កាលពីព្រឹកថ្ងៃទី០១ ខែកញ្ញា ឆ្នាំ២០២១នេះ មន្ត្រីសង្ឃសាលាគណខេត្តសៀមរាប ដឹកនាំដោយព្រះធម្មានុរ័ក្ខញាណ ស៊ុម ពិសិដ្ឋ ព្រះសមុហ៍គណខេត្ត រួមនឹងឧបាសិកា ស៊ិន លំអង និងកូនចៅព្រមទាំងក្រុមគ្រួសារ បាននាំយកទេយ្យទាន និងអំណោយជាគ្រឿងឧបភោគបរិភោគ និងថវិកាមួយចំនួន ជូនដល់ប្រជាពលរដ្ឋដែលមានជីវភាពខ្វះខាតប្រចាំថ្ងៃចំនួន៤៣គ្រួសារ នៅភូមិចំនួន០៣ ក្នុងឃុំចាន់ស ស្រុកសូទ្រនិគម ខេត្តសៀមរាប គឺភូមិកន្សែងលើ, ភូមិកន្សែងក្រោម និងភូមិស្រែប្រិយ ដែលក្នុងមួយគ្រួសារទទួលបាន ៖ មីចំនួន ១កេស , អង្ករចំនួន ២០គីឡូក្រាម , ត្រីខចំនួន១យួរ ,ទឹកស៊ីអ៊ីវចំនួន ១យួរ , ទឹកត្រីចំនួន ១យួរ , ស្កគ្រាប់ចំនួន១កញ្ចប់ និងបច្ច័យចំនួន ៤ម៉ឹនរៀល ។
មានប្រសាសន៍ក្នុងឱកាសនោះ ក្នុងនាមអាជ្ញាធរមូលដ្ឋាន លោក ហៀង ណារិទ្ឋ សមាជិកក្រុមប្រឹក្សាឃុំចាន់ស បានសម្ដែងនូវអំណរគុណចំពោះព្រះសង្ឃ និង ឧបាសិកា ស៊ិន លំអង និងកូនចៅព្រមទាំងក្រុមគ្រួសារ សម្រាប់ការផ្ដល់អំណោយជាគ្រឿងឧបភោគបរិភោគ និងថវិកាមួយចំនួននាពេលនេះ និង បានចាត់ទុកការផ្តល់ជូននូវស្បៀងអាហារសម្រាប់គ្រួសាទីទ័លក្រនេះ ជាគុណបំណាច់ដ៏ធំធេងណាស់សម្រាប់ប្រជាពលរដ្ឋក្នុងឃុំរបស់លោក ដែលមានជីវភាពខ្វះខាតគឺអាចជួយសម្រាលនូវភាពខ្វះខាតបានមួយរយៈពេលផងដែរ ស្របពេលដែលកម្ពុជា ក៏ដូចជាពិភពលោកទាំងមូលកំពុងប្រឈមទៅនឹងវិបត្តិនៃជំងឹកូវីដ-១៩ ។
ព្រះធម្មានុរ័ក្ខញាណ ស៊ុម ពិសិដ្ឋ ព្រះសមុហ៍គណខេត្ត មានសង្ឃដីកាថា ស្បៀងអាហារបន្តិចបន្តួចនេះបានមកពីសទ្ឋាជ្រះថ្លារបស់ ឧបាសិកា ស៊ិន លំអង និងក្រុមគ្រួសារ សម្រាប់ធ្វើការចែករំលែក ជូនដល់គ្រួសារជួបការលំបាកក្នុងជីវភាពជាក់ស្តែង ដើម្បីជួយសម្រួលដល់ជីវភាពរស់នៅប្រចាំថ្ងៃរបស់ពួកគាត់ ដែលជួបការលំបាកដោយសារវិបត្តិជំងឺកូវីដ-១៩ និង ជាការចូលរួមជាមួយរាជរដ្ឋាភិបាលកម្ពុជា ក៏ដូចជារដ្ឋបាលខេត្តសៀមរាប ក្នុងការទប់ស្កាត់ និងកាត់បន្ថយការឆ្លងរាលដាលជំងឺកូវីដ-១៩ ដែលកំពុងបង្កហានិភ័យដោយគម្រាមកំហែងមកលើសុខភាព និង អាយុជីវិតប្រជាជនកម្ពុជានាពេលបច្ចុប្បន្ន ។
ព្រះធម្មានុរ័ក្ខញាណ ស៊ុម ពិសិដ្ឋ មានសង្ឃដីកាទៀតថា ស្បៀងអាហារនេះ អាចជួយសម្រាលការលំបាករបស់បងប្អូនបានមួយគ្រាទេ តែអ្វីដែលបងប្អូនត្រូវប្រឹងប្រែងទៀតនោះ គឺការខិតខំបង្កបង្កើនផល និងដាំដំណាំរួមផ្សំសម្រាប់ទ្រទ្រង់ជីវភាពប្រចាំគ្រួសាររបស់យើង ប៉ុន្តែប្រការសំខាន់ក្នុងដំណាល់នេះ គឺ បងប្អូនប្រជាពលរដ្ឋក្នុងមូលដ្ឋាននេះ សូមបង្កើនការប្រុងប្រយ័ត្ន និងរួមគ្នាទប់ស្កាត់ការឆ្លងរីករាលដាលជំងឺកូវី-១៩ ដោយអនុវត្តឱ្យបានម៉ឺងម៉ាត់ តាមការណែនាំនានារបស់ក្រសួងសុខាភិបាល និងវិធានការរបស់រាជរដ្ឋាភិបាល គឺ៣ការពារនិង៣កុំ និងសូមឲ្យមាតាបិតា ឬអាណាព្យាបាលកុមារ ដេលមានអាយុ១២ដល់១៧ឆ្នាំ ត្រុវនាំកូនចៅមកទទួលយកការចាក់វ៉ាក់សាំង ឲ្យបានគ្រប់ៗគ្នានិងទាន់ពេលវេលា ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
