ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា គិតមកទល់ពេលនេះ ការសាងសង់ហេដ្ឋារចនាសម្ព័ន្ធផ្លូវថ្នល់ចំនួន ៣៨ខ្សែក្នុងក្រុងសៀមរាប មានរយៈពេលជាង១១ខែហើយ ហើយគ្រោងនឹងបញ្ចប់ការស្ថាបនាផ្លូវថ្នល់នៅចុងខែធ្នូ ឆ្នាំ២០២១នេះ ដូច្នេះក្រោយពីបញ្ចប់ការសាងសង់ផ្លូវទាំង ៣៨ខ្សែហើយនោះ នឹងប្រែក្លាយក្រុងសៀមរាប ឱ្យក្លាយជាទីក្រុងដ៏ទំនើបពោរពេញដោយសោភ័ណភាព បរិស្ថានល្អសម្រាប់ការរស់នៅ សក្តិសមជាទីក្រុងទេសចរណ៍ វប្បធម៌ និងប្រវត្តិសាស្ត្រ អាចទាក់ទាញភ្ញៀវទេសចរបានកាន់តែច្រើនសំដៅលើកស្ទួយសេដ្ឋកិច្ចជាតិឱ្យកាន់តែមានការរីកចម្រើន ព្រមទាំងធ្វើឱ្យប្រសើរឡើងដល់ការតភ្ជាប់ ពីទីប្រជុំជនក្នុងក្រុងសៀមរាបទៅកាន់តំបន់ដាច់ស្រយាលផងដែរ ។
ឯកឧត្ដមទេសរដ្ឋមន្ត្រី ស៊ុន ចាន់ថុល មានប្រសាសន៍យ៉ាងដូច្នេះក្នុងឱកាសដឹកនាំកិច្ចប្រជុំពិភាក្សាលើគម្រោងសាងសង់ហេដ្ឋារចនាសម្ព័ន្ធផ្លូវ៣៨ខ្សែក្នុងក្រុងសៀមរាប នៅសាលប្រជុំសាលាខេត្តសៀមរាប កាលពីព្រឹកថ្ងៃទី២៦ ខែតុលា ឆ្នាំ២០២១ ដោយមានការចូលរួមពីសំណាក់ឯកឧត្ដម លោកជំទាវ ជាសមាជិកនៃគណៈកម្មការអន្ដរក្រសួង ដើម្បីសិក្សា និងអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវថ្នល់ចំនួន៣៨ខ្សែនៅក្រុងសៀមរាប , ប្រតិភូអមដំណើរឯកឧត្ដមទេសរដ្ឋមន្ត្រី , ឯកឧត្ដម អ៊ាន ឃុន ប្រធានក្រុមប្រឹក្សាខេត្ត និង ឯកឧត្តម ទៀ សីហា អភិបាលខេត្តសៀមរាប ព្រមទាំងលោក លោកស្រី ជាអភិបាលរងខេត្ត , ថ្នាក់ដឹកនាំមន្ទីរអង្គភាពពាក់ព័ន្ធក្នុងខេត្ត គណៈកម្មការខេត្ត អង្គភាពសាងសង់ ក្រុមការងារត្រួតពិនិត្យបច្ចេកទេស មន្ត្រីជំនាញបច្ចេកទេសក្រោមឱវាទក្រសួង និងភាគីពាក់ព័ន្ធមួយចំនួនទៀត ។
ក្នុងឱកាសនោះដែរឯកឧត្ដមទេសរដ្ឋមន្ត្រី ស៊ុន ចាន់ថុល បានថ្លែងនូវអំណរគុណ និងកោតសរសើរយ៉ាងជ្រាលជ្រៅចំពោះអង្គភាពសាងសង់ទាំងអស់ ដែលបានខិតខំប្រឹងប្រែងបំពេញការងាររបស់ខ្លួនដោយយកចិត្តទុកដាក់ និងប្រកបដោយការទទួលខុសត្រូវខ្ពស់ បើទោះបីការងារសាងសង់នូវហេដ្ឋារចនាសម្ព័ន្ធនេះ បានប្រឈមនឹងការរាំងស្ទះដោយសារវិបត្តិជំងឺកូវីដ-១៩ ដែលធ្វើឲ្យកម្មករ ក៏ដូចអ្នកអនុវត្តមានលំបាកក្នុងការងារប្រតិបត្តិការក៏ដោយ ដែលគិតត្រឹមថ្ងៃទី២៥ ខែតុលា ឆ្នាំ២០២១នេះ ការអនុវត្តគម្រោងស្ថាបនាផ្លូវសម្រេចបានប្រមាណជា៨៦ភាគរយហើយ និងបានផ្ដាំផ្ញើឱ្យភាគីពាក់ព័ន្ធទាំងអស់សហការ និងពិភាក្សាគ្នារិះរកបច្ចេកទេសល្អៗ ដើម្បីសាងសង់សង់ផ្លូវទាំង៣៨ខ្សែនេះឱ្យកាន់តែមានគុណភាពខ្ពស់ ហើយក្នុងករណីការសាងសង់ កន្លងមកមិនត្រឹមត្រូវតាមលក្ខណៈបច្ចេកទេស ត្រូវកែសម្រួលឱ្យត្រូវតាមបទដ្ឋានបច្ចេកទេសឡើងវិញ។
គួររំលឹកថា មុននឹងដំណើរការបើកកិច្ចប្រជុំពិភាក្សានេះ កាលរសៀលថ្ងៃទី២៥ ខែតុលា ឆ្នាំ២០២១ម្សិលមិញនេះ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និង ដឹក ជញ្ជូន និងជាអនុប្រធានប្រចាំ ការនៃគម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែនៅក្នុងក្រុងសៀមរាប ខេត្តសៀមរាប បានដឹកនាំក្រុមការងារបច្ចេកទេសចុះពិនិត្យវឌ្ឍនភាពគម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែ នៅក្រុងសៀមរាប អមដំណើរដោយឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ដោយមានការចូលរួមពីសំណាក់ថ្នាក់ដឹកនាំក្រសួង អាជ្ញាធរដែនដី មន្ត្រីជំនាញបច្ចេកទេសក្រោមឱវាទក្រសួង និងភាគីពាក់ព័ន្ធផងដែរ ក្នុងគោលបំណងដើម្បីពិនិត្យគុណភាពបច្ចេកទេសនៃការសាងសង់ ថាតើស្របតាមលក្ខណៈបច្ចេកទេស បញ្ហាប្រឈមនានា ដើម្បីផ្លូវមានគុណភាពរឹងមាំ យូរអង្វែង និង បញ្ចប់តាមផែនការគ្រោងទុកដែរឬទេ ។
ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីបើកការដ្ឋានសាងសង់ ហេដ្ឋារចនាសម្ព័ន្ធផ្លូវថ្នល់ចំនួន ៣៨ខ្សែ ក្នុងក្រុងសៀមរាប កាលពីថ្ងៃទី៣០ ខែវិច្ឆិកា ឆ្នាំ២០២០ កន្លងទៅនេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានមានប្រសាសន៍ថា នៅពេលនេះយើងនឹងធ្វើឲ្យខេត្តសៀមរាបរបស់យើង មានទាំងផ្លូវ មានទាំងលូ ប្រឡាយសម្រាប់ទឹកស្អុយ សម្រាប់ទឹកភ្លៀង មានទាំងបណ្ដាញទឹក មានទាំងកាម៉េរាសុវត្ថិភាព ដើម្បីដាក់ជូនសម្រាប់ខេត្តសៀមរាប ដែលវានឹងក្លាយទៅជាទីក្រុងទេសចរណ៍ ដ៏រឹងមាំរបស់យើង ហើយវាស័ក្តិសមទៅនឹងឋានៈជាអតីតរាជធានី នៃអាណាចក្រខ្មែររបស់យើងផងដែរ សង្ឃឹមថា ខេត្តសៀមរាប នឹងក្លាយទៅជាខេត្តដែលមានសក្កានុពល បន្ដទៀត