របាយការណ៍ ប្រធានមន្ទីរទេសចរណ៍ បានឱ្យដឹងថា សណ្ឋាគារ និងផ្ទះសំណាក់នៅតំបន់ផ្សេងៗ ក្នុងខេត្ដសៀមរាប បានទទួលការកក់ទុកមុនពីអ្នកទេសចរជាតិនិងអន្ដរជាតិ បានប្រមាណពី៧០ ទៅ ៨០ភាគរយហើយ មកដល់ថ្ងៃទី៣០ ខែធ្នូឆ្នាំ២០២២នេះ ជាពិសេស សណ្ឋាគារ នៅម្តុំកេសកូលប្លុកសុខសាន្ត និងជុំវិញ Pub street បានទទួលការកក់ទុកមុន ពី៩០ទៅ១០០% និងសណ្ឋាគារChain Hotels ( Grand hotel,Sofitel, FCC Angkor, phumbaitang, Amansara, Anantara) ពី 95 ទៅ 100% ។
លោក ហ្វីលីប កៅ ប្រធានសមាគមក្លឹបទេសចរណ៍សៀមរាប រំពឹងថា ពិធីឆ្លងឆ្នាំសកលឆ្នាំ២០២២ ឈានចូលឆ្នាំ២០២៣នេះ នឹងមានអ្នកទេសចរជាតិ និងអន្ដរជាតិទៅទស្សនាកំសាន្ដច្រើនជាងឆ្នាំមុនៗ ព្រោះអាជ្ញាធរបានបង្កើតកម្មវិធីកំសាន្ដច្រើនសម្រាប់អបអរឆ្លងឆ្នាំសកល២០២៣ខាងមុខនេះ ជាពិសេសខេត្ដទេសចរណ៍មួយនេះ បានរៀបចំហេដ្ឋារចនាសម្ព័ន្ធផ្លូវថ្នល់ធំទូលាយ សោភណ្ឌភាពស្រស់ស្អាត មានសុខសន្ដិភាព សុវត្ថិភាព និងមានសណ្ដាប់ធ្នាប់ល្អ។ លោកបន្ដថា សម្រាប់កន្លែងស្នាក់នៅ ដូចជាសណ្ឋាគារ ផ្ទះសំណាក់ គឺនៅមានគ្រប់គ្រាន់ បើទោះបី សណ្ឋាគារលំដាប់អន្ដរជាតិខ្លះមានការកក់ទុកក់មុនពីភ្ញៀវទេសចរក្ដី។ ជាមួយគ្នានោះ សេវាស្នាក់ ក៏មិនមានតម្លើងថ្លៃផងដែរ។ លោកបានអំពាវដល់អ្នកទេសចរជាតិ អន្ដរជាតិទៅកំសាន្ដ និងអបអរឆ្នាំថ្មី២០២២ឈានចូលឆ្នាំ២០២៣ខាងមុខនេះ ឱ្យបានច្រើន ដើម្បីធ្វើយ៉ាងណា ឱ្យដឹងថាខេត្ដទេសចរណ៍មួយនេះ មានការអភិវឌ្ឍដល់កំរិតណាហើយ។
សូមបញ្ជាក់ថា រដ្ឋបាលខេត្តសៀមរាប បានសហការជាមួយរដ្ឋបាលក្រុងសៀមរាប មន្ទីរ អង្គភាព សមត្ថកិច្ច សហភាពសហព័ន្ធយុវជនកម្ពុជាខេត្តសៀមរាប និងក្រុមហ៊ុនមួយចំនួន បានបង្កើតកម្មវិធីធីឆ្លងឆ្នាំសកល រយ:ពេល ៣ថ្ងៃ ចាប់ពីថ្ងៃទី៣០ ខែធ្នូ ឆ្នាំ២០២២ ដល់ថ្ងៃទី០១ ខែមករា ឆ្នាំ២០២៣ ។ ព្រឹត្ដិការណ៍នេះ ធ្វើឡើងដើម្បីអបអរសាទរកម្មវិធីបុណ្យឆ្លងឆ្នាំសកល២០២២ ចូលឆ្នាំ២០២៣ ក៏ដូចជាការទាក់ទាញភ្ញៀវទេសចរជាតិ-អន្តរជាតិទៅទស្សនាឱ្យបានច្រើនបន្ថែមទៀត។នៅក្នុងព្រឹត្ដិការណ៍នេះ មានរៀបចំកម្មវិធីជិះទូកកម្សាន្ត តាំងពិព័រណ៍ ផ្សារទឹក បាញ់កាំជ្រួច និងប្រគំតន្ត្រី ក្នុងព្រឹត្តិការណ៍ឆ្លងឆ្នាំសកល២០២៣ នៅទីតាំងតំបន់សួនច្បារព្រះរាជដំណាក់ តំបន់មាត់ស្ទឹងសៀមរាប និងតំបន់ផាប់ស្ទើតក្នុងក្រុងសៀមរាប ខេត្តសៀមរាប៕
ព័ត៌មានជាតិ ថ្មីៗ
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
