បើតាមលោក ពិន ប្រាកដ អភិបាលរងខេត្ដសៀមរាប មានឲ្យដឹងនៅថ្ងៃទី១៦ ខែសីហា ឆ្នាំ២០២១នេះថា ចាប់ពីដើមខែកក្កដាឆ្នាំ២០២១ អាជ្ញាធរខេត្ដសៀមរាប បានបន្តពង្រីកមណ្ឌលចត្ដាឡីស័ក និងមណ្ឌព្យាបាលជំងឺកូវីដ-១៩ ប្រភេទជំងឺស្រាលជាបន្ដបន្ទាប់ ខណៈបច្ចុប្បន្នអ្នកជំងឺកូវីដ-១៩ និងបងប្អូនចំណាកស្រុកត្រឡបមកពីក្រៅប្រទេសចូលមកក្នុងខេត្តសៀមរាបមានជាប្រចាំ។ ដោយបច្ចុប្បន្ននេះ អ្នកដែរត្រឡបមកពីក្រៅប្រទេសមានវិជ្ជមានជំងឺកូវីដ-១៩ ជាង១,០០០នាក់ កំពុងសំរាកព្យាបាល និងប្រជាពលរដ្ឋជាង ២០០នាក់ទៀត បាននឹងកំពុងធ្វើចត្ដាឡីស័កនៅតាមណ្ឌលនៅខេត្ដ ដែលធ្វើឲ្យអាជ្ញាធរសម្រេចបន្តបន្ថែមកន្លែងទៀត ដើម្បីជួយសម្រួលដល់អ្នកជំងឺ និងអ្នកដែលបានធ្វើចត្ដាឡីស័ក។
បើតាមលោក ពិន ប្រាកដ បានបន្ថែមថា ប្រជាពលរដ្ឋដែលត្រឡបមកពីក្រៅប្រទេសមានវិជ្ជមានកូវីដ-១៩ ភាគច្រើនជាប្រជាពលរដ្ឋដែលត្រឡបមកពីប្រទេសថៃ តាមច្រកអូរស្មាច់ ខេត្ដឧត្ដរមានជ័យ ,ច្រកប៉ោយប៉ែត ខេត្ដបន្ទាយមានជ័យ និងច្រកដូងខេត្ដបាត់ដំបង។ កន្លងទៅនេះអាជ្ញាធរខេត្ត ក៏បានបន្តរៀបចំទីតាំងសម្រាបព្យាបាលជំងឺកូវីដ-១៩ នៅតាមបណ្ដាស្រុកជាប់ជាមួយផ្លូវជាតិផងដែរ មានស្រុកពួក ស្រុកក្រឡាញ់ និងស្រុកស្រីស្នំ ក្រៅពីនោះអាជ្ញាធរក៏បានរៀបចំនៅទីតាំងធំៗ បន្ថែមមួយចំនួនទៀតក្នុងក្រុងសៀមរាប រួមមាន៖ មណ្ឌលព្យាបាលវិទ្យាល័យ ១០ មករា ដែរអាចទទួលអ្នកជំងឺបានចំនួនជិត១ពាន់នាក់, មណ្ឌលព្យាបាលវិទ្យាល័យ អង្គរ អាចទទួលអ្នកជំងឺបានចំនួន ១,២០០នាក់, ទីតាំងភោជនីដ្ឋានវិមានមង្គល អាចទទួលអ្នកជំងឺបានចំនួនជិត១ពាន់នាក់ ហើយបច្ចុប្បន្នអាជ្ញាកំពុងបន្តរៀបចំទីតាំងមួយកន្លែងទៀត គឺនៅតារាងបាល់ទាត់សហភាពសហ័ន្ធយុវជនកម្ពុជា ដែរអាចទទួលអ្នកជំងឺបានចំនួនជាង១ពាន់នាក់ ដែរអាចនឹងដំណើរការនៅពេលឆាប់ៗខាងមុខនេះ។
លោកអភិបាលរងខេត្តបញ្ជាក់បន្ថែមថា ក្រោយពីមានការណែនាំពីរាជរដ្ឋាភិបាលពីការបើកអោយដំណើរការតាមបណ្ដាច្រកព្រំដែនជាប់ប្រទេសថៃ អាជ្ញាធរខេត្តសៀមរាបបានបន្តទទួលប្រជាពលរដ្ឋមកពីក្រៅប្រទេសចូលមកកាន់ខេត្ដសៀមរាបជារៀងរាលថ្ងៃ ដោយក្នុងមួយថ្ងៃមានចំនួនប្រមាណពី៦០ ទៅ១០០នាក់ ដោយពួកគាត់ទាងនោះ គឺសុទ្ធតែបានធ្វើព្យាបាល និងធ្វើចត្ដាឡីស័កនៅតាមព្រំដែន រយៈពេល១៤ថ្ងៃរួចហើយ ប៉ុន្តែពួកគាត់ត្រូវបន្តធ្វើច្តាឡីស័ករយៈពេល ៧ថ្ងៃនៅក្នុងខេត្តសៀមរាបទៀត។
សូមជម្រាបថា បច្ចុប្បន្ននៅទូទាំងខេត្តសៀមរាបមានមណ្ឌលព្យាបាលជំងឹកូវីដ-១៩ និងមណ្ឌលធ្វើចត្ដាឡីស័ក សរុបមានចំនួន១១ទីតាំង ក្នុងនោះសម្រាប់មណ្ឌលព្យាបាលក្នុងក្រុងសៀមរាបមាន៖ មន្ទីរពេទ្យបង្អែកខេត្តសៀមរាប, សាលាគរុកោសល្យ និងវិក្រឹតការខេត្តសៀមរាប, វិទ្យាល័យអង្គរ, វិទ្យាល័យ ១០ មករា, ភោជនីយដ្ឋាន វិមានមង្គល។ សម្រាប់មណ្ឌលព្យាបាលនៅតាមបណ្តាស្រុក រួមមាន៖ វិទ្យាល័យចំណេះទូទៅ និងបច្ចេកទេសពួក ក្នុងស្រុកពួក ,អនុវិទ្យាល័យដូនទ្រ ស្រុកពួក, វិទ្យាល័យក្រឡាញ់ ស្រុកក្រឡាញ់ ,មន្ទីរពេទ្យបង្អែកស្រុកអង្គរជុំ ស្រុកអង្គរជុំ, សាលាបឋមសិក្សា ហ៊ុន សែន គំរូ ស្រុកជីក្រែង, និងវិទ្យាល័យដំដែក ស្រុកសូទ្រនិគម៕
អត្ថបទ និង រូបភាព៖ លោក ឈិត សាវី
កែសម្រួលអត្ថបទ៖ លោក អ៊ុន ណារាជ្យ