តាមរយៈវិស័យទេសចរណ៍បន្ទាប់ពីកូវីដ-១៩បានកន្លងផុត។ ចំណុចនេះសង្ឃឹមថា អ្នកសៀមរាបនឹងបានទទួលផល ហើយប្រជាជនដែលធ្លាប់មកលេងនៅសៀមរាប កាលពីពេលមុន ហើយឃើញផ្លូវមិនល្អនោះ នឹងបានឃើញផ្លូវដ៏ល្អ នៅក្នុងរយៈពេលជាងមួយឆ្នាំទៀត ដែលខ្ញុំគិតថា ឆ្នាំក្រោយនេះបើសិនជាកូវីដ-១៩ នៅឆ្នាំ២០២២ មានការថមថយ អាចនឹងគិតគូរទៅដល់ការបង្កើតឡើងនូវព្រឹត្តិការណ៍សង្ក្រាន្ដអង្គរនៅឆ្នាំ២០២២ ដែលពេលនោះគឺគេនឹងបានឃើញទីក្រុងសៀមរាបនេះ គឺស្អាត ដែលមានផ្លូវស្អាត បន្ទាប់ពីផ្លូវស្អាតនៅទីក្រុងភ្នំពេញ ផ្លូវស្អាតនៅខេត្តព្រះសីហនុផងដែរ ។
ឯកឧត្តម ទៀ សីហា អភិបាលខេត្តសៀមរាប ធ្លាប់បានមានប្រសាសន៍ថា៖ រាជរដ្ឋាភិបាលកម្ពុជាក្រោមកិច្ចដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានខិតខំប្រឹងប្រែងនាំសុខសន្តិភាពនិងប្រឹងប្រែងអភិវឌ្ឍន៍ប្រទេសជាតិឱ្យមានការរីកចំរើនលូតលាស់លើគ្រប់វិស័យ ដោយឡែកសម្រាប់ខេត្តសៀមរាបនៅចុងឆ្នាំ២០២០នេះ សម្តេចតេជោ ហ៊ុនសែន បានផ្តល់ឱ្យខេត្តនូវគម្រោងជួសជុលផ្លូវចំនួន ៣៨ខ្សែ ហើយតាមរយៈគម្រោងសាងសង់ផ្លូវទាំង ៣៨ខ្សែនេះ នឹងធ្វើឲ្យទីក្រុងសៀមរាប ប្រែក្លាយរូបរាងជាទីក្រុងទំនើប និងទេសចរណ៍ ដ៏មានសក្តានុពល ដែលត្រូវបានរាជរដ្ឋាភិបាលកម្ពុជាកំណត់ជាតំបន់ស្នូល នៃប៉ូលអភិវឌ្ឍជាតិ ជាគោលដៅទេសចរណ៍វប្បធម៌ប្រវត្តិសាស្រ្ត និងធម្មជាតិ ស្របតាមរូបសាស្ត្រទីក្រុង រួមជាមួយការគិតគូរដល់ការការពារ និងកែលម្អបរិស្ថាន ផាសុកភាពរបស់ប្រជាពលរដ្ឋ និងការរៀបចំអភិវឌ្ឍទីក្រុងឆ្លាតវៃ (Smart City) ផងដែរ។
សូមបញ្ជាក់ថា គម្រោងកែលម្អហេដ្ឋារចនាសម្ព័ន្ធផ្លូវចំនួន ៣៨ខ្សែ ក្នុងក្រុងសៀមរាបនេះ មានប្រវែងសរុប ១០៦,៤២៤ គីឡូម៉ែត្រ ប្រើប្រាស់ថវិកាជាតិសរុបប្រមាណជិត ១៥០លានដុល្លារអាមេរិក ដោយក្នុងនោះចំនួន ៩លានដុល្លារអាមេរិក ចំណាយលើការងារចាំបាច់ក្នុងការរៀបចំ ស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ឋិតក្រៅគម្រោងសាងសង់ខ្សែផ្លូវទាំង ៣៨នេះ ដែលមានរយៈពេលសាងសង់ចំនួន ១៣ខែ គ្រោងនឹងបញ្ចប់នៅចុងឆ្នាំ២០២១៕
អត្ថបទ និង រូបថត ៖ លោក ជា ស្រស់ និង លោក យូ វង្ស
កែសម្រួលអត្ថបទ ៖ លោក លីវ សាន្ត
