ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប មានប្រសាសន៍ថា កន្លងមក មន្ត្រីរាជការក្នុងអង្គភាពទាំង៦របស់រដ្ឋបាលខេត្ត បានខិតខំបំពេញតួនាទី ភារកិច្ចស្នូលរបស់ខ្លួនបានល្អប្រសើរហើយ ប៉ុន្តែកន្លងមក យើងក៏នៅមានចំណុចខ្វះខាតមួយចំនួនផងដែរ គឺដោយសារនៅតាមបណ្តាមន្ទីរ អង្គភាព យឺតយ៉ាវ ក្នុងការបំពេញឯកសាររដ្ឋបាល លិខិតសំណើរនានា ដោយទុកឱ្យឯកសារ ឬលិខិតស្នាមមួយចំនួននោះឱ្យកកស្ទះ មិនបានបំពេញឱ្យបានរហ័សទៅតាមការកំណត់ ដែលបណ្តាលធ្វើឲ្យមានការថ្នាំងថ្នាក់ពីប្រជាពលរដ្ឋខ្លះៗ ដូច្នេះ ចាប់ពីពេលនេះទៅ សូមឲ្យមន្ត្រីទាំងអស់ ត្រូវបន្តកិច្ចខិតខំប្រឹងប្រែងអនុវត្តនូវតួនាទីភារកិច្ចរបស់ខ្លួន ឱ្យកាន់តែមានប្រសិទ្ឋភាពថែមទៀត លើកិច្ចការបម្រើសេវាសាធារណៈ ដើម្បីឆ្លើយតបបានទៅតាមកម្មវិធី កំណែទម្រង់ស៊ីជម្រៅរបស់រាជរដ្ឋាភិបាលកម្ពុជា ។
ឯកឧត្តមអភិបាលខេត្ត មានប្រសាសន៍ទៀតថា ជាមួយគ្នានេះ គ្រប់បណ្តាថ្នាក់ដឹកនាំ មន្ទីរ អង្គភាព ត្រូវបន្តធ្វើការពង្រឹង និង ពង្រីក កិច្ចសហការ សាមគ្គីគ្នាឲ្យបានល្អ ដោយត្រូវគោរពអង្គការវិន័យចាត់តាំង ផ្លាស់ប្តូរនូវឥរិយាបថមិនគប្បី និង គោរពឲ្យបាននូវក្រមសីលធម៌វិជ្ជាជីវៈជាមន្ត្រីរាជការ ដើម្បីធានានិរន្តរភាពលើការងារផ្តល់សេវា និង ការអភិវឌ្ឍន៍មូលដ្ឋាន ជាពិសេសត្រូវប្រឹងប្រែងដុះខាត់ និងលុបបំបាត់ចោលនូវសតិអារម្មណ៍អសកម្ម បាត់បង់ជំហរការងារ ដែលនាំឱ្យមានឥទ្ឋិពលមិនល្អ ធ្វើឱ្យប៉ះពាល់ ដល់ផលប្រយោជន៍សាធារណៈរបស់ប្រជាពលរដ្ឋ ដែលបានមកទទួលសេវា។
ឯកឧត្តមបណ្ឌិត ឃឹម ប៊ុនសុង មានប្រសាសន៍បែបនេះ ក្នុងឱកាសជួបសំណេះសំណាលជាមួយថ្នាក់ដឹកនាំ មន្ត្រីរាជការក្នុងអង្គភាពទាំង៦របស់រដ្ឋបាលខេត្ត នៅសាលាខេត្តសៀមរាប កាលពីព្រឹក ថ្ងៃទី១ ខែតុលា ឆ្នាំ២០១៨នេះ ក្នុងឱកាសពិធីបុណ្យកាន់បិណ្ឌ ៕
អត្ថបទ និង រូបថត : លោក យូ វង្ស និង លោក គឿន វេត
កែសម្រួលអត្ថបទ : លោក លីវ សាន្ត
#មន្ទីរព័ត៌មានខេត្តសៀមរាប
