ក្រុមគ្រូបង្រៀននៅក្រុងសៀមរាប បាននាំគ្នាសំអាតអនាម័យ និងបរិស្ថាននៅក្នុងសាលាដើម្បីត្រៀមបើកឱ្យសិស្សានុសិស្សាចូលរៀនឡើងវិញ ក្រោយពេលបិទអស់រយៈពេលជាច្រើនខែដោយសារជំងឺកូវីដ១៩រាតត្បាត។
លោក អ៊ុច វុទ្ធី នាយកសាលាបឋមសិក្សាធ្លកអណ្ដូង ស្ថិតក្នុង សង្កាត់ស្លក្រាមក្រុងសៀមរាប មានប្រសាសន៍នៅថ្ងៃទី៨ខែកញ្ញាឆ្នាំ២០២១នេះថា តាមការវាយតម្លៃរបស់អាជ្ញាធរមូលដ្ឋានថា សាលារៀនរបស់លោកអាចនឹងត្រូវបើកអោយចូលរៀនឡើងវិញ ព្រោះថាតំបន់នេះមានហានីភ័យកំរិតទាបនៃការឆ្លងជំងឺកូវីដ១៩ ដែលសាលារៀននេះនឹងត្រូវអោយដំណើរការឡើងវិញដើម្បីអោយសិស្សានុសិស្សបានសិក្សារៀនមិនបានរៀនតាមអនឡាញ ដោយសារអាណាព្យាបាលខ្វះលទ្ធភាពទិញទូរស័ព្ទទំនើបរៀនសូត្រ។លោកបន្ដថា ការបើកសាលារៀនវិញនេះ មិនអាចអោយសិស្សចូលរៀនបាន១០០ភាគរយនោះទេ គឺត្រូវជ្រើសរើសយកសិស្សានុសិស្សដែលមិនបានរៀនតាមអនឡាញ ឬតាមស្មាតហ្វូន ដែលធ្វើអោយពួកគាត់បាត់បង់ចំណេះដឹងខ្លះៗ។លោកបានបន្ដថា លោកគ្រូអ្នកគ្រូបានចាប់ផ្ដើមសំអាតអនាម័យ និងបរិស្ថានត្រៀមស្វាគមន៍សិស្សានុសិស្សឡើងវិញក្រោយ ផ្អាកការសិក្សាជាច្រើនខែមកនេះ។លោកបន្ដថា នៅក្នុងក្រុងសៀមរាប អាចមានសាលារៀនប្រមាណ៧០សាលានឹងត្រូវបើកអោចូលរៀន ប៉ុន្ដែមិនទាន់កំណត់ពេលច្បាស់លាស់នៅឡើយទេ ដោយរងចាំប្រជុំសម្រេចបន្ថែមទៀត។
លោក លី ប៊ុណ្ណា ប្រធានមន្ទីរអប់រំយុវជន និងកីឡាខេត្តសៀមរាប បានឱ្យដឹង ថា អនុវត្តតាមការណែនាំរបស់ក្រសួងអប់រំ យុវជននិងកីឡា មន្ទីរអបរំយុវជន និងកីឡាខេត្តសៀមរាប គ្រោងនឹងអនុញ្ញាតឱ្យបើកដំណើការឡើងវិញ គ្រឹះស្ថានសិក្សាសាធារណៈ និងឯកជនគ្រប់កម្រិតទៅតាមស្ថានភាពជាក់ស្តែង តាមការពិនិត្យមើលរបស់គណៈកម្មការខេត្ត។ ហើយបើតាមការគ្រោងរបស់មន្ទីរអប់រំអាចប្រមាណ៦០ភាគរយនៃចំនួនសាលារៀនសរុប។ គម្រោងនេះក៏ពិតមែនតែត្រូវរងចាំការពិនិត្យមើលតាមទីតាំងសាលារៀនជាក់ស្តែងរបស់គណៈកម្មការសិន មុនសម្រចឱ្យដំណើរបាន។សាលារៀនទាំងអស់ ត្រូវអនុវត្តតាមវិធានការសុខាភិបាល ដូចជា រក្សាគម្លាតសុវត្ថិភាព លាងដៃជាមួយអាល់កុល ឱ្យបានញឹកញាប់ និងការចូលរួមសម្អាតបរិស្ថានឱ្យបានត្រឹមត្រូវ។លោក លី ប៊ុណ្ណា បានសំណូមពរដល់អាណាព្យាបាល មាតាបិតាសិស្ស សូមចូលរួមសហការជាមួយសាលារៀន ដើម្បីឱ្យដំណើរការទៅសាលារៀនរបស់កូនមានភាពល្អប្រសើរ និងត្រូវចូលរួមជាមួយ លោកគ្រូ អ្នកគ្រូ ដូចជាពិនិត្យតាមដាន និងជំរុញការសិក្សារបស់កូនៗជាដើម៕
អត្ថបទ និង រូបភាព៖ លោក ឈិត សាវី
