អភិបាលខេត្តសៀមរាបមានប្រសាសន៍ថា លទ្ធផលនៃការបើកបង្រៀនសិស្សជាបណ្តុំសាកល្បងក្នុងកម្រឹតថ្នាក់អទិភាពកន្លងមក គឺជាមូលដ្ឋានបទពិសោធន៍ ឈានទៅរកលទ្ធភាព នៃការបើកដំណើរការគ្រឹះស្ថានសិក្សាសាធារណៈគ្រប់កម្រឹតឡើងវិញនាពេលខាងមុខ តាមការជម្រុញរបស់ក្រសួងអប់រំ យុវជន និងកីឡា ។
នៅក្នុងកិច្ចប្រជុំពីចម្ងាយតាមប្រព័ន្ធ Online Zoom នារសៀលថ្ងៃទី២៦ ខែតុលា ឆ្នាំ២០២១ របស់គណៈកម្មការត្រួតពិនិត្យ និងវាយតម្លៃការបើកដំណើរការឡើងវិញ នូវគ្រឹះស្ថានសិក្សាសាធារណៈនិងឯកជន ក្នុងភូមិសាស្រ្តខេត្តសៀមរាប ក្រោមវត្តមានរបស់ ឯកឧត្តមអភិបាលខេត្ត ( ទៀ សីហា ) លទ្ធផលនៃកិច្ចពិភាក្សា ស្តីពីកិច្ចដំណើរការបើកបង្រៀននិងរៀនតាមបណ្តុំសាកល្បងកន្លងមកនេះ បានឆ្លុះបញ្ចាំងអំពីមោទនភាព ដែលនាំឲ្យខេត្តសៀមរាប មានលទ្ធភាពសម្រាប់ការគាំទ្រអនុវត្ត សេចក្តីណែនាំលេខ៦០ ចុះថ្ងៃទី២១ ខែតុលា ឆ្នាំ២០២១ របស់ក្រសួងអប់រំ យុវជន និងកីឡា ស្តីពីការជម្រុញឲ្យរាជធានី-ខេត្តទូទាំងប្រទេស ចាប់ផ្តើមបើកដំណើរការគ្រឹះស្ថានសិក្សាឡើងវិញ និងពង្រីកវិសាលភាពបង្រៀននិងរៀនតាមបណ្តុំ ឲ្យបានគ្រប់កម្រឹតសិក្សាផងដែរ។
សេចក្តីរាយការណ៍របស់លោក លី ប៊ុនណា ប្រធានមន្ទីរអប់រំ យុវជន និងកីឡាខេត្តសៀមរាប ការបើកបង្រៀនសាកល្បងកន្លងមកនេះរួមទាំងសាលាកម្រឹតបឋមសិក្សាថ្នាក់ទី៤ ទី៥ ទី៦ និងសាលាកម្រឹតមធ្យមសិក្សាថ្នាក់ទី៩ និងថ្នាក់ទី១២ ស្មើនឹង១៧៣សាលា នៃបណ្តាស្រុកចំនួន៨ លើ១២ក្រុង-ស្រុកទូទាំងខេត្ត ក្នុងនោះសិស្សដែលបានទទួលសេវាអប់រំនេះ មានចំនួនជិត ១ម៉ឺន៦ពាន់នាក់។ ទូទាំងខេត្តសៀមរាប គ្រឹះស្ថានសិក្សាសាធារណៈ ចាប់ពីថ្នាក់មត្តេយ្យសិក្សា សាលាកម្រឹតបឋមសិក្សា និងកម្រឹតមធ្យមសិក្សា មានចំនួនសរុប ១ ១១២សាលា។ ក្នុងឆ្នាំសិក្សា២០២០-២០២១ តួរលេខសិស្សសរុបមានចំនួនប្រមាណជា ២៨ម៉ឺននាក់ និងមានគ្រូបង្រៀនគ្រប់កម្រឹតថ្នាក់ចំនួន ១ម៉ឺន១២៨នាក់។
ឯកឧត្តម ទៀ សីហា អភិបាលខេត្ត និងជាប្រធានគណៈកម្មការត្រួតពិនិត្យ-វាយតម្លៃការបើកដំណើរការឡើងវិញនូវគ្រឹះស្ថានសិក្សាសាធារណៈ និងឯកជន ក្នុងភូមិសាស្រ្តខេត្តសៀមរាប មានប្រសាសន៍ថា ពិតណាស់ គឺជាមោទនភាព ដែលខេត្តសៀមរាបមើលឃើញអំពីលទ្ធភាព នៃការបើកឲ្យដំណើរការគ្រឹះស្ថានសិក្សាឡើងវិញ ជាបណ្តុំគ្រប់ម្រឹតសិក្សាក្នុងបរិបទកូវីដ-១៩ ក៏ប៉ុន្តែយ៉ាងណាក៏ដោយ ការត្រួតពិនិត្យប្រើប្រាស់បណ្ណចាក់វ៉ាក់សាំងគឺជាប្រការចាំបាច់មុនដំបូងគេនៅពេលដំណើរការសាលារៀន និងជាកាតព្វកិច្ចត្រូវអនុវត្តគ្រប់ពេលវេលា គឺវិធានការ ៣ការពារ និង៣កុំ។ វិធានការសុខាភិបាល កិច្ចប្រតិបត្តិស្តង់ដារសុវត្តិភាព SOP របស់ក្រសួងអប់រំ និងវិធានការនានាដែលដាក់ចេញដោយរដ្ឋបាលខេត្ត វាត្រូវតែជាការចងចាំអនុវត្ត ដើម្បីនិរន្តភាពនៃដំណើការសាលារៀន។
ឯកឧត្តមបញ្ចាក់ថា ទាំងនេះគឺស្ថិតក្នុងគោលបំណងជម្រុញឲ្យការបើកសាលារៀនឡើងវិញ បានប្រព្រឹត្តទៅដោយរលូននៅគ្រប់ភូមិសិក្សាទូទាំងខេត្ត ក៏ប៉ុន្តែរដ្ឋបាលខេត្ត នឹងមានសិទ្ធពេញលេញក្នុងការបិទផ្អាកជាបណ្តោះអាសន្ន នៃគ្រឹះស្ថានសិក្សាណាមួយ ដែលមិនអនុវត្តតាមលក្ខខ័ណ្ឌសុវត្ថិភាព ដើម្បីបង្ការការឆ្លងជម្ងឺកូវីដ-១៩ ពីសហគមន៍ចូលសាលា និងចេញពីសាលា រាលដាលចូលសហគមន៍វិញ៕
អត្ថបទ និង រូបភាព៖ លោក ងឹន គីមឡេង
