱ្យបានល្អ។ ត្រូវបន្តអភិវឌ្ឍហេដ្ឋារចនាសម្ព័ន្ឋនានាក្នុងវត្តឱ្យកាន់តែរីកចម្រើនថែមទៀត តាមរយៈការប្រមូលផ្តុំ កៀរគរប្រជាពុទ្ឋបរិស័ទជិតឆ្ងាយចូលរួមជាធនធានថវិកាទៅតាមកម្លាំងសទ្ឋា ដើម្បីឱ្យទីអារាមនេះក្លាយជាថ្នាលប្រមូលផ្តុំទៅដោយវប្បធម៌រូបី សម្រាប់អ្នកទេសចរជាតិ អន្តរជាតិ បានស្វែងយល់កាន់តែច្បាស់ពីវប្បធម៌ប្រពៃណីរបស់ខ្មែរយើងដែលមានពីយូរលង់ណាស់មកហើយផង។ ក្នុងនាមសាលាអនុគណក្រុងព្រះតេជគុណ ឡាច លាង បានស្នើឱ្យគណៈគ្រប់គ្រង សហការជាមួយអាជ្ញាធរសង្កាត់និងមន្ទីរធម្មការនិងសាសនាខេត្ត បោះឆ្នោតជ្រើសរើសគណៈកម្មការ អាចារ្យសម្រាប់វត្តនេះដោយសំរាំងយកអ្នកនៅក្នុងមូលដ្ឋានក្បែរៗវត្ត ដើម្បីជួយក្នុងកិច្ចការពិធីបុណ្យផ្សេងៗ ដោយសារវត្តនេះកន្លងមកមិនទាន់មានគណៈកម្មការ អាចារ្យនោះទេ។
សូមបញ្ជាក់ថា នៅថ្ងៃទី៣០ ខែធ្នូ ឆ្នាំ២០២២ សាលាអនុគណក្រុងសៀមរាប បានសម្រេចបង្កើតគណៈគ្រប់គ្រងវត្តឥន្ទបត្តបុរី ហៅអង្គរខាងជើងស្ថិតក្នុងភូមិក្រវ៉ាន់ សង្កាត់នគរធំ ក្រុងសៀមរាប ខេត្តសៀមរាប ដោយបានតែងតាំង ព្រះតេជគុណ កែវ អាន ព្រះវិន័យអនុគណក្រុងសៀមរាប ជាប្រធានកិត្តិយស ព្រះតេជគុណ តាត មហាទី ព្រះធម្មធរអនុគណក្រុងសៀមរាប ជាប្រធាន ព្រះតេជគុណ ពាញ ពៅ ព្រះគ្រូសូត្រស្តាំវត្តអង្គរខាងជើង ជាអនុប្រធានទី១ និងព្រះតេជគុណ ងិន មាសច័ន្ទរដ្ឋា ព្រះគ្រូសូត្រឆ្វេងវត្តអង្គខាងជើងជាអនុប្រធានទី២៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
