នៅព្រឹកថ្ងៃទី០៦ ខែធ្នូ ឆ្នាំ២០២១នេះ ប្រជាពលរដ្ឋចំនួន ២.០០៩គ្រួសារ រស់នៅក្នុងភូមិចំនួន៤ មាន៖ ភូមិក្រសារទុំ ភូមិដំដែកថ្មី ភូមិស្រែធ្នង់ និងភូមិបុស្ស ឃុំដំដែក ស្រុកសូទ្រនិគមន៍ ខេត្តសៀមរាប បានទទួលវិញ្ញាបនបត្រសម្គាល់ម្ចាស់អចលនវត្ថុ ពីរដ្ឋបាលខេត្តសៀមរាប។ ពិធីប្រគល់ និងទទួលនេះប្រព្រឹត្តិទៅក្រោមអធិបតីភាព ឯកឧត្តម ទៀ សីហា អភិបាលខេត្ត និងលោក លី សំរិទ្ធ អភិបាលរងខេត្តសៀមរាប រួមនឹងលោកប្រធានមន្ទីរ អនុប្រធាន និងអង្គភាពពាក់ព័ន្ធជុំវិញខេត្តជាច្រើនរូបទៀត។
ឯកឧត្តម ទៀ សីហា មានប្រសាសន៍ថា រាជរដ្ឋាភិបាលកម្ពុជា ជាពិសេស សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី និង ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ដែលបានយកចិត្តទុកដាក់បំផុតលើការអនុវត្តកិច្ចការនេះកន្លងមក ដោយបានឧបត្ថម្ភគាំទ្រ ទាំងផ្នែកបច្ចេកទេស និងផ្នែកច្បាប់ក្នុងដំណើរការចុះបញ្ជីដីធ្លី នៅក្នុងភូមិសាស្ត្រខេត្តសៀមរាបយើងឱ្យមានភាពកាន់តែល្អប្រសើរឡើងបន្ថែមទៀត។ ក្នុងនោះការផ្តល់បណ្ណកម្មសិទ្ធិជូនដល់បងប្អូនប្រជាពលរដ្ឋជាម្ចាស់ដីនៅបេលនេះ គឺដោយបានបំពេញគ្រប់លក្ខខណ្ឌ និងបទដ្ឋានបច្ចេកទេសស្របតាមច្បាប់ និងបទដ្ឋានគតិយុត្តជាធរមាន។ ចំពោះប័ណ្ណកម្មសិទ្ធិនេះ មានប្រយោជន៍សំខាន់ណាស់ សម្រាប់បងប្អូន ដោយប័ណ្ណមួយសន្លឹកនេះ គឺជាការបញ្ជាក់អំពីភាពស្របច្បាប់ ភាពជាម្ចាស់លើដីធ្លីដែលបងប្អូនកំពុងកាន់កាប់ ។
ឯកឧត្តម មានប្រសាសន៍ទៀតថា ពាក់ព័ន្ធនឹងកិច្ចការងារទាំងនេះ ឯកឧត្តម ក៏បានធ្វើការកោតសរសើរ ចំពោះគណៈកម្មការរដ្ឋបាលដែលដឹកនាំដោយ លោក លី សំរិទ្ធ ជាប្រធានគណៈកម្មការរដ្ឋបាល រួមនឹងរដ្ឋបាលស្រុកសូទ្រនិគម និងមន្ទីរ-អង្គភាពពាក់ព័ន្ធ ដែលបានខិតខំអនុវត្តការងារចុះបញ្ជីដីធ្លីមានលក្ខណៈជាប្រព័ន្ធ ក្នុងភូមិចំនួន៤ រហូតសម្រេចបានការផ្តល់វិញ្ញាបនបត្រសម្គាល់ម្ចាស់អចលនវត្ថុ ជូនបងប្អូនប្រជាពលរដ្ឋឲ្យពួកគាត់ប្រើប្រាស់ស្របច្បាប់។ បច្ចុប្បន្ននេះ រដ្ឋបាលខេត្ត ក៏ដូចជាមន្ទីរអង្គភាពពាក់ព័ន្ធ បានអនុវត្តការងារចុះបញ្ជីដីធ្លីនេះ ទទួលបានលទ្ធផលជាច្រើន ហើយក៏បានពង្រីកការចុះបញ្ជីដីធ្លី ដែលមានលក្ខណៈជាប្រព័ន្ធ សរុបបានចំនួន ៦ក្រុង/ស្រុកទៀត រួមមាន៖ ក្រុងសៀមរាប ស្រុកពួក ស្រុកប្រាសាទបាគង ស្រុកសូទ្រនិគម ស្រុកក្រឡាញ់ និងស្រុកជីក្រែង។ ដូចនេះដើម្បីជម្រុញឲ្យកិច្ចការនេះ ដំណើរការបានកាន់តែល្អប្រសើរ និងទទួលបានជោគជ័យតាមផែនការគ្រោងទុករបស់រាជរដ្ឋាភិបាល សូមបងប្អូនប្រជាពលរដ្ឋ បន្តការចូលរួមសហការជាមួយអាជ្ញាធរមានសមត្ថកិច្ច និង ក្រុមការងារមន្ទីរជំនាញដើម្បីបន្តការងារចុះបញ្ជីដីធ្លីនេះឲ្យបានល្អប្រសើរថែមទៀត។
បើតាមលោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានឲ្យដឹងថា វិញ្ញាបនបត្រសម្គាល់ម្ចាស់អចលនវត្ថុ ដែលប្រគល់ជូនបងប្អូនប្រជាពលរដ្ឋទាំង ២.០០៩គ្រួសារ ដើម្បីយកទៅប្រើប្រាស់តាមតម្រូវការចាប់បាច់នោះ សម្រាប់ភូមិក្រសារទុំ មានក្បាលដីសរុប ៩៧០ក្បាលដី ក្នុងនោះបានចេញប័ណ្ណកម្មសិទ្ធិជូនបាន ៨៣០ក្បាលដី, ភូមិដំដែកថ្មី មានក្បាលដីសរុប ៣១៦ ក្នុងនោះបានចេញប័ណ្ណកម្មសិទ្ធិជូនបាន ២៩៦ក្បាលដី, ភូមិស្រែធ្នង់ មានក្បាលដីសរុប ៦១១ក្បាលដី ក្នុងនោះចេញប័ណ្ណកម្មសិទ្ធិជូនបាន ៥១១ក្បាលដី និងភូមិបុស្ស មានក្បាលដីសរុប ៦១១ក្បាលដី ក្នុងនោះចេញប័ណ្ណកម្មសិទ្ធិជូនបាន ចំនួន ៣៧២ក្បាលដី។ ដោយឡែក ចំពោះទីតាំងក្បាលដីមួយចំនួនទៀត ដែលនៅសល់ពុំទាន់អាចចេញប័ណ្ណជូន ដោយសារតែក្បាលដីទាំងនោះ ជាក្បាលដីគ្មានទិន្នន័យ ហើយជាប់ពាក់ព័ន្ធនងបណ្តឹងទប់ស្កាត់ ការជំទាស់តវ៉ាពាក់ព័ន្ធនឹងផ្លូវ ប្រឡាយ និងបុរាណដ្ឋានជាដើម៕
អត្ថបទ និង រូបភាព៖ លោក ស៊ាន សុផាត
កែសម្រួល៖ អ៊ុន ណារាជ្យ
