នៅព្រឹកថ្ងៃទី១៦ ខែសីហា ឆ្នាំ២០២១ លោក ពិន ប្រាកដ អភិបាលរងខេត្ដ តំណាងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប រួមជាមួយលោកលោកស្រីជាប្រធានអនុប្រធានមន្ទីរអង្គភាពពាក់ព័ន្ធមួយចំនួន បានចូលរួមក្នុងកិច្ចប្រជុំផ្សព្វផ្សាយស្ដីពី ការបើកយុទ្ធនាការជាតិក្រោមប្រធានបទ ” រួមគ្នាទទួលខុសត្រូវ ទប់ស្កាត់ការចម្លងវីរុសកូវីដ-១៩ ” តាមរយៈប្រព័ន្ធវិឌីអូ ក្រោមអធិបតីភាពដ៏ខ្ពង់ខ្ពស់ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល លោកជំទាវ ឱ វណ្ឌឌីន រដ្ឋលេខធិការក្រសួងសុខាភិបាល និងតំណាងអង្គការ WHO ផងដែរ។
លោកជំទាវ ឱ វណ្ឌឌីន មានប្រសាសន៍ថា ស្ថានភាពរាតត្បាតនៃជំងឺកូវីដ-១៩ នៅលើសកលលោកនៅមិនទាន់មានការថមថយនៅឡើយទេ ពិសេសជាមួយនឹងវត្តមាននៃវីរុសបំប្លែងថ្មីជាបន្តបន្ទាប់ ដែរបង្កជាហានិភ័យនៃការឆ្លងរាតត្បាតមកក្នុងប្រទេសកម្ពុជា។ ទន្ទឹមនឹងការព្រួយបារម្ភការឆ្លងរាលដាលជំងឺកូវីដ-១៩ ជាពិសេសប្រភេទជំងឺបំប្លែងថ្មីនេះ ប្រជាពលរដ្ឋគ្រប់រូបមិនត្រូវមានការធ្វេសប្រហែសជាដាច់ខាត ដោយមិនត្រូវអាងថាបានចាក់វ៉ាក់សាំងរួចរាល់ឲ្យសោះ ហើយមានការធុនទ្រាន់ក្នុងការចូលរួមទប់ស្កាត់ការឆ្លងរាលដាននៃជំងឺកូវីដ-១៩ គឺត្រូវចាំថាការទប់ស្កាត់ជំងឺកូវីដ-១៩ គឺត្រូវពឹងលើបុគ្គល គ្រួសារ និងសហគមន៍ ។
លោកជំទាវ ឱ វណ្ឌឌីន មានប្រសាសន៍បន្ថែមថា ការអនុវត្តន៍យុទ្ធនាការជាតិ ក្រោមប្រធានបទ “រួមគ្នាទទួលខុសត្រូវទប់ស្កាត់ការចម្លងវីរុសកូវីដ-១៩” ស្របទៅតាមផែនការយុទ្ធសាស្ត្រចាក់វ៉ាក់សាំងកូវីដ-១៩ និងការរៀបចំយុទ្ធនាការអនុវត្តយុទ្ធសាស្ត្រ ៦ចំណុចរបស់ សម្តេចតេជោនាយករដ្ឋមន្តី សំដៅទប់ស្កាត់រលកទី៣ នៃការឆ្លងរាលដាលជំងឺកូវីដ-១៩ ។ យុទ្ធនាការថ្នាក់ជាតិនេះនឹងជួយពញ្ញាក់ស្មារតីអំពីគ្រោះថ្នាក់ នៃការរាតត្បាតការចម្លងវីរុសកូវីដ-១៩ ដែលអាចផ្ទុះឡើងទ្រង់ទ្រាយធំក្នុងសហគមន៍បានគ្រប់ពេលវេលា និងទាមទារឲ្យមានការចូលរួមទទួលខុសត្រូវទាំងអស់គ្នា ពីបុគ្គល គ្រួសារ សហគមន៍ ស្ថាប័នពាក់ព័ន្ធ សេវាឯកជននានា ដើម្បីទប់ស្កាត់ការចម្លងវីរុសកូវីដ-១៩ មុននឹងអ្វីៗយឺតពេល និងសូមអំពាវនាវដល់ប្រជាពលរដ្ឋយើងអនុវត្តនូវប្រធានបទ “រួមគ្នាទទួលខុសត្រូវទប់ស្កាត់ ការចម្លងវីរុសកូវីដ-១៩”។
លោកជំទាវក៏សូមអំពាវនាវដល់ក្រសួងពាក់ព័ន្ធ អង្គភាពសាធារណៈដទៃទៀត អាជ្ញាធរថ្នាក់ក្រោមជាតិ រដ្ឋអំណាចមូលដ្ឋាន គ្រប់លំដាប់ថ្នាក់ មន្ទីរ អង្គភាពជំនាញនានា អង្គការអន្ដរជាតិ អង្គការមិនមែនរដ្ឋាភិបាល សេវាឯកជន មេត្តាចូលរួមជួយគាំទ្រនូវសកម្មភាពរបស់យុទ្ធនាការ ដោយធ្វើការផ្សព្វផ្សាយសារយុទ្ធនាការតាមគ្រប់មធ្យោបាយដែលមាន និងធ្វើការតាមដានជាប្រចាំនូវឥរិយាបថរបស់ប្រជាជន ព្រមទាំងរួមគ្នា រកដំណោះស្រាយក្នុងតំបន់ ដើម្បីបន្ដជំរុញការអនុវត្តនូវការអនុវត្តវិធានការសុខាភិបាល និងអន្ដរាគមន៍នានាប្រកបដោយប្រសិទ្ធភាព។
មានប្រសាសន៍ក្នុងឱកាសនោះដែរ លោក ពិន ប្រាកដ បានបញ្ជាក់ថា បច្ចុប្បន្នស្ថានភាពទូទៅនៃវីរុសជំងឺកូវីដ-១៩ នៅក្នងខេត្តសៀមរាបនៅមិនទាន់មានការថបថយពិតមែន ប៉ុន្តែអាជ្ញាធរខេត្ត ក៏បាននឹងកំពុងយកចិត្តទុកដាក់យ៉ាងខ្លាំងពីបញ្ហាទាំងនេះ ជាក់ស្តែងចាប់តាំងផ្ទុះជំងឺកូវីដ-១៩ រដ្ឋបាលខេត្តបានទទួលបងប្អូនពលរដ្ឋមកពីក្រៅប្រទេសជាច្រើនពាន់នាក់ ហើយអាជ្ញាធរខេត្តបាននឹងកុំពុងរៀបចំមណ្ឌលចត្តាឡីស័ក្ត និងមណ្ឌលព្យាបាលជាបន្តបន្ទាប់។ លោកថាបច្ចុប្បន្ន ចំពោះពលករមកពីក្រៅប្រទេសរដ្ឋបាលខេត្ត អាជ្ញាធរបានទទួលតែពលរដ្ឋដែលរស់នៅក្នុងខេត្តសៀមរាបទេ ដោយក្រុមការងារយើងបន្តទទួលជាប្រចាំមកពីតាមច្រកនានាជាប់ព្រំដែនកម្ពុជា-ថៃ៕
អត្ថបទ និង រូបភាព៖ លោក ឈិត សាវី ,លោក ស៊ាន សុផាត
