អគារបណ្ណាល័យ១ខ្នង សង់ពីបេតុទំហំទទឹង ៨ម៉ែត្រ បណ្តោយ ១២ម៉ែត្រ ស្ថិតក្នុងសាលាបឋមសិក្សាខ្ចាស់ នៃឃុំខ្ចាស់ ស្រុកសូទ្រនិគម ខេត្តសៀមរាប ដែលចាអំណោយរបស់មូលនិធិហ្គីវធូអេយ៍សៀ (Give2Asia) តាមរយៈសមាគមជីវិត និងក្តីសង្ឃឹមវត្តដំណាក់ ត្រូវបានសម្ពោធដាក់ឲ្យប្រើប្រាស់ជាផ្លូវការ នៅព្រឹកថ្ងៃទី០២ ខែមករា ឆ្នាំ២០២៣នេះ។
ព្រះតេជគុណ ឡម លឿម នាយកសមាគមជីវិត និងក្តីសង្ឃឹមវត្តដំណាក់ មានសង្ឃដីកាថា បណ្ណាល័យជាឃ្លាំងគំនិត បើសិក្សានុសិស្សទាំងអស់ចង់ចេះ ចង់ដឹង និងមានចំណេះដឹងច្រើន សូមប្អូនៗចំណាយពេលចូលទៅបណ្ណាល័យ អានសិក្សាស្រាវជ្រាវឱ្យបានច្រើន។ ការបង្កើតបណ្ណាល័យ គឺដើម្បីយកសៀវភៅមកដាក់ ដើម្បីឱ្យសិស្សអាន ដូចនេះបើប្អូនៗចូលទៅអានបានច្រើន ប្អូនៗទទួលបានចំណេះដឹងច្រើន និងជួយឱ្យការសិក្សារបស់ប្អូនៗល្អ បានក្លាយទៅជាសិស្សពូកែ។ ព្រះតេជគុណបន្តថា ប្រទេសដែលមានការអភិឌ្ឍជឿនលឿន គឺប្រជាពលរដ្ឋគេចូលចិត្តអានសៀវភៅណាស់ មិនថានៅពេលធ្វើដំណើរតាមរថយន្ត រថភ្លើង ឬពេលទំនេរ។ ព្រះតេជគុណរំពឹងថា អាត្រាអ្នកអានសៀវភៅនៅកម្ពុជានឹងមានច្រើន ទទួលបានចំណេះដឹងច្រើន មកជួយធ្វើការអភិឌ្ឍប្រទេសកម្ពុជាយើង ឱ្យកាន់តែមានការរីកចម្រើន។
បើតាមលោក តាន់ ឡែន ប្រធានការិយាល័យអប់រំស្រុកសូទ្រនិគម ខេត្តសៀមរាប បានថ្លែងថា ចេះមកពីរៀន សិស្សពូកែមកពីការខិតខំរៀន ស្រាវជ្រាវ អាន និងឈ្វេងយល់បានច្រើន។ ឥឡូវនេះមូលនិធិហ្គីវធូអេយ៍សៀ (Give2Asia) តាមរយៈសមាគមជីវិត និងក្តីសង្ឃឹមវត្តដំណាក់ បានជួយសាងសង់បណ្ណាល័យនេះ ជូនដល់សាលានៅតំបន់ជនបទ ស្របពេលដែលនៅគ្រប់សាលារៀនទូទាំងប្រកម្ពុជា បានបើកបវេសនកាលឆ្នាំសិក្សាថ្មី ២០២២-២០២៣ ដូចនេះបើប្អូនៗចង់ក្លាយជាសិស្សពូកែ ជាធនធានមនុស្ស ដ៏មានសមត្ថភាព ជួយធ្វើការអភិឌ្ឍប្រទេសយើងឱ្យមានការរីកចម្រើនជឿនលឿនប្អូន ៗត្រូវខំរៀន ចូលប័ណ្ណាល័យ អានសៀវភៅ ស្រាវជ្រាវ និងឈ្វេងយល់ឱ្យបានច្រើន៕
អត្ថបទ និងរូបភាព៖ លោក ឃុត សៅ
កែសម្រួល៖ អ៊ុន ណារាជ្យ
