នៅព្រឹកថ្ងៃទី១៦ ខែសីហា ឆ្នាំ២០២១នេះ អភិបាលស្រុកប្រាសាទបាគង លោក សូរ ប្លាតុង បានដឹកនាំមន្ត្រីរាជការនៃរដ្ឋបាលស្រុក ព្រមទាំង កងកម្លាំងជួរមុខក្នុងស្រុកប្រាសាទបាគង ទទួលការចាក់វ៉ាក់សាំងបង្កាជំងឺកូវីដ-១៩ ដូសទី៣ ឬដូសជម្រុញ ប្រភេទ AstraZeneca ពីរាជរដ្ឋាភិបាលហើយ នៅសាលាអនុវិទ្យាល័យហ៊ុន សែន រលួស ក្នុងស្រុកប្រាសាទបាគង ខេត្តសៀមរាប។
មានប្រសាសន៍ក្នុងឱកាសនោះ លោក សុរ ប្លាតុង អភិបាលស្រុកប្រាសាទបាគង តំណាងឲ្យមន្ត្រីរាជការនៃរដ្ឋបាលស្រុក ព្រមទាំងកងកម្លាំងជួរមុខ ក្នុងស្រុកប្រាសាទបាគង បានគោរពថ្លែងអំណរគុណយ៉ាងជ្រាលជ្រៅបំផុតចំពោះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានខិតខំប្រឹងប្រែងស្វះស្វែងរកវ៉ាក់សាំងដើម្បីចាក់ជូនមន្ត្រីរាជការ កងកម្លាំងប្រដាប់អាវុធក៏ដូចជា ប្រជាពលរដ្ឋទូទាំងប្រទេសកម្ពុជាបានយ៉ាងឆាប់រហ័ស និងទាន់សភាពការណ៍ ដើម្បីធានាបាននូវសុខមាលភាពសង្គម និងការពារប្រជាពលរដ្ឋ កុំរងគ្រោះថ្នាក់ដល់អាយុជីវិត ដោយសារមេរោគកូវីដ-១៩ ។
ជាមួយគ្នានោះដែរ លោកអភិបាលស្រុក បានក្រើនរំលឹកដល់បងប្អូនមន្ត្រីរាជការនៃរដ្ឋបាលស្រុក កងកម្លាំងជួរមុខទាំងអស់ និងប្រជាបលរដ្ឋទូទៅ ទោះទទួលបានការចាក់វ៉ាក់សាំងដូសទី៣ ក៏ដោយ តែត្រូវបន្តចូលរួមអនុវត្តឲ្យបានជាប្រចាំនូវវិធានការការពាររបស់ប្រមុខរាជរដ្ឋាភិបាល គឺវិធានការ ៣ការពារ ៣កុំ និងអនុវត្តតាមការណែនាំនានារបស់ក្រសួងសុខាភិបាល ដើម្បីរួមគ្នាបង្ការទប់ស្កាត់ កុំឲ្យមានការឆ្លងមេរោគកូវីដ-១៩ បន្តទៀតនៅក្នុងសហគមន៍យើង៕
