នៅថ្ងៃទី២ ខែមករា ឆ្នាំ២០២៣ ឯកឧត្ដម ផៃ សុខខេង នាយករងខុទ្ទកាល័យសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ បានអញ្ជើញជួបសំណេះសំណាលជាមួយលោកគ្រូអ្នកគ្រូ សិស្សានុសិស្ស និងបើកបវេសនកាលឆ្នាំសិក្សាថ្មី២០២២-២០២៣ នៅអនុវិទ្យាល័យអង្គរធំ ស្ថិតនៅឃុំពាក់ស្នែង ស្រុកអង្គរធំ ខេត្ដសៀមរាប។
ឯកឧត្ដម ផៃ សុខខេង លើកឡើងថា កត្តាសុខសន្តិភាពក្រោមនយោបាយ ឈ្នះ ឈ្នះ របស់សម្តេចតេជោ ហ៊ុន សែន បានធ្វើឲ្យប្រទេសកម្ពុជា មានការអភិវឌ្ឍជាលំដាប់ ចាប់តាំងពីបាតដៃទទេ រហូតដល់មានអ្វីៗដូចសព្វថ្ងៃនេះ។ ដូច្នេះ សូមសិស្សានុសិស្សទាំងអស់ ខិតខំប្រឹងប្រែងរៀនសូត្រឱ្យក្លាយជាសិស្សពូកែ ដើម្បីក្លាយជាធនធានមនុស្សទៅអភិរឌ្ឍន៍សង្គមជាតិ។ ជាមួយនោះ ឯកឧត្ដម ក៏បានជំរុញដល់ដល់អាណាព្យាបាលសិស្ស លោកគ្រូ អ្នកគ្រូ ត្រូវជួយថែរក្សាកូន ណែនាំកូនៗ សិស្សានុសិស្សរបស់ខ្លួនឱ្យប្រព្រឹតតែអំពើល្អ ជៀសវាងការប្រព្រឹត្តិអំពើអបាយមុខ ដែលសង្គមជាតិស្អប់ខ្ពើម។
គួរជម្រាបថា តាមរយៈប្រសាសន៍របស់ ឯកឧត្តម បណ្ឌិតសភាចារ្យ ហង់ជួន ណារ៉ុន រដ្ឋមន្ត្រី ក្រសួងអប់រំ យុវជន និងកីឡា នៅឆ្នាំ២០២៣នេះ ក្រសួងបានដាក់ចេញនូវគោលដៅអាទិភាពចំនួន ៨ ចំណុច ដើម្បីធ្វើការកែទម្រង់ការអប់រំនៅកម្ពុជា ឬហៅថាបរិវត្តកម្មការអប់រំ (Transformation) ដែលរួមមាន៖១.ការបើកដំណើរការសាលារៀនប្រកបដោយសុវត្ថិភាព ការស្តារឡើងវិញ និងការបន្តការសិក្សារៀនសូត្ររបស់សិស្សានុសិស្ស ២.កំណែទម្រង់សាលារៀន ៣. ការអភិវឌ្ឍសមត្ថភាពគ្រូបង្រៀនប្រកបដោយគុណភាពកម្រិតខ្ពស់ ៤.ការអប់រំឌីជីថល ៥.ការអប់រំវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ៦.ការអភិវឌ្ឍបំណិនសតវត្សទី២១ សម្រាប់យុវជន ៧.ការបង្កើតមជ្ឈមណ្ឌលឧត្តមភាពនៅឧត្តមសិក្សា និង៨.ការពង្រឹងប្រព័ន្ធអប់រំ និងកសាងសមត្ថភាពស្ថាប័ន៕
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
